1 “ⴰⴷ ⵉⵎⵙⴰⵔ ⵅⵎⵉ ⵉ ⵖⴰ ⵜⴰⴷⴼⴻⴷ ⵖⴰⵔ ⵜⴻⵎⵎⵓⵔⵜ ⵏⵏⵉ ⴷ ⴰⵛ ⵉ ⵖⴰ ⵉⵡⵛ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⴷ ⵍⵡⴰⵔⵜ, ⵓⵛⴰ ⴰⴷ ⵜⵜ ⵜᵉⵟⵟⴼⴻⴷ ⵓⵛⴰ ⴰⴷ ⴷⴰⵢⴻⵙ ⵜⵥⴻⴷⵖⴻⴷ, 2 ⵅⴻⵏⵏⵉ ⴰⴷ ⵜⴻⴽⵙⵉⴷ ⵥⵉ ⵜⵎⴻⵥⵡⴰⵔⵓⵜ ⵏ ⴽⵓⵍ ⵍⵖⵉⴵⴻⵜ ⵉ ⵖⴰ ⵜⴻⵙⵙⵎⵓⵏⴻⴷ ⵥⵉ ⵜⴻⵎⵎⵓⵔⵜ ⵏⵏⵉ ⵉ ⴷ ⴰⵛ ⵖⴰ ⵉⵡⵛ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⴰⴷ ⵜ ⵜⴻⴳⴳⴻⴷ ⴷⵉ ⵜⵙⵓⴵⴻⵜ ⵓⵛⴰ ⴰⴷ ⵜⵔⴰⵃⴻⴷ ⵖⴰⵔ ⵡⴻⵎⵛⴰⵏ ⵉ ⵖⴰ ⵉⵅⴹⴰⵔ ⵙⵉⴷⵉ ⵎⴰⵃⴻⵏⴷ ⴰⴷ ⴷⵉⵏ ⵉⵙⵙⴻⵥⴷⴻⵖ ⵉⵙⴻⵎ ⵏⵏⴻⵙ. ^■   3 ⵓⵛⴰ ⴰⴷ ⴷⴷ-ⵜⴰⵙⴻⴷ ⵖⴰⵔ ⵓⴽⴻⵀⵀⴰⵏ, ⵡⴻⵏⵏⵉ ⴷⵉⵏ ⵉ ⵖⴰ ⵢⵉⵍⵉⵏ ⴷⴻⴳ ⵡⵓⵙⵙⴰⵏ ⵏⵏⵉ, ⴰⴷ ⴰⵙ ⵜⵉⵏⵉⴷ: ‘ⴰⵇⴰ ⴰⵙⵙ-ⴰ ⴰⴷ ⴱⴰⵔⵔⵃⴻⵖ ⵉ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⴱⴻⵍⵍⵉ ⴰⵇⴰ ⵓⴷⴼⴻⵖ ⵖⴰⵔ ⵜⴻⵎⵎⵓⵔⵜ ⵏⵏⵉ ⵅ ⵉⵊⵊⵓⴵ ⵙⵉⴷⵉ ⵉ ⵉⴱⴰⴱⴰⵜⴻⵏ ⵏⵏⴻⵖ ⵃⵉⵎⴰ ⴰⴷ ⴰⵏⴻⵖ ⵜⵜ ⵉⵡⵛ.’ 4 ⵓⵛⴰ ⴰⴷ ⵉⴽⵙⵉ ⵓⴽⴻⵀⵀⴰⵏ ⵜⴰⵙⵓⴵⴻⵜ ⵥⴻⴳ ⵓⴼⵓⵙ ⵏⵏⴻⴽ, ⴰⴷ ⵜⵜ ⵉⵙⵙⴰⵔⵙ ⵥⵥⴰⵜ ⵉ ⵓⵄⴰⵍⵟⴰⵔ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ. 5 ⴰⴷ ⵜⴱⴰⵔⵔⵃⴻⴷ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⴰⴷ ⵜⵉⵏⵉⴷ: ‘ⴰⵔⴰⵎⵉⵢⵓ ⵏⵏⵉ ⵜⵓⵖⴰ ⵉⴵⴰⵏ ⵄⵍⴰⵃⴰⵍ ⴰⴷ ⵉⴼⵏⴰ ⴰⵇⴰ ⵜⵓⵖⴰ-ⵜ ⴷ ⴱⴰⴱⴰ. ⵙⵙⴻⵏⵏⵉ ⵉⵀⵡⴰ ⵖⴰⵔ ⵎⵉⵚⵔⴰ ⵓⵛⴰ ⵉⵥⴷⴻⵖ ⴷⵉⵏ ⴰⵎⴻⵛⵏⴰⵡ ⴰⴱⴰⵔⵔⴰⵏⵉ ⴰⴽ-ⴷ ⵉⵊⵊ ⵏ ⵡⵓⵔⵓ ⵏ ⵢⴻⵔⵢⴰⵥⴻⵏ ⵡⴰⵀⴰ ⵓⵛⴰ ⵉⵢⵎⴰ, ⵉⴷⵡⴻⵍ ⴷ ⵉⵊⵊ ⵏ ⵍⴳⴻⵏⵙ ⵉⵎⵖⴰⵔ, ⵉⵊⵀⴻⴷ ⵓ ⵉⴷⵡⴻⵍ ⴷⴻⴳ ⵡⴰⵟⵟⴰⵙ. ^■   6 ⵉⵎⵉⵚⵔⵉⵢⵢⴻⵏ ⴹⴻⵍⵎⴻⵏ ⵓ ⵃⵚⴰⵔⴻⵏ ⴰⵏⴻⵖ ⵓ ⴳⴳⵉⵏ ⵅⴰⵏⴻⵖ ⵜⴰⵙⵎⵓⵖⵉ ⵜⴻⵇⵙⴻⵃ. 7 ⵓⵛⴰ ⵏⴻⵙⵖⵓⵢⵢ ⵖⴰⵔ ⵙⵉⴷⵉ, ⴰⵔⴻⴱⴱⵉ ⵏ ⵉⴱⴰⴱⴰⵜⴻⵏ ⵏⵏⴻⵖ, ⵓⵛⴰ ⵉⵙⵍⴰ ⵙⵉⴷⵉ ⵉ ⵜⵎⵉⵊⵊⴰ ⵏⵏⴻⵖ ⵓ ⵉⵥⵔⴰ ⴰⵔⵥⵉⵢⵢⴻⵜ ⵏⵏⴻⵖ ⴷ ⵡⴰⵔⴱⴻⵔ ⵏⵏⴻⵖ ⴷ ⵍⵎⴻⵃⵏⴻⵜ ⵏⵏⴻⵖ. 8 ⵉⵙⵙⵓⴼⴼⴻⵖ ⴰⵏⴻⵖ-ⴷⴷ ⵙⵉⴷⵉ ⵥⵉ ⵎⵉⵚⵔⴰ ⵙ ⵓⴼⵓⵙ ⵉⵊⴻⵀⴷⴻⵏ, ⵙ ⵓⵖⵉⵍ ⵉⵙⵙⵡⵉⵥⵥⴰⴹⴻⵏ, ⵙ ⵜⵉⴳⴳⵯⵓⴷⵉ ⵉⵎⵖⴰⵔⴻⵏ, ⵙ ⵍⴻⵄⵍⴰⵎⴰⵜ ⵓ ⵙ ⵍⵎⵓⵄⵊⵉⵥⴰⵜ 9 ⵓⵛⴰ ⵉⵙⵙⵉⴷⴻⴼ ⴰⵏⴻⵖ ⵖⴰⵔ ⵡⴻⵎⵛⴰⵏ-ⴰ ⵓⵛⴰ ⵉⵡⵛⴰ ⴰⵏⴻⵖ ⵜⴰⵎⵎⵓⵔⵜ-ⴰ, ⵜⴰⵎⵎⵓⵔⵜ ⵏⵏⵉ ⵉ ⵉⴼⴻⵢⵢⴹⴻⵏ ⵙ ⵓⵖⵉ ⴷ ⵜⴰⵎⵎⴻⵏⵜ.

10 ⵓⵛⴰ ⵍⴻⵅⵅⵓ, ⵅⵥⴰⵔ, ⵉⵡⵢⴻⵖ-ⴷⴷ ⵜⴰⵎⴻⵥⵡⴰⵔⵓⵜ ⵏ ⵍⵖⵉⴵⴻⵜ ⵏ ⵜⴻⵎⵎⵓⵔⵜ ⵏⵏⵉ ⵉ ⴷ ⴰⵢⵉ ⵜⴻⵡⵛⵉⴷ, ⴰ ⵙⵉⴷⵉ!’ ⵅⴻⵏⵏⵉ ⴰⴷ ⵜ ⵜⴻⴳⴳⴻⴷ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⴰⴷ ⵜⴰⴹⴰⵔⴻⴷ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ.

11 ⵣⵉ ⵎⴰⵔⵔⴰ ⵍⵅⴰⵍ ⵏⵏⵉ ⵉ ⵖⴰ ⵉⵡⵛ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⵉ ⵛⴻⴽ ⵓ ⵉ ⴰⵢⵜⴱⴰⴱ ⵏ ⵜⴰⴷⴷⴰⵔⵜ ⵏⵏⴻⴽ, ⴰⴷ ⵥⵥⴰⵢⴻⵙ ⵜⴼⴰⵔⵃⴻⴷ ⵛⴻⴽ ⴷ ⵓⵍⴰⵡⵉ ⴷ ⵓⴱⴰⵔⵔⴰⵏⵉ ⵉ ⵉⴵⴰⵏ ⴷⵉ ⵍⵡⴻⵙⵜ ⵏⵏⴻⴽ.

12 ⵅⵎⵉ ⵉ ⵖⴰ ⵜⴽⴻⵎⵎⵍⴻⴷ ⵥⴻⴳ ⵓⵄⴻⵛⵛⴰⵔ ⵏ ⵎⴰⵔⵔⴰ ⵍⴻⵄⵛⵓⵔ ⵏ ⵍⵖⵉⴵⴻⵜ ⵏⵏⴻⴽ ⴷⴻⴳ ⵓⵙⴻⴳⴳⵯⴰⵙ ⵡⵉⵙⵙ ⵜⵍⴰⵜⴰ ⵡⴻⵏⵏⵉ ⴷ ⴰⵙⴻⴳⴳⵯⴰⵙ ⵏ ⵍⴻⵄⵛⵓⵔ, ⵅⴻⵏⵏⵉ ⴰⴷ ⵜⴻⵏ ⵜⴻⵡⵛⴻⴷ ⵉ ⵓⵍⴰⵡⵉ, ⵉ ⵓⴱⴰⵔⵔⴰⵏⵉ, ⵉ ⵓⵢⵓⵊⵉⵍ, ⵉ ⵜⴰⵊⵊⴰⵞ, ⵃⵉⵎⴰ ⴰⴷ ⵛⵛⴻⵏ ⴷⴰⵅⴻⵍ ⵉ ⵜⴻⵡⵡⵓⵔⴰ ⵏⵏⴻⴽ ⵓ ⴰⴷ ⵊⵊⵉⵡⵏⴻⵏ. ^■  

13 ⵓⵛⴰ ⴰⴷ ⵜⵉⵏⵉⴷ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ: ‘ⴰⵇⴰ ⴽⵙⵉⵖ ⵎⵉⵏ ⵉⴵⴰⵏ ⵉⵇⴻⴷⴷⵙⴻⵏ ⵥⵉ ⵜⴰⴷⴷⴰⵔⵜ ⵉⵏⵓ ⵓⵛⴰ ⵄⴰⵡⴻⴷ ⵡⵛⵉⵖ ⵜ ⵉ ⵓⵍⴰⵡⵉ, ⵉ ⵓⴱⴰⵔⵔⴰⵏⵉ, ⵉ ⵓⵢⵓⵊⵉⵍ, ⵉ ⵜⴰⵊⵊⴰⵞ, ⴰⵎ ⵎⴰⵎⵎⴻⵛ ⵎⴰⵔⵔⴰ ⵉ ⴷ ⴰⵢⵉ ⵜⵓⵎⵓⵔⴻⴷ. ⵏⴻⵛⵛ ⵡⴰⵔ ⵄⴻⴷⴷⵉⵖ ⵓⵍⴰ ⵅ ⵉⵛⵜⴻⵏ ⵥⵉ ⵜⵡⴻⵚⵚⴰ ⵏⵏⴻⴽ ⵓ ⵡⴰⵔ ⵜⵜⵓⵖ ⵡⴰⵍⵓ. ^■  

14 ⵡⴰⵔ ⵥⵥⴰⵢⴻⵙ ⵛⵛⵉⵖ ⴷⴻⴳ ⵡⴻⵛⴹⴰⵏ ⵉⵏⵓ ⵓ ⵡⴰⵔ ⵥⵥⴰⵢⴻⵙ ⴽⵙⵉⵖ ⵓⵎⵉ ⵅⴻⵎⵊⴻⵖ ⵓⵍⴰ ⵡⴰⵔ ⵥⵥⴰⵢⴻⵙ ⵡⵛⵉⵖ ⵉ ⵢⵉⵊⵊ ⵏ ⵓⵎⴻⵜⵜⵉⵏ. ⴰⵇⴰ ⵙⵍⵉⵖ ⵉ ⵜⵎⵉⵊⵊⴰ ⵏ ⵙⵉⴷⵉ, ⴰⵔⴻⴱⴱⵉ ⵉⵏⵓ, ⵓ ⴳⴳⵉⵖ ⵎⴰⵔⵔⴰ ⵎⵉⵏ ⴷ ⴰⵢⵉ ⵜⵓⵎⵓⵔⴻⴷ.

15 ⵅⵥⴰⵔ ⵥⵉ ⵜⵥⴻⴷⴷⵉⵖⵜ ⵏⵏⴻⴽ ⵉⵇⴻⴷⴷⵙⴻⵏ, ⵥⴻⴳ ⵓⵊⴻⵏⵏⴰ, ⵖⴰⵔ ⵙⵡⴰⴷⴷⴰⵢ ⵓⵛⴰ ⴱⴰⵔⴻⴽ ⵍⴳⴻⵏⵙ ⵏⵏⴻⴽ ⵉⵙⵔⴰⵉⵍ ⴷ ⵜⴻⵎⵎⵓⵔⵜ ⵏⵏⵉ ⵉ ⴷ ⴰⵏⴻⵖ ⵜⴻⵡⵛⵉⴷ, ⴰⵎ ⵎⴰⵎⵎⴻⵛ ⵜⴻⵊⵊⵓⴵⴻⴷ ⵉ ⵉⴱⴰⴱⴰⵜⴻⵏ ⵏⵏⴻⵖ, ⵜⴰⵎⵎⵓⵔⵜ ⵏⵏⵉ ⵉⵜⵜⴼⴻⵢⵢⴹⴻⵏ ⵙ ⵓⵖⵉ ⴷ ⵜⴰⵎⵎⴻⵏⵜ.’ ^■  

16 ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⴰⵇⴰ ⵢⵓⵎⵓⵔ ⵉ ⵛⴻⴽ ⴰⵙⵙ-ⴰ, ⴰⴷ ⵜⴻⴳⴳⴻⴷ ⵜⵉⵡⴻⵚⵚⴰ ⴰⵢⴰ ⴷ ⵍⴼⴰⵔⴰⵢⵉⴹ-ⴰ. ⵃⴹⴰ ⵜⴻⵏⵜ ⵓⵛⴰ ⴻⴳⴳ ⵥⵥⴰⵢⵙⴻⵏ ⵙ ⵎⴰⵔⵔⴰ ⵓⵍ ⵏⵏⴻⴽ ⴷ ⵎⴰⵔⵔⴰ ⵍⴻⵄⵎⴰⵔ ⵏⵏⴻⴽ.

17 ⴰⵙⵙ-ⴰ ⵜⴻⵏⵏⵉⴷ ⴱⴻⵍⵍⵉ ⵙⵉⴷⵉ ⴰⴷ ⵢⵉⵍⵉ ⴷ ⴰⵔⴻⴱⴱⵉ ⵏⵏⴻⴽ, ⴰⴷ ⵜⵓⵢⵓⵔⴻⴷ ⴷⴻⴳ ⵉⴱⵔⵉⴷⴻⵏ ⵏⵏⴻⵙ, ⴰⴷ ⵜⴻⵃⴹⵉⴷ ⵜⵉⵡⴻⵚⵚⴰ ⴷ ⵍⵓⵎⵓⵔⴰⵜ ⵏⵏⴻⵙ ⴷ ⵍⴼⴰⵔⴰⵢⵉⴹ ⵏⵏⴻⵙ ⵓⵛⴰ ⴰⴷ ⵜⴻⵙⵍⴻⴷ ⵉ ⵜⵎⵉⵊⵊⴰ ⵏⵏⴻⵙ. ^■  

18 ⴰⵙⵙ-ⴰ ⵉⵏⵏⴰ ⴰⵛ ⵙⵉⴷⵉ ⴰⵇⴰ ⵛⴻⴽ ⴰⴷ ⵖⴰⵔⴻⵙ ⵜⵉⵍⵉⴷ ⴷ ⵉⵊⵊ ⵏ ⵍⴳⴻⵏⵙ ⵉⵖⵍⴰ ⴰⵟⵟⴰⵙ, ⴰⵎ ⵎⴰⵎⵎⴻⵛ ⵉ ⴷ ⴰⵡⴻⵎ ⵉⵏⵏⴰ, ⵓ ⵉⵜⵜⵅⴻⵚⵚⴰ ⴰⵛ ⴰⴷ ⵜⴻⵃⴹⵉⴷ ⵎⴰⵔⵔⴰ ⵜⵉⵡⴻⵚⵚⴰ ⵏⵏⴻⵙ, ^■  

19 ⵃⵉⵎⴰ ⵏⴻⵜⵜⴰ ⴰⴷ ⵛⴻⴽ ⵉⵙⵙⵓⵄⵍⴰ ⵅ ⵎⴰⵔⵔⴰ ⵍⴻⴳⵏⵓⵙ ⵉ ⵓⵙⴻⵎⵖⴰⵔ ⴷ ⵢⵉⵙⴻⵎ ⴷ ⵍⵄⴻⵥⵥ, ⵃⵉⵎⴰ ⴰⴷ ⵜⵉⵍⵉⴷ ⴷ ⵉⵊⵊ ⵏ ⵍⴳⴻⵏⵙ ⵉⵇⴻⴷⴷⵙⴻⵏ ⵉ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⴰⵎ ⵎⴰⵎⵎⴻⵛ ⵜⵓⵖⴰ ⵉⵏⵏⴰ.” ^■