1 ⵉⵍⴰⵖⴰ ⵉ ⵎⵓⵙⴰ ⵓⵛⴰ ⵉⵙⵙⵉⵡⴻⵍ ⵙⵉⴷⵉ ⴰⴽⵉⴷⴻⵙ ⵥⴻⴳ ⵓⵇⵉⴹⵓⵏ ⵏ ⵓⵎⵙⴰⴳⴰⵔ, ⵉⵏⵏⴰ:

2 “ⵙⵉⵡⴻⵍ ⴰⴽ-ⴷ ⴰⵢⵜ ⵏ ⵉⵙⵔⴰⵉⵍ ⵓⵛⴰ ⵉⵏⵉ ⴰⵙⴻⵏ:

‘ⵎⴰⵍⴰ ⵃⴻⴷ ⵥⵥⴰⵢⵡⴻⵎ ⵉⵙⵙⵇⴰⵔⵔⴻⴱ ⵜⴰⵡⵀⵉⴱⵜ ⵉ ⵙⵉⴷⵉ, ⵅⴻⵏⵏⵉ ⴰⴷ ⵜⴻⵙⵙⵇⴰⵔⵔⴱⴻⵎ ⵜⴰⵡⵀⵉⴱⵜ ⵏⵡⴻⵎ ⵥⵉ ⵍⴻⴱⵀⴰⵢⴻⵎ, ⵥⴻⴳ ⵉⴼⵓⵏⴰⵙⴻⵏ ⴷ ⵜⴼⵓⵏⴰⵙⵉⵏ ⵏⵉⵖ ⵥⴻⴳ ⵡⵓⴵⵉ. ^□  

3 ⵎⴰⵍⴰ ⵜⴰⵡⵀⵉⴱⵜ ⵏⵏⴻⵙ ⴷ ⵜⴰⵖⴰⵔⵚⵜ ⵏ ⵡⴻⵛⵎⴰⴹ ⵥⴻⴳ ⵉⴼⵓⵏⴰⵙⴻⵏ ⴷ ⵜⴼⵓⵏⴰⵙⵉⵏ, ⵅⴻⵏⵏⵉ ⴰⴷ ⴷⴷ-ⵉⵙⵙⵇⴰⵔⵔⴻⴱ ⵉⵊⵊ ⵏ ⵓⵡⵜⴻⵎ ⵉⵛⵏⴰⵏ ⵇⴰⵄ. ⴰⴷ ⵜ ⵉⵙⵙⵇⴰⵔⵔⴻⴱ ⵖⴰⵔ ⵡⴰⴷⴰⴼ ⵏ ⵓⵇⵉⴹⵓⵏ ⵏ ⵓⵎⵙⴰⴳⴰⵔ ⵎⴰⵃⴻⵏⴷ ⵢⵉⵍⵉ ⵉ ⴰⵔⴹⴰ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ. ^■   4 ⴰⴷ ⵢⴻⴳⴳ ⴰⴼⵓⵙ ⵏⵏⴻⵙ ⵅ ⵓⵥⴻⴵⵉⴼ ⵏ ⵜⵖⴰⵔⵚⵜ ⵏ ⵡⴻⵛⵎⴰⴹ ⵓⵛⴰ ⴰⵎⵎⵓ ⵉ ⵖⴰ ⵜᵉⵜⵜⵡⴰⵇⴱⴻⵍ ⵜⵖⴰⵔⵚⵜ ⴷⵉ ⵟⵟⵡⴻⵄ ⵏⵏⴻⵙ ⵎⴰⵃⴻⵏⴷ ⴰⴷ ⵅⴰⵙ ⵜⴻⴼⴷⵉ. 5 ⴰⴷ ⵉⵖⴰⵔⵚ ⵉ ⵓⵎⴻⵥⵢⴰⵏ ⵏ ⵓⴼⵓⵏⴰⵙ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ ⵓⵛⴰ ⵉⵃⴻⵏⵊⵉⵔⴻⵏ ⵏ ⵀⴰⵔⵓⵏ, ⵉⴽⴻⵀⵀⴰⵏⴻⵏ, ⴰⴷ ⴷⴷ-ⵙⵙⵇⴰⵔⵔⴱⴻⵏ ⵉⴷⴰⵎⵎⴻⵏ, ⴰⴷ ⵥⴻⴵⵄⴻⵏ ⵉⴷⴰⵎⵎⴻⵏ ⵖⴰⵔ ⵎⴰⵔⵔⴰ ⵉⵖⴻⵥⴷⵉⵙⴻⵏ ⵅ ⵓⵄⴰⵍⵟⴰⵔ ⵏⵏⵉ ⵉⴵⴰⵏ ⵖⴰⵔ ⵡⴰⴷⴰⴼ ⵏ ⵓⵇⵉⴹⵓⵏ ⵏ ⵓⵎⵙⴰⴳⴰⵔ. 6 ⴰⴷ ⵉⴽⴽⴻⵙ ⵜⵉⵍⵎⴻⵛⵜ ⵏ ⵜⵖⴰⵔⵚⵜ ⵏ ⵡⴻⵛⵎⴰⴹ ⵓⵛⴰ ⴰⴷ ⵉⵇⴹⴻⵄ ⴰⴼⵓⵏⴰⵙ ⴷ ⵉⵛⴻⴵⵉⵇⴻⵏ. 7 ⵜⴰⵔⵡⴰ ⵏ ⴰⴽⴻⵀⵀⴰⵏ ⵀⴰⵔⵓⵏ ⴰⴷ ⵙⵙⴰⵔⵖⴻⵏ ⵜⵉⵎⴻⵙⵙⵉ ⵅ ⵓⵄⴰⵍⵟⴰⵔ ⵓⵛⴰ ⴰⴷ ⵙⴻⵜⵜⴼⴻⵏ ⴰⴽⴻⵛⵛⵓⴹ ⵅ ⵜⵎⴻⵙⵙⵉ. 8 ⵜⴰⵔⵡⴰ ⵏ ⵀⴰⵔⵓⵏ, ⵉⴽⴻⵀⵀⴰⵏⴻⵏ, ⴰⴷ ⵙⴻⵜⵜⴼⴻⵏ ⵉⵛⴻⴵⵉⵇⴻⵏ ⴷ ⵓⵥⴻⴵⵉⴼ ⴷ ⵜⴷⵓⵏⵜ ⵅ ⵓⴽⴻⵛⵛⵓⴹ ⵏⵏⵉ ⵉⴵⴰⵏ ⵅ ⵜⵎⴻⵙⵙⵉ ⵉ ⵉⴵⴰⵏ ⵅ ⵓⵄⴰⵍⵟⴰⵔ. 9 ⵏⴻⵜⵜⴰ ⴰⴷ ⵉⵙⵙⵉⵔⴷ ⴰⴷⴰⵏ ⵏⵏⴻⵙ ⴷ ⵉⴹⴰⵔⴻⵏ ⵏⵏⴻⵙ ⵙ ⵡⴰⵎⴰⵏ. ⴰⴽⴻⵀⵀⴰⵏ ⴰⴷ ⵉⵙⵙⴱⴻⵅⵅⴰⵔ ⵎⴰⵏ ⴰⵢⴰ ⵎⴰⵔⵔⴰ ⵅ ⵓⵄⴰⵍⵟⴰⵔ, ⴷ ⵜⴰⵖⴰⵔⵚⵜ ⵏ ⵡⴻⵛⵎⴰⴹ, ⴷ ⵜⴰⵡⵀⵉⴱⵜ ⵏ ⵜⵎⴻⵙⵙⵉ, ⴷ ⵉⵛⵜ ⵏ ⵍⴻⴼⵡⴰⵃⴻⵜ ⵉⵜⵜⴼⵓⵃⴻⵏ ⵉ ⵙⵉⴷⵉ.

10 ⵎⴰⵍⴰ ⵜⴰⵡⵀⵉⴱⵜ ⵏⵏⴻⵙ ⴷ ⵜⴰⵖⴰⵔⵚⵜ ⵏ ⵡⴻⵛⵎⴰⴹ ⵥⴻⴳ ⵡⵓⴵⵉ, ⵥⴻⴳ ⵉⵃⵓⵍⵉⵢⵢⴻⵏ ⵏⵉⵖ ⵥⴻⴳ ⵉⵖⴰⵢⴹⴻⵏ, ⵅⴻⵏⵏⵉ ⵉⵜⵜⵅⴻⵚⵚⴰ ⴰⴷ ⴷⴷ-ⵉⵙⵙⵇⴰⵔⵔⴻⴱ ⴰⵡⵜⴻⵎ ⵉⵛⵏⴰⵏ ⵇⴰⵄ.

11 ⴰⴷ ⴰⵙ ⵉⵖⴰⵔⵚ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ ⵖⴰⵔ ⵓⵖⴻⵥⴷⵉⵙ ⵏ ⵛⵛⴰⵎⴰⵍ ⵏ ⵓⵄⴰⵍⵟⴰⵔ ⵓⵛⴰ ⵉⵃⴻⵏⵊⵉⵔⴻⵏ ⵏ ⵀⴰⵔⵓⵏ, ⵉⴽⴻⵀⵀⴰⵏⴻⵏ, ⴰⴷ ⵥⴻⴵⵄⴻⵏ ⵉⴷⴰⵎⵎⴻⵏ ⵏⵏⴻⵙ ⵅ ⵓⵄⴰⵍⵟⴰⵔ ⵖⴰⵔ ⵎⴰⵔⵔⴰ ⵉⵖⴻⵥⴷⵉⵙⴻⵏ ⵏⵏⴻⵙ.

12 ⴰⴷ ⵜ ⵉⴱⴹⴰ ⴷ ⵉⵛⴻⴵⵉⵇⴻⵏ, ⴰⴽ-ⴷ ⴰⵥⴻⴵⵉⴼ ⵏⵏⴻⵙ ⴷ ⵜⴷⵓⵏⵜ ⵏⵏⴻⵙ, ⵓⵛⴰ ⴰⴽⴻⵀⵀⴰⵏ ⴰⴷ ⵜⴻⵏ ⵉⵙⴻⵜⵜⴻⴼ ⵅ ⵓⴽⴻⵛⵛⵓⴹ ⵏⵏⵉ ⵉⴵⴰⵏ ⵅ ⵜⵎⴻⵙⵙⵉ ⵉ ⵉⴵⴰⵏ ⵅ ⵓⵄⴰⵍⵟⴰⵔ.

13 ⴰⴷ ⵉⵙⵙⵉⵔⴷ ⴰⴷⴰⵏ ⵏⵏⴻⵙ ⴷ ⵉⵛⴻⴽⵔⴰⴷⴻⵏ ⵏⵏⴻⵙ ⵙ ⵡⴰⵎⴰⵏ. ⴰⴽⴻⵀⵀⴰⵏ ⴰⴷ ⵉⵙⵙⵇⴰⵔⵔⴻⴱ ⵎⴰⵏ ⴰⵢⴰ ⵎⴰⵔⵔⴰ ⵓ ⴰⴷ ⵜ ⵉⵙⵙⴱⴻⵅⵅⴰⵔ ⵅ ⵓⵄⴰⵍⵟⴰⵔ. ⴰⵇⴰ ⴷ ⵉⵛⵜ ⵏ ⵜⵖⴰⵔⵚⵜ ⵏ ⵡⴻⵛⵎⴰⴹ, ⵉⵛⵜ ⵏ ⵜⴻⵡⵀⵉⴱⵜ ⵏ ⵜⵎⴻⵙⵙⵉ, ⵉⵛⵜ ⵏ ⵍⴻⴼⵡⴰⵃⴻⵜ ⵉⵜⵜⴼⵓⵃⴻⵏ ⵉ ⵙⵉⴷⵉ.

14 ⵎⴰⵍⴰ ⵜⴰⵡⵀⵉⴱⵜ ⵏⵏⴻⵙ ⴷ ⵜⴰⵖⴰⵔⵚⵜ ⵏ ⵡⴻⵛⵎⴰⴹ ⵥⴻⴳ ⵉⵊⴹⴰⴹ ⵉ ⵙⵉⴷⵉ, ⵅⴻⵏⵏⵉ ⴰⴷ ⴷⴷ-ⵉⵙⵙⵇⴰⵔⵔⴻⴱ ⵜⴰⵡⵀⵉⴱⵜ ⵏⵏⴻⵙ ⵥⵉ ⵜⴻⵊⵍⵉⵍⵍⵉⵃⵉⵏ ⵏⵉⵖ ⵥⴻⴳ ⵉⴷⴱⵉⵔⴻⵏ ⵉⵎⴻⵥⵢⴰⵏⴻⵏ.

15 ⴰⴽⴻⵀⵀⴰⵏ ⴰⴷ ⵜ ⵢⴰⵡⵉ ⵖⴰⵔ ⵓⵄⴰⵍⵟⴰⵔ, ⴰⴷ ⴰⵙ ⵉⴽⴽⴻⵙ ⴰⵥⴻⴵⵉⴼ ⵓⵛⴰ ⴰⴷ ⵜ ⵉⵙⵙⴱⴻⵅⵅⴰⵔ ⵅ ⵓⵄⴰⵍⵟⴰⵔ. ⴰⴷ ⵉⵥⴻⵎⵎ ⵉⴷⴰⵎⵎⴻⵏ ⵏⵏⴻⵙ ⵅ ⵓⵖⴻⵥⴷⵉⵙ ⵏ ⵓⵄⴰⵍⵟⴰⵔ

16 ⵓⵛⴰ ⴰⴷ ⴰⵙ ⵉⴽⴽⴻⵙ ⴰⵙⴻⵢⵔⵓ ⴰⴽ-ⴷ ⵎⵉⵏ ⴷⴰⵢⴻⵙ ⵉⵇⵇⵉⵎⴻⵏ ⵓ ⴰⴷ ⵉⵏⴹⴰⵔ ⴰⵢⴰ ⵥⵥⴰⵜ ⵉ ⵓⵄⴰⵍⵟⴰⵔ ⵖⴰⵔ ⵓⵖⴻⵥⴷⵉⵙ ⵏ ⵛⵛⴰⵔⵇ ⵅ ⵡⴻⵎⵛⴰⵏ ⵏ ⵉⵖⵖⴻⴹ.

17 ⴰⴷ ⵜ ⵉⵊⴱⴻⴷ ⵥⴻⴳ ⵡⴻⴼⵔⵉⵡⴻⵏ, ⵎⴰⵛⴰ ⵡⴰⵔ ⵜ ⵉⴱⴻⵟⵟⵉ ⵛⴰ, ⵓⵛⴰ ⴰⴽⴻⵀⵀⴰⵏ ⴰⴷ ⵜ ⵉⵙⵙⴱⴻⵅⵅⴰⵔ ⵅ ⵓⵄⴰⵍⵟⴰⵔ, ⵅ ⵓⴽⴻⵛⵛⵓⴹ ⵏⵏⵉ ⵉⴵⴰⵏ ⵅ ⵜⵎⴻⵙⵙⵉ, ⴷ ⵜⴰⵖⴰⵔⵚⵜ ⵏ ⵡⴻⵛⵎⴰⴹ, ⴷ ⵜⴰⵡⵀⵉⴱⵜ ⵏ ⵜⵎⴻⵙⵙⵉ, ⴷ ⵍⴻⴼⵡⴰⵃⴻⵜ ⵉⵜⵜⴼⵓⵃⴻⵏ ⵉ ⵙⵉⴷⵉ.’ ”