1 “ⵎⴰⵍⴰ ⴷⵉⵏ ⵉⵊⵊ ⵏ ⵓⵎⵛⵓⴱⴱⴻⵛ ⵊⴰⵔ ⵉⵔⵢⴰⵥⴻⵏ ⵓⵛⴰ ⵉⵜⵜⵅⴻⵚⵚⴰ ⴰⵙⴻⵏ ⴰⴷ ⵓⵢⵓⵔⴻⵏ ⵖⴰⵔ ⵍⵎⴻⵃⴽⴰⵎⴰ, ⴰⴷ ⵅⴰⵙⴻⵏ ⵃⴻⴽⵎⴻⵏ, ⵅⴻⵏⵏⵉ ⴰⴷ ⴱⴰⵔⵔⵃⴻⵏ ⵅ ⵡⴻⵏⵏⵉ ⵖⴰⵔ ⵉⴵⴰ ⵍⵃⴻⵇⵇ ⵓⵛⴰ ⴰⴷ ⵃⴻⴽⵎⴻⵏ ⵅ ⵓⵎⴻⴷⵏⴰⴱ. ^□   2 ⵎⴰⵍⴰ ⴰⵎⴻⴷⵏⵓⴱ ⵉⵙⵙⴷⴰⵀⴻⴵ ⵜⵉⵢⵢⵉⵜⴰ, ⵅⴻⵏⵏⵉ ⵍⵇⴰⴹⵉ ⴰⴷ ⵢⴻⵊⵊ ⴰⴷ ⵜ ⵖⴻⴹⵍⴻⵏ ⵖⴰⵔ ⵜⴻⵎⵎⵓⵔⵜ ⵓⵛⴰ ⴰⴷ ⵜ ⴼⴰⵔⵛⴻⵏ ⵥⵥⴰⵜ ⵉ ⵡⵓⴷⴻⵎ ⵏⵏⴻⵙ ⴰⵏⴻⵛⵜ ⵉⵜⵜⵓⵔⵙ ⴷⵉ ⵍⴻⵃⵙⴰⴱ ⵏ ⵍⵖⴻⵛⵛ ⵏⵏⴻⵙ. 3 ⵉⵄⴻⴷⴷⴻⵍ ⴰⴷ ⴰⵙ ⵉⵡⵛ ⴰⵔⴻⴱⵄⵉⵏ ⵏ ⵜⴻⵢⵢⵉⵜⴰ, ⵡⴰⵔ ⵖⴰⵔⵙⴻⵏⵜ ⵢⴰⵔⴻⵏⵏⵉ ⵛⴰ, ⵎⵉⵏⵥⵉ ⵎⴰⵍⴰ ⴰⴷ ⵜ ⵉⴼⴰⵔⵛ ⵄⴰⴷ ⴽⵜⴰⵔ ⵙⴻⵏⵏⴻⵊ ⵉ ⵜⵉⵢⵢⵉⵜⴰ-ⵢⴰ, ⴰⵇⴰ ⵓⵎⴰⵛ ⴰⴷ ⴰⵛ ⴷⴷ-ⵉⴱⴰⵏ ⴷ ⴰⵎⴻⵃⴳⵓⵔ ⵊⴰⵔ ⵜⵉⵟⵟⴰⵡⵉⵏ ⵏⵏⴻⴽ. ^■  

4 ⵡⴰⵔ ⵜⴻⴳⴳⴻⴷ ⵜⴰⵛⵎⴰⵏⵜ ⵉ ⵓⴼⵓⵏⴰⵙ ⵅⵎⵉ ⵉⵙⵙⴰⵔⵡⴰⵜ. ^■  

5 ⵅⵎⵉ ⵥⴻⴷⴷⵖⴻⵏ ⵡⴰⵡⵎⴰⵜⴻⵏ ⴰⴽ-ⴷ ⵡⴰⵢⴰⵡⵢⴰ ⵓⵛⴰ ⵉⵎⵎⵓⵜ ⵉⵊⵊ ⵥⵥⴰⵢⵙⴻⵏ, ⵓⵛⴰ ⵡⴰⵔ ⴷⴷ-ⵢⴻⵊⵊⵉ ⴱⵓ ⵎⵎⵉⵙ, ⵅⴻⵏⵏⵉ ⵜⴰⵎⵖⴰⵔⵜ ⵏ ⵓⵎⴻⵜⵜⵉⵏ ⵡⴰⵔ ⵜⵎⴻⴵⴻⵛ ⵛⴰ ⴰⴽ-ⴷ ⵓⴱⴰⵔⵔⴰⵏⵉ. ⴰⴷ ⵅⴰⵙ ⵢⴰⴷⴻⴼ ⵡⴻⵍⵡⴻⵙ ⵓⵛⴰ ⴰⴷ ⵜⵜ ⵉⴳⴳ ⴷ ⵜⴰⵎⵖⴰⵔⵜ ⵏⵏⴻⵙ ⵓⵛⴰ ⴰⴷ ⴰⵙ ⵢⴻⴳⴳ ⵅⴻⵏⵏⵉ ⵍⵡⴰⵊⵉⴱ ⵏ ⵡⴻⵍⵡⴻⵙ. ^□  ■   6 ⵓⵛⴰ ⴰⵎⴻⵏⵥⵓ ⵏⵏⵉ ⵉ ⴷⴷ ⵖⴰ ⵜⴰⵔⵓⵡ, ⴰⴷ ⵉⵅⵍⴻⴼ ⵉⵙⴻⵎ ⵏ ⵓⵎⴰⵙ ⵉⵎⵎⵓⵜⴻⵏ, ⵃⵉⵎⴰ ⵉⵙⴻⵎ ⵏ ⵡⴰ ⵡⴰⵔ ⵉⵎⴻⵃⵃⵉ ⵛⴰ ⵥⵉ ⵉⵙⵔⴰⵉⵍ. 7 ⵎⴰⵛⴰ ⵎⴰⵍⴰ ⴰⵔⵢⴰⵥ ⵡⴰⵔ ⵉⵅⵙ ⴰⴷ ⵉⴽⵙⵉ ⵜⴰⵎⵖⴰⵔⵜ ⵏ ⵓⵎⴰⵙ, ⴰⴷ ⵜⵍⴰⵀ ⵅⴻⵏⵏⵉ ⵜⴻⵎⵖⴰⵔⵜ ⵏ ⵓⵎⴰⵙ ⵖⴰⵔ ⵜⴻⵡⵡⴰⵔⵜ, ⵖⴰⵔ ⵉⵎⵖⴰⵔⴻⵏ, ⴰⴷ ⵜⵉⵏⵉ: ‘ⴰⴹⴻⴳⴳⵯⴰⵍ ⵉⵏⵓ ⵢⵓⴳⵉ ⴰⴷ ⵉⵅⵍⴻⴼ ⵉⵊⵊ ⵏ ⵢⵉⵙⴻⵎ ⵉ ⵓⵎⴰⵙ ⴷⵉ ⵉⵙⵔⴰⵉⵍ, ⵡⴰⵔ ⵉⵅⵙ ⴰⴷ ⵉⴳⴳ ⵍⵡⴰⵊⵉⴱ ⵏ ⵡⴻⵍⵡⴻⵙ.’ ^■   8 ⵅⴻⵏⵏⵉ ⵉⵎⵖⴰⵔⴻⵏ ⵏ ⵜⴻⵏⴷⵉⵏⵜ ⵏⵏⵉ ⴰⴷ ⴰⵙ ⴷⴷ-ⵍⴰⵖⴰⵏ ⵓⵛⴰ ⴰⴷ ⴰⴽⵉⴷⴻⵙ ⵙⵙⵉⵡⵍⴻⵏ. ⵎⴰⵍⴰ ⵏⴻⵜⵜⴰ ⵉⵎⵏⴻⵄ ⴷⴻⴳ ⵡⴰⵡⴰⵍ ⵏⵏⴻⵙ ⵓⵛⴰ ⵉⵏⵏⴰ: ‘ⵡⴰⵔ ⵅⵙⴻⵖ ⵛⴰ ⴰⴷ ⵜⵜ ⴰⵡⵢⴻⵖ!’, 9 ⴰⴷ ⵖⴰⵔⴻⵙ ⴷⴷ-ⵜⵇⴰⵔⵔⴻⴱ ⵅⴻⵏⵏⵉ ⵜⴻⵙⵍⵉⴼⵜ ⵥⵥⴰⵜ ⵉ ⵜⵉⵟⵟⴰⵡⵉⵏ ⵏ ⵉⵎⵖⴰⵔⴻⵏ, ⴰⴷ ⴰⵙ ⵜⴻⴽⴽⴻⵙ ⵜⵙⵉⵍⵉⵜ ⵏⵏⴻⵙ ⵥⴻⴳ ⵓⴹⴰⵔ ⵓⵛⴰ ⴰⴷ ⵅⴰⵙ ⵜⴻⵙⵙⵓⵙⴻⴼ ⵅ ⵓⵖⴻⵎⴱⵓⴱ, ⴰⴷ ⵜⴱⴰⵔⵔⴻⵃ ⴰⴷ ⵜⵉⵏⵉ: ‘ⴰⵎⵎⵓ ⵉ ⵉⵜⵜⵡⴰⴳⴳ ⴷⴻⴳ ⵡⴻⵔⵢⴰⵥ ⵏⵏⵉ ⵡⴰⵔ ⵉⵅⵙⴻⵏ ⴰⴷ ⵉⴱⵏⴰ ⵜⴰⴷⴷⴰⵔⵜ ⵏ ⵓⵎⴰⵙ!’

10 ⵓⵛⴰ ⴰⴷ ⴰⵙ ⵡⵛⴻⵏ ⵉⵙⴻⵎ ⵏⵏⴻⵙ ⴷⵉ ⵉⵙⵔⴰⵉⵍ: ‘ⵜⴰⴷⴷⴰⵔⵜ ⵏ ⵡⴻⵏⵏⵉ ⵓⵎⵉ ⵜᵉⵜⵜⵡⴰⴽⴽⴻⵙ ⵜⵙⵉⵍⵉⵜ.’

11 ⵎⴰⵍⴰ ⴷⵉⵏ ⵉⵔⵢⴰⵥⴻⵏ ⵎⵛⵓⴱⴱⵓⵛⴻⵏ ⵓⵛⴰ ⵜⵔⴻⵃⵃⴻⴳ-ⴷⴷ ⵜⴻⵎⵖⴰⵔⵜ ⵏ ⵛⴰ ⵏ ⵉⵊⵊ ⵃⵉⵎⴰ ⴰⴷ ⵜⴻⵙⵙⴻⵏⵊⴻⵎ ⴰⵔⵢⴰⵥ ⵏⵏⴻⵙ ⵥⴻⴳ ⵓⴼⵓⵙ ⵏ ⵡⵉ ⵜ ⵉⵛⵛⴰⵜⴻⵏ ⵓⵛⴰ ⵏⴻⵜⵜⴰⵜ ⵜⴻⵙⵙⵡⵉⵥⵥⴻⴹ ⴰⴼⵓⵙ ⵏⵏⴻⵙ ⵓⵛⴰ ⵜᵉⵟⵟⴻⴼ ⵉ-ⵜ ⵥⵉ ⵜⴼⵓⵍⵉⵏ ⵏ ⵓⵙⴻⴹⵃⵉ ⵏⵏⴻⵙ,

12 ⴰⴷ ⴰⵙ ⵜⵇⴻⵙⵙⴻⴷ ⵅⴻⵏⵏⵉ ⴰⴼⵓⵙ ⵏⵏⴻⵙ, ⵡⴰⵔ ⴷ ⴰⵎ ⵜⵜⴻⵥⵥⵉⴵⵉⵥ.

13 ⵡⴰⵔ ⵖⴰⵔⴻⴽ ⵉⵜⵜⵉⵍⵉ ⴷⵉ ⵜⵅⴰⵏⵛⴻⵜ ⵏⵏⴻⴽ ⵉⵊⵊ ⵏ ⵡⴻⵥⵔⵓ ⵏ ⵍⴻⵡⵥⴻⵏ ⴷ ⵉⵊⵊ ⵏ ⵡⴻⵥⵔⵓ ⵏⵏⴻⵖⵏⵉ, ⴷ ⴰⵎⴻⵇⵇⵔⴰⵏ ⵓ ⴷ ⴰⵎⴻⵥⵢⴰⵏ.

14 ⵡⴰⵔ ⵖⴰⵔⴻⴽ ⵉⵜⵜⵉⵍⵉ ⴷⵉ ⵜⴰⴷⴷⴰⵔⵜ ⵏⵏⴻⴽ, ⵍⵎⵓⴷ ⵏ ⵉⵊⵊ ⵏ ⵉⴼⴰ ⵓⵍⴰ ⴷ ⵉⵊⵊ ⵏ ⵉⴼⴰ ⵏⵏⴻⵖⵏⵉ, ⴷ ⴰⵎⴻⵇⵇⵔⴰⵏ ⵓ ⴷ ⴰⵎⴻⵥⵢⴰⵏ.

15 ⵉⵊⵊ ⵏ ⵡⴻⵥⵔⵓ ⵏ ⵍⴻⵡⵥⴻⵏ ⵉⵡⴰⵟⴰ ⵓ ⵉⵙⴻⴳⴳⴻⵎ ⴰⴷ ⵖⴰⵔⴻⴽ ⵢⵉⵍⵉ ⵓⵍⴰ ⴷ ⵉⵊ ⵏ ⵍⵎⵓⴷ ⵏ ⵢⵉⵊⵊ ⵏ ⵉⴼⴰ ⵏⵉⵛⴰⵏ ⵓ ⵉⵡⴰⵟⴰ, ⵃⵉⵎⴰ ⵓⵙⵙⴰⵏ ⵏⵏⴻⴽ ⴰⴷ ⵥⵥⵓⴳⴳⴰⵔⵜⴻⵏ ⵅ ⵜⴻⵎⵎⵓⵔⵜ ⵏⵏⵉ ⴷ ⴰⵛ ⵉ ⵖⴰ ⵉⵡⵛ, ⵙⵉⴷⵉ, ⴰⵔⴻⴱⴱⵉ ⵏⵏⴻⴽ.

16 ⵎⵉⵏⵥⵉ ⵎⴰⵔⵔⴰ ⵡⵉ ⵉ ⵖⴰ ⵉⴳⴳⵉⵏ ⵎⴰⵏ ⴰⵢⴰ, ⵎⴰⵔⵔⴰ ⵡⵉ ⵉ ⵖⴰ ⵉⴳⴳⵉⵏ ⵍⵖⴻⵛⵛ, ⴰⵇⴰ ⵏⴻⵜⵜⴰ ⴷ ⵏⵏⵄⵉ ⵖⴰⵔ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ. ^■  

17 ⵉⴷⴰⵔ ⵎⵉⵏ ⵥⵥⴰⵢⴻⴽ ⵉⴳⴳⴰ ⵄⴰⵎⴰⵍⵉⵇ ⴷⴻⴳ ⵡⴻⴱⵔⵉⴷ, ⵓⵎⵉ ⴷⴷ-ⵜⴻⴼⴼⵖⴻⴷ ⵥⵉ ⵎⵉⵚⵔⴰ, ^■  

18 ⵎⴰⵎⵎⴻⵛ ⴷⴷ-ⵉⴼⴼⴻⵖ ⵖⴰⵔ ⵓⵎⵙⴰⴳⴰⵔ ⴰⴽⵉⴷⴻⴽ ⴷⴻⴳ ⵡⴻⴱⵔⵉⴷ ⵓⵛⴰ ⵉⵀⵊⴻⵎ ⵅⴰⴽ ⵥⵉ ⴹⴻⴼⴼⴰⵔ ⵎⴰⵏⵉ ⴵⴰⵏ ⵎⴰⵔⵔⴰ ⵉⵎⴻⴹⵄⴰⴼⴻⵏ, ⵓⵎⵉ ⵛⴻⴽ ⵜⵓⵖⴰ ⵜⵓⵃⵍⴻⴷ, ⵜⴻⴼⵏⵉⴷ ⵓⵛⴰ ⵏⴻⵜⵜⴰ ⵡⴰⵔ ⵉⴳⴳⵯⵉⴷ ⵛⴰ ⴰⵔⴻⴱⴱⵉ.

19 ⴰⴷ ⵉⵎⵙⴰⵔ, ⵅⵎⵉ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⴰⴷ ⵛⴻⴽ ⵉⵙⵙⴰⵔⴻⵢⵢⴻⵃ ⵥⵉ ⵎⴰⵔⵔⴰ ⵍⵄⴻⴷⵢⴰⵏ ⵉ ⴷ ⴰⵛ-ⴷⴷ ⵉⵏⵏⴹⴻⵏ ⴷⵉ ⵜⴻⵎⵎⵓⵔⵜ ⵉ ⴷ ⴰⵛ ⵖⴰ ⵉⵡⵛ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⴷ ⵍⵡⴰⵔⵜ, ⵃⵉⵎⴰ ⴰⴷ ⵜⵜ ⵜⴻⴽⵙⵉⴷ, ⴰⵇⴰ ⴰⴷ ⵜⴻⵎⵃⵉⴷ ⵍⵉⴷⴰⵔⴻⵜ ⵏ ⵄⴰⵎⴰⵍⵉⵇ ⵥⵉ ⵙⴰⴷⵓ ⴰⵊⴻⵏⵏⴰ. ⵡⴰⵔ ⵜ ⵜⵜᵉⵜⵜⵓ!”