1 ⵉⵥⵔⴰ ⴱⴰⵍⵄⴰⵎ ⴱⴻⵍⵍⵉ ⴰⵇⴰ ⵢⴰⵔⴹⴰ ⵉ ⵜⵉⵟⵟⴰⵡⵉⵏ ⵏ ⵙⵉⴷⵉ ⵓⵎⵉ ⵉⴱⴰⵔⴻⴽ ⵉⵙⵔⴰⵉⵍ ⵓⵛⴰ ⵅⴻⵏⵏⵉ ⵡⴰⵔ ⴳⴳⵓⵔ ⴰⴷ ⵢⴰⵔⵥⵓ, ⴰⵎⴻⵛⵏⴰⵡ ⴰⵎⵓⵔ ⴰⵎⴻⵥⵡⴰⵔⵓ ⴷ ⵓⵎⵓⵔ ⵡⵉⵙⵙ ⵜⵏⴰⵢⴻⵏ, ⴷⵉ ⵜⴳⴻⵥⵥⴰⵏⵜ, ⵎⴰⵛⴰ ⵢⴰⵔⵔⴰ ⵓⴷⴻⵎ ⵏⵏⴻⵙ ⵖⴰⵔ ⵍⴻⵅⵍⴰ. 2 ⵓⵎⵉ ⵉⵙⵙⴳⴻⵄⵄⴻⴷ ⵜⴰⵎⵓⵖⵍⵉ ⵏⵏⴻⵙ, ⵉⵥⵔⴰ ⵉⵙⵔⴰⵉⵍ ⵉⵥⴷⴻⵖ ⴷⵉⵏ, ⵄⵍⴰⵃⵙⴰⴱ ⵜⵉⵇⴻⴱⴱⴰⵍ ⵏⵏⴻⵙ, ⵅⴻⵏⵏⵉ ⵢⵓⵙⴰ-ⴷⴷ ⴰⵔⵔⵓⵃ ⵏ ⴰⵔⴻⴱⴱⵉ ⵅⴰⵙ. 3 ⵅⴻⵏⵏⵉ ⵉⴱⴷⴰ ⵏⴻⵜⵜⴰ ⴰⵡⴰⵍ ⵏⵏⴻⵙ ⵉⵡⴻⵥⵏⴻⵏ, ⵉⵏⵏⴰ:

“ⴰⵡⴰⵍ ⵏ ⴱⴰⵍⵄⴰⵎ, ⵎⵎⵉⵙ ⵏ ⴱⴰⵄⵓⵔ,

ⴰⵡⴰⵍ ⵏ ⵡⴻⵔⵢⴰⵥ ⵉⵊⴻⵀⴷⴻⵏ, ⵡⴻⵏⵏⵉ ⵓⵎⵉ ⵜⴻⵇⵇⴻⵏ ⵜⵉⵟⵟ,

4 ⵉⵊⵊ ⵏ ⵡⴰⵡⴰⵍ ⵏ ⵡⴻⵏⵏⵉ ⵉⵙⵍⵉⵏ ⴰⵡⴰⵍⴻⵏ ⵏ ⴰⵔⴻⴱⴱⵉ,

ⴷ ⵡⴻⵏⵏⵉ, ⴰⵎ ⵉⵅⴻⵥⵥⴰⵔ ⵜⴰⵎⴻⵥⵔⵉⵡⵜ ⵏ ⵓⵎⵥⴻⵎⵎⴰⵔ ⵅ ⴽⵓⵍⵛⵉ,

ⵉⵡⴹⴰⵏ ⴰⵎ ⴷ ⴰⵙ ⵜⵜⵡⴰⵔⴻⵥⵎⴻⵏⵜ ⵜⵉⵟⵟⴰⵡⵉⵏ.

5 ⴰ ⵢⴰⵄⵇⵓⴱ, ⵎⴻⵛⵃⴰⵍ ⵚⴻⴱⵃⴻⵏ ⵉⵇⵉⴹⴰⵏ ⵏⵏⴻⴽ

ⴷ ⵜⵥⴻⴷⴷⵉⵖⵉⵏ ⵏⵏⴻⴽ, ⴰ ⵉⵙⵔⴰⵉⵍ!

6 ⴰⵎⴻⵛⵏⴰⵡ ⵜⵉⵖⵥⵓⵔⵉⵏ ⵉⵜⵜⵡⴰⵙⵡⵉⵥⵥⴹⴻⵏ,

ⴰⵎⴻⵛⵏⴰⵡ ⴰⵖⴻⵎⵎⵓⵢ ⵉⵛⴻⵡⵡⴰⵔⴻⵏ ⴰⴽ-ⴷ ⵢⴻⵖⵥⴰⵔ,

ⴰⵎⴻⵛⵏⴰⵡ ⴰⵛⴼⵉⵍ ⵏⵏⵉ ⵉⵥⵥⵓ ⵙⵉⴷⵉ,

ⴰⵎⴻⵛⵏⴰⵡ ⵜⵉⵛⴻⵊⵊⵓⵔⴰ ⵏ ⵜⴻⵏⴳⴻⵍⵜ ⵥⵥⴰⵜ ⵉ ⵡⴰⵎⴰⵏ. ^□  

7 ⵣⴻⴳ ⵉⴱⵓⵇⴰⵍⴻⵏ ⵏⵏⴻⵙ ⴰⴷ ⵙⵙⵉⵥⵥⵍⴻⵏ ⵡⴰⵎⴰⵏ

ⵓⵛⴰ ⵥⵥⴰⵔⵉⵄⴻⵜ ⵏⵏⴻⵙ ⴰⴷ ⵜⵉⵍⵉ ⴷⵉ ⵜⵓⴼⴼⴻⵜ.

ⴰⵊⴻⴵⵉⴷ ⵏⵏⴻⵙ ⴰⴷ ⵉⵜⵜⵡⴰⵙⴳⴻⵄⵄⴻⴷ ⵅ ⴰⵊⴰⵊ

ⵓ ⵜⴰⴳⴻⵍⴷⵉⵜ ⵏⵏⴻⵙ ⴰⴷ ⵜᵉⵜⵜⵡⴰⵙⵓⵄⵍⴰ.

8 ⴰⵔⴻⴱⴱⵉ ⵉⵙⵙⵓⴼⴼⴻⵖ ⵉ-ⵜ-ⵉ-ⴷⴷ ⵥⵉ ⵎⵉⵚⵔⴰ.

ⵊⵊⴻⵀⴷ ⵏⵏⴻⵙ ⴰⵎⴻⵛⵏⴰⵡ ⴰⵛⵛⴰⵡⴻⵏ ⵏ ⵓⴼⵓⵏⴰⵙ ⵏ ⵍⴻⵅⵍⴰ.

ⴰⴷ ⵢⴻⵛⵛ ⵍⴻⴳⵏⵓⵙ, ⵉⵖⵔⵉⵎⴻⵏ ⵏⵏⴻⵙ,

ⴰⴷ ⵉⵍⴱⴻⵥ ⵉⵖⵓⵙⵙⴰⵏ ⵏⵙⴻⵏ

ⵓⵛⴰ ⴰⴷ ⵜⴻⵏ ⵉⵙⵙⵏⵓⵇⵇⴻⴱ ⵙ ⴼⵍⵉⵜⵛⴰⵜ ⵏⵏⴻⵙ. ^■  

9 ⴰⵇⴰ ⵉⵖⵏⴻⵙ,

ⵉⵙⵙⵉⵥⵥⴻⵍ ⵉⵅⴻⴼ ⵏⵏⴻⵙ ⴰⵎⴻⵛⵏⴰⵡ ⴰⵢⵔⴰⴷ, ⴰⵎⴻⵛⵏⴰⵡ ⵜⴰⵢⵔⴰⴷⵜ.

ⵡⵉ ⵜ ⵉ ⴷⴷ ⵖⴰ ⵉⵙⵙⴻⴽⴽⴰⵔⴻⵏ?

ⵡⴻⵏⵏⵉ ⵛⴻⴽ ⵉ ⵖⴰ ⵉⴱⴰⵔⴻⴽ, ⴰⴷ ⵉⵜⵜⵡⴰⴱⴰⵔⴻⴽ

ⵓ ⵡⴻⵏⵏⵉ ⵛⴻⴽ ⵖⴰ ⵉⵏⵄⴻⵍ, ⴰⴷ ⵢⵉⵍⵉ ⵉⵜⵜⵡⴰⵏⵄⴻⵍ!’ ”^■  

10 ⵅⴻⵏⵏⵉ ⵢⴰⵔⵖⴰ ⵓⵅⴻⵢⵢⴻⵇ ⵏ ⴱⴰⵍⴰⴽ ⵅ ⴱⴰⵍⵄⴰⵎ. ⵉⵡⵜⴰ ⵏⴻⵜⵜⴰ ⴷⴻⴳ ⵉⴼⴰⵙⵙⴻⵏ ⵏⵏⴻⵙ ⵓⵛⴰ ⴱⴰⵍⴰⴽ ⵉⵏⵏⴰ ⵉ ⴱⴰⵍⵄⴰⵎ: “ⴰⵇⴰ ⵍⴰⵖⵉⵖ-ⴷⴷ ⵛⴻⴽ ⵎⴰⵃⴻⵏⴷ ⴰⴷ ⵜⵏⴻⵄⵍⴻⴷ ⵍⵄⴻⴷⵢⴰⵏ ⵉⵏⵓ, ⵎⴰⵛⴰ ⵅⵥⴰⵔ, ⴰⵇⴰ ⵜⴱⴰⵔⴽⴻⴷ ⵉ-ⵜⴻⵏ ⵄⴰⴷ ⵏⵉⵛⴰⵏ ⵜⵍⴰⵜⴰ ⵏ ⵉⵎⵓⵔⴻⵏ!

11 ⵅⴻⵏⵏⵉ ⵍⴻⵅⵅⵓ, ⴰⵔⵡⴻⵍ ⵖⴰⵔ ⵡⴻⵎⵛⴰⵏ ⵏⵏⴻⴽ! ⵏⴻⵛⵛ ⵏⵏⵉⵖ ⴰⵛ ⵜ, ⴰⴷ ⵛⴻⴽ ⵛⴻⵏⵏⵄⴻⵖ ⴰⵟⵟⴰⵙ, ⵎⴰⵛⴰ ⵅⵥⴰⵔ, ⵙⵉⴷⵉ ⵉⵎⵏⴻⵄ ⵅⴰⴽ ⵛⵛⴻⵏⵄⴻⵜ ⵏⵏⵉ!”

12 ⵅⴻⵏⵏⵉ ⵉⵏⵏⴰ ⴱⴰⵍⵄⴰⵎ ⵉ ⴱⴰⵍⴰⴽ: “ⵎⴰ ⵡⴰⵔ ⵙⵙⵉⵡⵍⴻⵖ ⴰⴽ-ⴷ ⵉⵔⴻⵇⵇⴰⵙⴻⵏ ⵏⵏⵉ ⴷ ⴰⵢⵉ-ⴷⴷ ⵜⵙⵙⴻⴽⴽⴻⴷ ⵓⵛⴰ ⵏⵏⵉⵖ:

13 ‘ⵡⴰⵅⵅⴰ ⴱⴰⵍⴰⴽ ⴰⴷ ⴰⵢⵉ ⵉⵡⵛ ⵜⴰⴷⴷⴰⵔⵜ ⵏⵏⴻⵙ ⵜⴻⵛⵛⵓⵔ ⵙ ⵏⵏⵓⵇⴰⵔⵜ ⴷ ⵡⵓⵔⴻⵖ, ⵅⴻⵏⵏⵉ ⵏⴻⵛⵛ ⵄⴰⴷ ⵡⴰⵔ ⵥⵎⵉⵔⴻⵖ ⴰⴷ ⵄⴻⴷⴷⵉⵖ ⵅ ⵍⵓⵎⵓⵔ ⵏ ⵙⵉⴷⵉ ⵎⴰⵃⴻⵏⴷ ⴰⴷ ⴳⴳⴻⵖ ⵛⴰ ⵏ ⵍⵃⴰⵊⵊⴻⵜ ⵏ ⵍⵅⴰⵔ ⵏⵉⵖ ⵏ ⵍⵖⴰⵔ ⵉ ⴷⴷ-ⵉⵜⵜⴻⴼⴼⵖⴻⵏ ⵥⴻⴳ ⵡⵓⵍ ⵉⵏⵓ. ⵎⵉⵏ ⵉ ⵖⴰ ⵢⵉⵏⵉ ⵙⵉⴷⵉ, ⴰⴷ ⵜ ⵉⵏⵉⵖ.’ ^■  

14 ⵍⴻⵅⵅⵓ ⵅⴻⵏⵏⵉ, ⵅⵥⴰⵔ, ⵏⴻⵛⵛ ⴰⴷ ⴷⴷ-ⴷⴻⵡⵍⴻⵖ ⵖⴰⵔ ⵍⴳⴻⵏⵙ ⵉⵏⵓ. ⴰⵙ-ⴷⴷ, ⵏⴻⵛⵛ ⴰⴷ ⵛⴻⴽ ⵙⵙⴰⵔⴻⴳⴱⴻⵖ ⵅ ⵍⴻⴼⵀⴰⵎⴻⵜ ⵓⵛⴰ ⴰⴷ ⴰⵛ ⵉⵏⵉⵖ ⵎⵉⵏ ⴷ ⴰⵛ ⵖⴰ ⵢⴻⴳⴳ ⵍⴳⴻⵏⵙ-ⴰ ⴷⴻⴳ ⵓⵏⴻⴳⴳⴰⵔ ⵏ ⵡⵓⵙⵙⴰⵏ.”

15 ⵅⴻⵏⵏⵉ ⵉⴱⴷⴰ ⵏⴻⵜⵜⴰ ⴰⵡⴰⵍ ⵉⵡⴻⵥⵏⴻⵏ ⵏⵏⴻⵙ, ⵉⵏⵏⴰ:

“ⴰⵡⴰⵍ ⵏ ⴱⴰⵍⵄⴰⵎ, ⵎⵎⵉⵙ ⵏ ⴱⴰⵄⵓⵔ,

ⴰⵡⴰⵍ ⵏ ⵡⴻⵔⵢⴰⵥ ⵉⵊⴻⵀⴷⴻⵏ, ⵡⴻⵏⵏⵉ ⵓⵎⵉ ⵜⴻⵇⵇⴻⵏ ⵜⵉⵟⵟ!

16 ⵜⴰⵡⴰⵍⵜ ⵏ ⵡⴻⵏⵏⵉ ⵉⵙⵍⵉⵏ ⴰⵡⴰⵍⴻⵏ ⵏ ⴰⵔⴻⴱⴱⵉ,

ⴷ ⵡⴻⵏⵏⵉ ⵉⵙⵙⵏⴻⵏ ⵥⵉ ⵜⵓⵙⵙⵏⴰ ⵏ ⵡⴻⵏⵏⵉ ⴷ ⴰⵎⵄⵓⴵⵉ ⵅ ⴽⵓⵍⵛⵉ,

ⴷ ⵡⴻⵏⵏⵉ, ⴰⵎ ⵉⵅⴻⵥⵥⴰⵔ ⵜⴰⵎⴻⵥⵔⵉⵡⵜ ⵏ ⵓⵎⵥⴻⵎⵎⴰⵔ ⵅ ⴽⵓⵍⵛⵉ,

ⵉⵡⴹⴰⵏ ⴰⵎ ⴷ ⴰⵙ ⵜⵜⵡⴰⵔⴻⵥⵎⴻⵏⵜ ⵜⵉⵟⵟⴰⵡⵉⵏ.

17 ⴰⴷ ⵜ ⵥⴰⵔⵖ, ⵡⴰⵔ ⵉⴵⵉ ⵍⴻⵅⵅⵓ,

ⴰⴷ ⵜ ⵜⵡⴰⵍⵉⵖ, ⵎⴰⵛⴰ ⵡⴰⵔ ⵉⴵⵉ ⵥⵉ ⵍⴰⴷⴰⵙⴻⵜ.

ⴰⴷ ⴷⴷ-ⵉⴼⴼⴻⵖ ⵉⵜⵔⵉ ⵥⵉ ⵢⴰⵄⵇⵓⴱ

ⵓⵛⴰ ⴰⴷ ⵜⴻⴽⴽⴰⵔ ⵜⴻⵖⵖⴰⵔⵛⵜ ⵏ ⵍⵃⴰⴽⴻⵎ ⵥⵉ ⵉⵙⵔⴰⵉⵍ,

ⵡⴻⵏⵏⵉ ⵉ ⵖⴰ ⵉⵍⴻⴱⵥⴻⵏ ⵉⵖⴻⵥⴷⵉⵙⴻⵏ ⵏ ⵓⵥⴻⴵⵉⴼ ⵏ ⵎⵓ’ⴰⴱ

ⵓⵛⴰ ⴰⴷ ⵉⵍⴱⴻⵥ ⵎⴰⵔⵔⴰ ⵜⴰⵔⵡⴰ ⵏ ⵙⵙⴷⴻⵄ ^■  

18 ⵓⵛⴰ ⴰⴷ ⵉⵜⵜⵡⴰⵟⵟⴻⴼ ⵉⴷⵓⵎ ⴷ ⴰⵔⵀⴰⵏ

ⵓ ⵙⴰⵄⵉⵔⵡⴻⵏⵏⵉ ⴷ ⵍⴻⵄⴷⵓ ⵏⵏⴻⵙ, ⴰⴷ ⵜ ⵟⵟⴼⴻⵏ ⴷ ⵍⵡⴰⵔⵜ,

ⵓⵛⴰ ⴰⵎⵎⵓ ⵉ ⵖⴰ ⵉⴳⴳ ⵉⵙⵔⴰⵉⵍ ⵙ ⵜⴰⵔⵢⴰⵙⵜ.

19 ⵓ ⵡⴻⵏⵏⵉ ⴷ ⵉ ⵖⴰ ⵉⴼⴼⵖⴻⵏ ⵥⵉ ⵢⴰⵄⵇⵓⴱ ⴳⴳⵓⵔ ⴰⴷ ⵉⵃⴽⴻⵎ

ⵓ ⵏⴻⵜⵜⴰ ⴰⴷ ⵉⵙⵙⵀⴻⵍⵍⴻⴽ ⵉⵏⵏⵉ ⵉⵜⵜⵡⴰⵙⵏⴻⵊⵎⴻⵏ ⵥⵉ ⵜⴻⵏⴷⵉⵏⵜ.” ^■  

20 ⵓⵎⵉ ⵏⴻⵜⵜⴰ ⵉⵥⵔⴰ ⵄⴰⵎⴰⵍⵉⵇ, ⵉⴱⴷⴰ ⴰⵡⴰⵍ ⵉⵡⴻⵥⵏⴻⵏ ⵏⵏⴻⵙ, ⵉⵏⵏⴰ:

“ⵄⴰⵎⴰⵍⵉⵇ ⴷ ⴰⵎⴻⵥⵡⴰⵔⵓ ⵏ ⵍⴻⴳⵏⵓⵙ,

ⵎⴰⵛⴰ ⴰⵏⴻⴳⴳⴰⵔⵓ ⵏⵏⴻⵙ ⴰⴷ ⵉⴷⵡⴻⵍ ⴷ ⴰⵀⴻⵍⵍⴻⴽ!”

21 ⵍⴰⵎⵉ ⵉⵥⵔⴰ ⵉⵇⵉⵏⵉⵢⵢⴻⵏ, ⵉⴱⴷⴰ ⵏⴻⵜⵜⴰ ⴰⵡⴰⵍ ⵉⵡⴻⵥⵏⴻⵏ ⵏⵏⴻⵙ, ⵉⵏⵏⴰ:

“ⵜⴰⵥⴻⴷⴷⵉⵖⵜ ⵏⵏⴻⴽ ⵜⴻⵎⵜⴻⵏ

ⵓⵛⴰ ⵜⴻⴳⴳⵉⴷ ⵍⵄⵓⵛⵛ ⵏⵏⴻⴽ ⴷⵉ ⵜⴻⵚⴹⴰⵔⵜ.

22 ⵄⴰⴷ ⵇⴰⵢⵉⵏ ⴰⴷ ⵉⵜⵜⵡⴰⴽⴻⵜⵜⴻⴼ.

ⴰⵍ ⵎⴻⵍⵎⵉ ⵉⵥⴻⵎⵎⴰⵔ ⴰⴷ ⴰⵛ ⴷⴷ-ⵢⴰⵡⵉ ⴰⵛⵛⵓⵔ ⴷ ⴰⵎⴻⵃⴱⵓⵙ?”

23 ⵓⵛⴰ ⵉⴱⴷⴰ ⵏⴻⵜⵜⴰ ⴰⵡⴰⵍ ⵉⵡⴻⵥⵏⴻⵏ ⵏⵏⴻⵙ, ⵉⵏⵏⴰ:

“ⴰⵢ, ⵡⵉ ⵉ ⵖⴰ ⵉⵇⵇⵉⵎⴻⵏ ⵉⴷⴷⴰⵔⴻⵏ ⵅⵎⵉ ⵉ ⵖⴰ ⵢⴻⴳⴳ ⴰⵔⴻⴱⴱⵉ ⴰⵢⴰ?

24 ⵉⵖⴰⵔⵔⵓⴱⴰ ⵥⵉ ⵊⵊⵡⴰⵢⴻⵀ ⵏ ⴽⵉⵜⵜⵉⵎ ⴰⴷ ⵖⴻⵥⵥⴰⵏ ⴰⵛⵛⵓⵔ

ⵓⵛⴰ ⴰⴷ ⵖⴻⵥⵥⴰⵏ ⵄⴰⵡⴻⴷ ⵅ ⵄⴰⴱⵉⵔ

ⵓ ⵏⴻⵜⵜⴰ ⴰⴷ ⵉⵜⵜⵡⴰⵜⴻⵃⵃⴰ.” ^□  

25 ⵉⴽⴽⴰⵔ ⴱⴰⵍⵄⴰⵎ ⵓⵛⴰ ⵢⵓⵢⵓⵔ ⵓⵛⴰ ⵉⴷⵡⴻⵍ ⵖⴰⵔ ⵡⴻⵎⵛⴰⵏ ⵏⵏⴻⵙ ⵏ ⵜⵥⴻⴷⴷⵉⵖⵜ. ⵓⵍⴰ ⴷ ⴱⴰⵍⴰⴽ ⵉⵟⵟⴻⴼ ⴰⴱⵔⵉⴷ ⵏⵏⴻⵙ.