1 ⵉⵎⵙⴰⵔ ⴰⵡⴰⵔⵏⵉ ⵉ ⵍⵎⴻⵡⵜ ⵏ ⵎⵓⵙⴰ, ⴰⵎⵙⴻⵅⵅⴰⵔ ⵏ ⵙⵉⴷⵉ, ⴱⴻⵍⵍⵉ ⵙⵉⴷⵉ ⵉⵙⵙⵉⵡⴻⵍ ⴰⴽ-ⴷ ⵢⴰⵛⵓⵡⴰ, ⵎⵎⵉⵙ ⵏ ⵏⵓⵏ, ⴰⵎⵙⴻⵅⵅⴰⵔ ⵏ ⵎⵓⵙⴰ, ⵉⵏⵏⴰ: ^■  

2 “ⵎⵓⵙⴰ, ⴰⵎⵙⴻⵅⵅⴰⵔ ⵉⵏⵓ ⵉⵎⵎⵓⵜ. ⵍⴻⵅⵅⵓ ⴽⴽⴰⵔ, ⴻⴽⴽ ⵅ ⵍ'ⵓⵔⴷⵓⵏ-ⴰ, ⵛⴻⴽ ⴷ ⵎⴰⵔⵔⴰ ⵍⴳⴻⵏⵙ-ⴰ, ⵖⴰⵔ ⵜⴻⵎⵎⵓⵔⵜ ⵉ ⴷ ⴰⵙⴻⵏ ⵖⴰ ⵡⵛⴻⵖ ⵏⴻⵛⵛ, ⵉ ⴰⵢⵜ ⵏ ⵉⵙⵔⴰⵉⵍ. 3 ⴽⵓⵍ ⴰⵎⵛⴰⵏ ⵎⵉⵏ ⵅⴻⴼ ⵖⴰ ⵜⴻⵄⵊⴻⵏ ⵜⵍⴻⵇⵇⴰ ⵏ ⵓⴹⴰⵔ ⵏⵡⴻⵎ, ⴰⵇⴰ ⵡⵛⵉⵖ ⴰⵡⴻⵎ ⵜ ⵉ ⴽⴻⵏⵏⵉⵡ, ⴰⵎ ⵎⴰⵎⵎⴻⵛ ⵉ ⵙⵙⵉⵡⵍⴻⵖ ⵏⴻⵛⵛ ⴰⴽ-ⴷ ⵎⵓⵙⴰ. ^■   4 ⵜⴰⵎⵎⵓⵔⵜ ⵏⵡⴻⵎ ⴰⴷ ⵜⵉⵍⵉ ⵥⵉ ⵍⴻⵅⵍⴰ ⴰⵍ ⵍⵓⴱⵏⴰⵏ-ⴰ, ⴰⵍ ⵉⵖⵥⴰⵔ ⴰⵎⴻⵇⵇⵔⴰⵏ, ⵉⵖⵥⴰⵔ ⵏ ⵍⴼⵓⵔⴰⵟ, ⵎⴰⵔⵔⴰ ⵜⴰⵎⵎⵓⵔⵜ ⵏ ⵉⵃⵉⵜⵜⵉⵢⵢⴻⵏ ⴰⵍ ⵍⴻⴱⵃⴰⵔ ⴰⵎⴻⵇⵇⵔⴰⵏ ⵎⴰⵏⵉ ⵜⵖⴻⴵⵉ ⵜⴼⵓⵛⵜ. ^□   5 ⵓⵍⴰ ⴷ ⵉⵊⵊ ⵡⴰⵔ ⵉⵥⴻⵎⵎⴰⵔ ⴰⴷ ⵉⵇⵇⵉⵎ ⵉⴱⴻⴷⴷ ⵥⵥⴰⵜ ⵉ ⵡⵓⴷⴻⵎ ⵏⵏⴻⴽ ⵎⴰⵔⵔⴰ ⵓⵙⵙⴰⵏ ⵏ ⵜⵓⴷⴰⵔⵜ ⵏⵏⴻⴽ. ⴰⵎ ⵎⴰⵎⵎⴻⵛ ⴷ ⴰⵢⵉ ⵜⵓⵖⴰ ⴰⴽ-ⴷ ⵎⵓⵙⴰ, ⴰⴷ ⵉⵍⵉⵖ ⵓⵍⴰ ⴰⴽⵉⴷⴻⴽ. ⵏⴻⵛⵛ ⵡⴰⵔ ⴷⴰⵢⴻⴽ ⵙⴻⵎⵎⵃⴻⵖ ⵏⵉⵖ ⴰⴷ ⵛⴻⴽ ⵜⵜⴻⵊⵊⵉⵖ. ^■   6 ⵉⵍⵉ ⴷ ⴰⵔⵢⴰⵥ ⵓ ⵉⵍⵉ ⵜⵎⴻⵃⴹⴻⴷ, ⵎⵉⵏⵥⵉ ⵛⴻⴽ ⴰⴷ ⵜⴰⵔⵔⴻⴷ ⵍⴳⴻⵏⵙ-ⴰ ⴰⴷ ⵉⵟⵟⴻⴼ ⵜⴰⵎⵎⵓⵔⵜ ⴷ ⵍⵡⴰⵔⵜ, ⵜⴰⵎⵎⵓⵔⵜ ⵏⵏⵉ ⵅ ⵏⴻⵛⵛ ⵊⵊⵓⴵⴻⵖ ⵉ ⵉⴱⴰⴱⴰⵜⴻⵏ ⵏⵙⴻⵏ ⴰⴷ ⴰⵙⴻⵏ ⵜⵜ ⵡⵛⴻⵖ. ^■   7 ⵉⵍⵉ ⵡⴰⵀⴰ ⴷ ⴰⵔⵢⴰⵥ ⵓ ⵉⵍⵉ ⵜⵎⴻⵃⴹⴻⴷ ⵎⴰⵃⴻⵏⴷ ⴰⴷ ⵜⴻⵃⴹⵉⴷ ⴰⴷ ⵜⴻⴳⴳⴻⴷ ⵎⴰⵔⵔⴰ ⵛⵛⴰⵔⵉⵄⴰ ⵏⵏⵉ ⴷ ⴰⵛ ⵢⵓⵎⵓⵔ ⵎⵓⵙⴰ, ⴰⵎⵙⴻⵅⵅⴰⵔ ⵉⵏⵓ, ⵓ ⵡⴰⵔ ⵅⴰⵙ ⵜⵜⵃⴻⵢⵢⴻⴹ ⵖⴰⵔ ⵢⴻⴼⴼⵓⵙ ⵓⵍⴰ ⵖⴰⵔ ⵓⵥⴻⵍⵎⴰⴹ, ⵎⴰⵃⴻⵏⴷ ⴰⴷ ⵜⴻⴳⴳⴻⴷ ⵙ ⵍⴻⵄⵇⴻⵍ ⵎⴰⵏⵉ ⵎⴰ ⵉ ⵖⴰ ⵜⵔⴰⵃⴻⴷ. ^■   8 ⵡⴰⵔ ⵜⵜⴻⵊⵊⵉ ⵛⴰ ⴰⴷⵍⵉⵙ-ⴰ ⵉⵜⵜⵡⴰⵏⵏⴹⴻⵏ ⵏ ⵛⵛⴰⵔⵉⵄⴰ ⴰⴷ ⴰⵛ ⵉⵜⵜⵡⴰⴽⴽⴻⵙ ⵅ ⵢⵉⵍⴻⵙ ⵏⵏⴻⴽ, ⵎⴰⵛⴰ ⵅⴰⵔⵔⴻⵚ ⴷⴰⵢⴻⵙ ⴰⵙⵙ ⴷ ⴵⵉⵍⴻⵜ, ⵎⴰⵃⴻⵏⴷ ⴰⴷ ⵜⴻⵃⴹⵉⴹ ⴰⴷ ⵜⴻⴳⴳⴻⴷ ⴰⵎⵎⵓ ⵏⵉⵛⴰⵏ ⴰⵎ ⵎⴰⵎⵎⴻⵛ ⵎⴰⵔⵔⴰ ⵎⵉⵏ ⴷⴰⵢⴻⵙ ⵜⵓⵔⴰ, ⵎⵉⵏⵥⵉ ⵅⴻⵏⵏⵉ ⵉ ⵖⴰ ⵜⴼⴻⵍⵃⴻⴷ ⴷⴻⴳ ⵡⴻⴱⵔⵉⴷ ⵏⵏⴻⴽ ⵓⵛⴰ ⴰⴷ ⵜⵜ ⵜⴻⴳⴳⴻⴷ ⵙ ⵍⴻⵄⵇⴻⵍ. ^■   9 ⵎⴰ ⵡⴰⵔ ⴷ ⴰⵛ ⵜ ⵏⵏⵉⵖ? ⵉⵍⵉ ⴷ ⴰⵔⵢⴰⵥ ⵓ ⵉⵍⵉ ⵜⵎⴻⵃⴹⴻⴷ, ⵡⴰⵔ ⵜⵜⴻⴳⴳⵯⴻⴷ ⵓ ⵡⴰⵔ ⵜⵜⴻⵊⵊ ⴰⴷ ⵉⵄⴳⴻⵥ ⵡⵓⵍ ⵏⵏⴻⴽ, ⵎⵉⵏⵥⵉ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⴰⵇⴰ-ⵜ ⴰⴽⵉⴷⴻⴽ ⵇⴰⵄ ⵎⴰⵏⵉ ⵎⴰ ⵉ ⵖⴰ ⵜⵔⴰⵃⴻⴷ.”

10 ⵓⵛⴰ ⵢⵓⵎⵓⵔ ⵢⴰⵛⵓⵡⴰ ⵉ ⵉⵡⴻⵇⵇⴰⴼⴻⵏ ⵏ ⵍⴳⴻⵏⵙ, ⵉⵏⵏⴰ:

11 “ⵓⵢⵓⵔⴻⵎ ⵅ ⵍⵡⴻⵙⵜ ⵏ ⵍⵎⴰⵔⴳⴻⵃ ⵏ ⵍⵄⴻⵙⴽⴰⵔ ⵓⵛⴰ ⵓⵎⵓⵔ ⵍⴳⴻⵏⵙ, ⵉⵏⵉⵎ ⴰⵙⴻⵏ: ‘ⵙⵡⴻⵊⴷⴻⵜ ⵍⴻⵄⵡⴻⵞ ⵉ ⵢⵉⵅⴻⴼ ⵏⵡⴻⵎ, ⵎⵉⵏⵥⵉ ⴰⵡⴰⵔⵏⵉ ⵉ ⵜⵍⴰⵜⴰ ⵏ ⵡⵓⵙⵙⴰⵏ ⴰⴷ ⵜⴻⵥⵡⴰⵎ ⵍ'ⵓⵔⴷⵓⵏ-ⴰ ⵃⵉⵎⴰ ⴰⴷ ⵜⴰⴷⴼⴻⵎ ⵖⴰⵔ ⵜⴻⵎⵎⵓⵔⵜ ⵉ ⴷ ⴰⵡⴻⵎ ⵖⴰ ⵉⵡⵛ ⵙⵉⴷⵉ, ⴰⵔⴻⴱⴱⵉ ⵏⵡⴻⵎ, ⴷ ⵍⵡⴰⵔⵜ ⵓⵛⴰ ⴰⴷ ⵜⵜ ⵜⴻⴽⵙⵉⵎ ⴷ ⵍⵡⴰⵔⵜ.’ ”

12 ⵉⵙⵙⵉⵡⴻⵍ ⵢⴰⵛⵓⵡⴰ ⴰⴽ-ⴷ ⵉⵔⵓⴱⵉⵏⵉⵢⵢⴻⵏ ⴷ ⵉⵊⴰⴷⵉⵢⵢⴻⵏ ⵓ ⴰⴽ-ⴷ ⵡⴻⵥⵢⴻⵏ ⵏ ⵜⴻⵇⴱⵉⵞ ⵏ ⵎⴰⵏⴰⵙⵙⴰ, ⵉⵏⵏⴰ:

13 “ⵄⴻⵇⵍⴻⵜ ⵅ ⵡⴰⵡⴰⵍ ⵏⵏⵉ ⵅ ⵉ ⴷ ⴰⵡⴻⵎ ⵢⵓⵎⵓⵔ ⵎⵓⵙⴰ, ⴰⵎⵙⴻⵅⵅⴰⵔ ⵏ ⵙⵉⴷⵉ, ⵓⵎⵉ ⵉⵏⵏⴰ ⴰⵡⴻⵎ: ‘ⵙⵉⴷⵉ, ⴰⵔⴻⴱⴱⵉ ⵏⵡⴻⵎ, ⵉⵡⵛⴰ ⴰⵡⴻⵎ ⴰⵔⵔⴰⵃⴻⵜ ⵓⵛⴰ ⵉⵡⵛⴰ ⴰⵡⴻⵎ ⵜⴰⵎⵎⵓⵔⵜ-ⴰ.

14 ⵜⵉⵎⵖⴰⵔⵉⵏ ⵏⵡⴻⵎ, ⵉⵃⴻⵏⵊⵉⵔⴻⵏ ⵏⵡⴻⵎ ⴷ ⵍⴻⴱⵃⴰⵢⴻⵎ ⵏⵡⴻⵎ ⴰⴷ ⵇⵇⵉⵎⴻⵏ ⴷⵉ ⵜⴻⵎⵎⵓⵔⵜ ⵉ ⴷ ⴰⵡⴻⵎ ⵉⵡⵛⴰ ⵎⵓⵙⴰ ⵅ ⵓⵊⴻⵎⵎⴰⴹ ⵏ ⵍ'ⵓⵔⴷⵓⵏ ⵓⵛⴰ ⴽⴻⵏⵏⵉⵡ ⴰⴷ ⵜⴻⵥⵡⴰⵎ ⵜⵃⴻⵥⵥⵎⴻⵎ ⵥⵥⴰⵜ ⵉ ⵡⵓⴷⴻⵎ ⵏ ⴰⵢⵜⵎⴰⵜⵡⴻⵎ, ⵎⴰⵔⵔⴰ ⴰⵢⵜ ⵏ ⴱⵓ-ⵜⴻⵖⵔⵓⴹⵜ ⵉⵎⴻⵃⴹⴻⵏ, ⵓⵛⴰ ⴽⴻⵏⵏⵉⵡ ⴰⴷ ⴰⵙⴻⵏ ⵜⴻⵡⵛⴻⵎ ⴰⴼⵓⵙ,

15 ⴰⵍ ⵉ ⵖⴰ ⵢⴻⵡⵛ ⵙⵉⴷⵉ ⴰⵔⵔⴰⵃⴻⵜ ⵉ ⴰⵢⵜⵎⴰⵜⵡⴻⵎ, ⴰⵎ ⵜⵓⵖⴰ ⵉⵡⵛⴰ ⵉ ⴽⴻⵏⵏⵉⵡ, ⵓⵛⴰ ⵓⵍⴰ ⴷ ⵏⵉⵜⵏⵉ ⴰⴷ ⵟⵟⴼⴻⵏ ⵜⴰⵎⵎⵓⵔⵜ ⵉ ⴷ ⴰⵙⴻⵏ ⵉⵡⵛⴰ ⵙⵉⴷⵉ, ⴰⵔⴻⴱⴱⵉ ⵏⵡⴻⵎ, ⴷ ⵍⵡⴰⵔⵜ. ⵅⴻⵏⵏⵉ ⴰⴷ ⵉⵄⴻⴷⴷⴻⵍ ⴰⴷ ⴷⴷ-ⵜⴷⴻⵡⵍⴻⵎ ⵖⴰⵔ ⵜⴻⵎⵎⵓⵔⵜ ⵜⴻⵏⵏⵉ ⴷ ⵍⵡⴰⵔⵜ ⵏⵡⴻⵎ ⵓⵛⴰ ⴰⴷ ⵜⵡⴰⵔⵜⴻⵎ ⵎⵉⵏ ⴷ ⴰⵡⴻⵎ ⵉⵡⵛⴰ ⵎⵓⵙⴰ, ⴰⵎⵙⴻⵅⵅⴰⵔ ⵏ ⵙⵉⴷⵉ, ⵅ ⵓⵊⴻⵎⵎⴰⴹ ⵏ ⵍ'ⵓⵔⴷⵓⵏ ⵎⴰⵏⵉⵙ ⴷⴷ-ⵜⵏⴻⵇⵇⴰⵔ ⵜⴼⵓⵛⵜ.”

16 ⵏⵉⵜⵏⵉ ⴰⵔⵔⵉⵏ ⵅ ⵢⴰⵛⵓⵡⴰ, ⵏⵏⴰⵏ: “ⵎⴰⵔⵔⴰ ⵎⵉⵏ ⵅⴻⴼ ⵉ ⴷ ⴰⵏⴻⵖ ⵜⵓⵎⵓⵔⴻⴷ, ⴰⴷ ⵜ ⵏⴻⴳⴳ ⵓ ⵎⴰⵏⵉ ⵎⴰ ⵉ ⴷ ⴰⵏⴻⵖ ⵖⴰ ⵜⴻⵙⵙⴻⴽⴽⴻⴷ, ⴰⴷ ⵏⵓⵢⵓⵔ.

17 ⴰⵎⵎⵓ ⵏⵉⵛⴰⵏ ⴰⵎ ⵎⴰⵎⵎⴻⵛ ⵏⴻⵙⵍⴰ ⵖⴰⵔ ⵎⵓⵙⴰ, ⴰⴷ ⵖⴰⵔⴻⴽ ⵏⵙⴻⵍ. ⵉⵍⵉ ⵡⴰⵀⴰ ⴰⴷ ⴽⵉⴽ ⵢⵉⵍⵉ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⴰⵎ ⵎⴰⵎⵎⴻⵛ ⵜⵓⵖⴰ ⵉⴵⴰ ⴰⴽ-ⴷ ⵎⵓⵙⴰ!

18 ⴽⵓⵍ ⴰⵔⵢⴰⵥ ⵏⵏⵉ ⵉ ⵖⴰ ⵉⵄⵚⴰⵏ ⵍⵓⵎⵓⵔ ⵏⵏⴻⴽ ⵓ ⵡⴰⵔ ⵉⵅⵙ ⴰⴷ ⵉⵙⴻⵍ ⵉ ⵡⴰⵡⴰⵍⴻⵏ ⵏⵏⴻⴽ ⵖⴰⵔ ⵎⴰⵔⵔⴰ ⵎⵉⵏ ⴷ ⴰⵙ ⵖⴰ ⵜⵓⵎⵓⵔⴻⴷ, ⴰⴷ ⵉⵜⵜⵡⴰⵏⴻⵖ. ⵉⵍⵉ ⵡⴰⵀⴰ ⴷ ⴰⵔⵢⴰⵥ ⵓ ⵉⵍⵉ ⵜⵎⴻⵃⴹⴻⴷ!”