ⴰⴷⵔⴰⵔ ⵏ ⵄⵉⴱⴰⵍ ⴷ ⵡⴻⴷⵔⴰⵔ ⵏ ⵊⵉⵔⵉⵥⵉⵎ
27
1 ⵎⵓⵙⴰ, ⴰⴽ-ⴷ ⵉⵎⵖⴰⵔⴻⵏ ⵏ ⵉⵙⵔⴰⵉⵍ, ⵢⵓⵎⵓⵔ ⵍⴳⴻⵏⵙ, ⵉⵏⵏⴰ: “ⵃⴹⴰⵎ ⵎⴰⵔⵔⴰ ⵜⵉⵡⴻⵚⵚⴰ ⴰⵢⴰ ⵏⵏⵉ ⴷ ⴰⵡⴻⵎ ⵓⵎⵓⵔⴻⵖ ⵏⴻⵛⵛ ⴰⵙⵙ-ⴰ. 2 ⴰⴷ ⵉⵎⵙⴰⵔ ⴷⴻⴳ ⵡⴰⵙⵙ ⵓⵎⵉ ⵖⴰ ⵜⴻⵥⵡⴰⵎ ⵉⵖⵥⴰⵔ ⵏ ⵍ'ⵓⵔⴷⵓⵏ ⵖⴰⵔ ⵜⴻⵎⵎⵓⵔⵜ ⵏⵏⵉ ⴷ ⴰⵛ ⵉ ⵖⴰ ⵉⵡⵛ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⴰⵇⴰ ⴰⴷ ⵜⴻⵙⵙⴱⴻⴷⴷⴻⴷ ⵉⵥⵔⴰ ⵉⵎⴻⵇⵇⵔⴰⵏⴻⵏ ⵓⵛⴰ ⴰⴷ ⵜⴻⵏ ⵜⵃⴻⵏⵏⵛⴻⴷ ⵙ ⵊⵊⴰⵔ. ■ 3 ⴰⴷ ⴷⴰⵢⴻⵙ ⵜⴰⵔⵉⴷ ⵎⴰⵔⵔⴰ ⴰⵡⴰⵍⴻⵏ ⵏ ⵛⵛⴰⵔⵉⵄⴰ-ⵢⴰ, ⵅⵎⵉ ⵉ ⵖⴰ ⵜⴻⵥⵡⵉⴷ ⵃⵉⵎⴰ ⴰⴷ ⵜⴰⴷⴼⴻⴷ ⵖⴰⵔ ⵜⴻⵎⵎⵓⵔⵜ ⵏⵏⵉ ⴷ ⴰⵛ ⵉ ⵖⴰ ⵉⵡⵛⴰ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⵉⵛⵜ ⵏ ⵜⴻⵎⵎⵓⵔⵜ ⵉⴼⴻⵢⵢⴹⴻⵏ ⵙ ⵓⵖⵉ ⴷ ⵜⴰⵎⵎⴻⵏⵜ, ⴰⵎ ⵎⴰⵎⵎⴻⵛ ⵉ ⴷ ⴰⵛ ⵉⵏⵏⴰ ⵙⵉⴷⵉ, ⴰⵔⴻⴱⴱⵉ ⵏ ⵉⴱⴰⴱⴰⵜⴻⵏ ⵏⵏⴻⴽ. 4 ⵅⵎⵉ ⵉ ⵖⴰ ⵜⴻⵥⵡⴰⵎ ⵉⵖⵥⴰⵔ ⵏ ⵍ'ⵓⵔⴷⵓⵏ, ⴰⴷ ⵜⴻⵙⵙⴱⴻⴷⴷⴻⵎ ⵉⵥⵔⴰ, ⵉⵏⵏⵉ ⵅ ⴷ ⴰⵡⴻⵎ ⵓⵎⵓⵔⴻⵖ ⴰⵙⵙ-ⴰ ⵅ ⵡⴻⴷⵔⴰⵔ ⵏ ⵄⵉⴱⴰⵍ ⵓⵛⴰ ⴰⴷ ⵜⴻⵏ ⵜⵃⴻⵏⵏⵛⴻⴷ ⵙ ⵊⵊⴰⵔ. 5 ⴰⴷ ⴷⵉⵏ ⵜⴻⴱⵏⵉⴷ ⵉⵊⵊ ⵏ ⵓⵄⴰⵍⵟⴰⵔ ⵉ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⵉⵊⵊ ⵏ ⵓⵄⴰⵍⵟⴰⵔ ⵏ ⵢⴻⵥⵔⴰ. ⵡⴰⵔ ⵅⴰⵙ ⵜⴻⵙⵙⵉⵍⵉⵢⴻⴷ ⴷⴷⵓⵥⴰⵏ ⵏ ⵡⵓⵥⵥⴰⵍ ⵥⵉ ⵙⵙⴰ ⵖⴰⵔ ⴷⴰ. ■ 6 ⵉⵜⵜⵅⴻⵚⵚⴰ ⴰⴷ ⵜⴻⴱⵏⵉⴷ ⴰⵄⴰⵍⵟⴰⵔ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⵙ ⵢⴻⵥⵔⴰ ⴽⴻⵎⵍⴻⵏ ⵡⴰⵀⴰ ⵓⵛⴰ ⴰⴷ ⵅⴰⵙ ⵜⴻⵙⵙⴱⴻⵅⵅⴰⵔⴻⴷ ⵜⵉⵖⴰⵔⵚⴰ ⵏ ⵡⴻⵛⵎⴰⴹ ⵉ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ. 7 ⵄⴰⵡⴻⴷ ⴰⴷ ⴰⵙ ⵜⵇⴻⴷⴷⵎⴻⴷ ⵜⵉⵖⴰⵔⵚⵉ ⵏⵏⴻⴽ ⵏ ⵍⴻⵀⵏⴰ. ⴰⴷ ⴷⵉⵏ ⵜⴻⵛⵛⴻⴷ ⵓⵛⴰ ⴰⴷ ⵜⴼⴰⵔⵃⴻⴷ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ. 8 ⴰⴷ ⵜⴰⵔⵉⴷ ⵎⴰⵔⵔⴰ ⴰⵡⴰⵍⴻⵏ ⵏ ⵛⵛⴰⵔⵉⵄⴰ ⴰⵢⴰ ⴷⴻⴳ ⵢⴻⵥⵔⴰ ⵙ ⵡⴻⵏⵇⴰⵛ ⵉⵛⴻⵡⵡⴰⵔⴻⵏ.”
9 ⵜⵓⵖⴰ ⵎⵓⵙⴰ ⵉⵙⵙⴰⵡⴰⵍ ⴰⴽ-ⴷ ⵉⴽⴻⵀⵀⴰⵏⴻⵏ, ⵉⵍⴰⵡⵉⵢⵢⴻⵏ, ⵖⴰⵔ ⵎⴰⵔⵔⴰ ⵉⵙⵔⴰⵉⵍ, ⵉⵏⵏⴰ:
“ⵙⵇⴰⵔ, ⵙⵃⴻⵙⵙ, ⴰ ⵉⵙⵔⴰⵉⵍ! ⴰⵙⵙ-ⴰ ⵜⵉⵡⴹⴻⴷ ⴰⴷ ⵜⵉⵍⵉⴷ ⴷ ⵉⵊⵊ ⵏ ⵍⴳⴻⵏⵙ ⵉ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ.
10 ⴰⴷ ⵜⴻⵙⵍⴻⴷ ⵉ ⵜⵎⵉⵊⵊⴰ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⵓⵛⴰ ⴰⴷ ⵜⴻⴳⴳⴻⴷ ⵥⵉ ⵍⵓⵎⵓⵔⴰⵜ ⵏⵏⴻⵙ ⴷ ⵜⵡⴻⵚⵚⴰ ⵏⵏⴻⵙ ⵏⵏⵉ ⵅ ⵛⴻⴽ ⵓⵎⵓⵔⴻⵖ ⴰⵙⵙ-ⴰ.”
11 ⵉⵡⴻⵚⵚⴰ ⵎⵓⵙⴰ ⵍⴳⴻⵏⵙ ⴷⴻⴳ ⵡⴰⵙⵙ ⵏⵏⵉ, ⵉⵏⵏⴰ:
12 “ⵅⵎⵉ ⵉ ⵖⴰ ⵜⴻⵥⵡⴰⵎ ⵍ'ⵓⵔⴷⵓⵏ ⴰⴷ ⴱⴻⴷⴷⴻⵏ ⵢⵉⵏⴰ ⵅ ⵡⴻⴷⵔⴰⵔ ⵏ ⵊⵉⵔⵉⵥⵉⵎ ⵃⵉⵎⴰ ⴰⴷ ⴱⴰⵔⴽⴻⵏ ⵍⴳⴻⵏⵙ: ⵛⵉⵎⵄⵓⵏ ⴷ ⵍⴰⵡⵉ ⴷ ⵢⴰⵀⵓⴷⴰ ⴷ ⵉⵙⵙⴰⴽⴰⵔ ⴷ ⵢⵓⵙⵓⴼ ⴷ ⴱⵉⵏⵢⴰⵎⵉⵏ. ■
13 ⵓⵛⴰ ⵉⵏⴰ ⴰⴷ ⴱⴻⴷⴷⴻⵏ ⵅ ⵡⴻⴷⵔⴰⵔ ⵏ ⵄⵉⴱⴰⵍ ⵃⵉⵎⴰ ⴰⴷ ⵏⴻⵄⵍⴻⵏ: ⵔⵓⴱⵉⵏ, ⵊⴰⴷ ⴷ ⵄⴰⵛⵉⵔ ⴷ ⵣⴰⴱⵓⵍⵓⵏ, ⴷⴰⵏ ⴷ ⵏⴰⴼⵜⴰⵍⵉ.
14 ⴰⴷ ⴱⴰⵔⵔⵃⴻⵏ ⵉⵍⴰⵡⵉⵢⵢⴻⵏ ⵓⵛⴰ ⴰⴷ ⵉⵏⵉⵏ ⵙ ⵜⵎⵉⵊⵊⴰ ⵉⵊⴻⵀⴷⴻⵏ ⵉ ⵎⴰⵔⵔⴰ ⴰⵔⵔⴰⵡ ⵏ ⵉⵙⵔⴰⵉⵍ:
15 ‘ⴷ ⴰⵎⴻⵏⵄⵓⵍ ⴰⵔⵢⴰⵥ ⵏⵏⵉ ⵉ ⵖⴰ ⵉⴳⴳⴻⵏ ⵉⵊⵊ ⵏ ⵍⴻⵅⵢⴰⵍ ⵉⵏⴻⵇⵛⴻⵏ ⵏⵉⵖ ⵉⴼⴻⵙⵢⴻⵏ,
- ⴰⵇⴰ-ⵜ ⴷ ⵊⵊⵄⵉⴼⴻⵛⵜ ⵉ ⵙⵉⴷⵉ, ⵉⵛⵜ ⵏ ⵍⵅⴻⴷⵎⴻⵜ ⵏ ⵉⴼⴰⵙⵙⴻⵏ ⵏ ⵓⵃⵔⴰⵢⴼⵉ -,
ⵓⵛⴰ ⴰⴷ ⵜⵜ ⵉⴳⴳ ⴷⴻⴳ ⵉⵊⵊ ⵏ ⵡⴻⵎⵛⴰⵏ ⵉⵏⵏⵓⴼⴼⴰⵔ.’
ⵓⵛⴰ ⵎⴰⵔⵔⴰ ⵍⴳⴻⵏⵙ ⴰⴷ ⴷⴷ-ⵢⴰⵔⵔ ⴰⴷ ⵢⵉⵏⵉ: ‘ⴰⵎⵉⵏ!’
16 ‘ⴷ ⴰⵎⴻⵏⵄⵓⵍ ⵡⵉ ⵉ ⵖⴰ ⵉⵙⵙⴻⵃⵇⴰⵔⴻⵏ ⴱⴰⴱⴰⵙ ⵏⵉⵖ ⵢⴻⵎⵎⴰⵙ!’
ⵓⵛⴰ ⵎⴰⵔⵔⴰ ⵍⴳⴻⵏⵙ ⴰⴷ ⵢⵉⵏⵉ: ‘ⴰⵎⵉⵏ!’
17 ‘ⴷ ⴰⵎⴻⵏⵄⵓⵍ ⵡⵉ ⵉ ⵖⴰ ⵉⵙⵙⵎⵓⵟⵟⵢⴻⵏ ⴰⵢⵎⵉⵔ ⵏ ⵓⵎⵇⴰⵔⵔⴻⴱ ⵏⵏⴻⵙ!’
ⵓⵛⴰ ⵎⴰⵔⵔⴰ ⵍⴳⴻⵏⵙ ⴰⴷ ⵢⵉⵏⵉ: ‘ⴰⵎⵉⵏ!’
18 ‘ⴷ ⴰⵎⴻⵏⵄⵓⵍ ⵡⵉ ⵉ ⵖⴰ ⵉⵙⵙⵡⴻⴷⴷⴰⵔⴻⵏ ⴰⴷⴰⵔⵖⴰⵍ ⴷⴻⴳ ⵡⴻⴱⵔⵉⴷ!”
ⵓⵛⴰ ⵎⴰⵔⵔⴰ ⵍⴳⴻⵏⵙ ⴰⴷ ⵢⵉⵏⵉ: ‘ⴰⵎⵉⵏ!’
19 ‘ⴷ ⴰⵎⴻⵏⵄⵓⵍ ⵡⵉ ⵉ ⵖⴰ ⵉⵙⵙⴼⴰⵔⵔⵖⴻⵏ ⵜⴰⵙⵖⴰⵔⵜ ⵏ ⵓⴱⴰⵔⵔⴰⵏⵉ,
ⵏ ⵓⵢⵓⵊⵉⵍ ⵓ ⵏ ⵜⴰⵊⵊⴰⵞ!’
ⵓⵛⴰ ⵎⴰⵔⵔⴰ ⵍⴳⴻⵏⵙ ⴰⴷ ⵢⵉⵏⵉ: ‘ⴰⵎⵉⵏ!’
20 ‘ⴷ ⴰⵎⴻⵏⵄⵓⵍ ⵡⵉ ⵉ ⵖⴰ ⵉⵟⵟⵚⴻⵏ ⴰⴽ-ⴷ ⵜⴻⵎⵖⴰⵔⵜ ⵏ ⴱⴰⴱⴰⵙ,
ⵎⵉⵏⵥⵉ ⵉⵜⵜⵄⴰⵔⵔⴰ ⴱⴰⴱⴰⵙ’
ⵓⵛⴰ ⵎⴰⵔⵔⴰ ⵍⴳⴻⵏⵙ ⴰⴷ ⵢⵉⵏⵉ: ‘ⴰⵎⵉⵏ!”
21 ‘ⴷ ⴰⵎⴻⵏⵄⵓⵍ ⵡⵉ ⵉ ⵖⴰ ⵉⵟⵟⵚⴻⵏ ⴰⴽ-ⴷ ⵛⴰ ⵏ ⵓⵎⵓⴷⴷⴰⵔ!’
ⵓⵛⴰ ⵎⴰⵔⵔⴰ ⵍⴳⴻⵏⵙ ⴰⴷ ⵢⵉⵏⵉ: ‘ⴰⵎⵉⵏ!’
22 ‘ⴷ ⴰⵎⴻⵏⵄⵓⵍ ⵡⵉ ⵉ ⵖⴰ ⵉⵟⵟⵚⴻⵏ ⴰⴽ-ⴷ ⵓⵞⵎⴰⵙ,
ⵢⴻⴵⵉⵙ ⵏ ⴱⴰⴱⴰⵙ ⵏⵉⵖ ⵢⴻⴵⵉⵙ ⵏ ⵢⴻⵎⵎⴰⵙ!’
ⵓⵛⴰ ⵎⴰⵔⵔⴰ ⵍⴳⴻⵏⵙ ⴰⴷ ⵢⵉⵏⵉ: ‘ⴰⵎⵉⵏ!’
23 ‘ⴷ ⴰⵎⴻⵏⵄⵓⵍ ⵡⵉ ⵉ ⵖⴰ ⵉⵟⵟⵚⴻⵏ ⴰⴽ-ⴷ ⵜⴰⴷⴻⴳⴳⵯⴰⵞ ⵏⵏⴻⵙ!’
ⵓⵛⴰ ⵎⴰⵔⵔⴰ ⵍⴳⴻⵏⵙ ⴰⴷ ⵢⵉⵏⵉ: ‘ⴰⵎⵉⵏ!’
24 ‘ⴷ ⴰⵎⴻⵏⵄⵓⵍ ⵡⵉ ⵉ ⵖⴰ ⵉⵏⵖⴻⵏ ⴰⵎⵇⴰⵔⵔⴻⴱ ⵏⵏⴻⵙ ⵙ ⵜⵏⵓⴼⴼⵔⴰ!’
ⵓⵛⴰ ⵎⴰⵔⵔⴰ ⵍⴳⴻⵏⵙ ⴰⴷ ⵢⵉⵏⵉ: ‘ⴰⵎⵉⵏ!’
25 ‘ⴷ ⴰⵎⴻⵏⵄⵓⵍ ⵡⵉ ⵉ ⵖⴰ ⵉⵟⵟⴼⴻⵏ ⴰⵔⵔⴻⵛⵡⴻⵜ
ⵎⴰⵃⴻⵏⴷ ⴰⴷ ⵉⵏⵖⴰ ⵉⵊⵊ ⵏ ⴱⵏⴰⴷⴻⵎ,
ⵎⴰⵀⴻⵏⴷ ⴰⴷ ⵉⵙⵙⵉⵥⵥⴻⵍ ⵉⴷⴰⵎⵎⴻⵏ ⵉⵎⴻⵥⴷⴰⴳⴻⵏ!’
ⵓⵛⴰ ⵎⴰⵔⵔⴰ ⵍⴳⴻⵏⵙ ⴰⴷ ⵢⵉⵏⵉ: ‘ⴰⵎⵉⵏ!’
26 ‘ⴷ ⴰⵎⴻⵏⵄⵓⵍ ⵡⵉ ⵡⴰⵔ ⵉⵜⵜⵇⴰⵔⵔⴰⵏ ⴰⵡⴰⵍⴻⵏ ⵏ ⵛⵛⴰⵔⵉⵄⴰ ⴰⵢⴰ ⵎⴰⵃⴻⵏⴷ ⴰⴷ ⵥⵥⴰⵢⵙⴻⵏ ⵉⴳⴳ ⵏⵏⴰⴷⵉ!’
ⵓⵛⴰ ⵎⴰⵔⵔⴰ ⵍⴳⴻⵏⵙ ⴰⴷ ⵢⵉⵏⵉ: ‘ⴰⵎⵉⵏ!’ ”■