1 Awarni as ẓriɣ ijj n ujenna n jdid d ijj n temmurt n jdid, maɣar ajenna amezwaru d temmurt tamezwarut tuɣa ɛdun, řebḥar war iqqim ɛad. ^■   2 Necc ẓriɣ tandint iqeddsen, Urcalim n jdid, tehwa-dd zeg ujenna zi arendad AREBBI, tegga amecnaw tasřit izehhjen i wesři. ^■   3 Uca sřiɣ ict n tmijja tᵉttřaɣa-dd zeg ujenna s jjehd:

“Xẓar, Aqiḍun n AREBBI aqa-tt jar iwdan,

uca Netta ad ɣarsen izdeɣ.

Nitni ad iřin d řgens nnes,

uca AREBBI simant nnes ad ɣarsen yiři,

uca ad yiři d AREBBI nsen. ^■  

4 Ad asen issiẓeɣ kuř imeṭṭa zi tiṭṭawin nsen,

uca řmewt d wecḍan d ucetci d řeḥriq,

war ttiřin ɛad, s ssibbet nnes.” ^■  

5 U xmi ggureɣ, inna wenni iqqimen x řɛarc:

“Xẓar, ad ggeɣ marra d jdid !”

Uca inna ayi:

“Ari: Awařen-a aqa daysen řaman d tidett.” ^■  

6 Netta inna ayi:

“Aqa ittwakemmeř.

Necc d Alif d Taw,

Necc d Beddu d Akemmeř.

Wenni iffuden ad as wceɣ ad isu baṭeř,

zi řɛunṣar n Waman n Tudart. ^■  

7 Wi i ɣa iɣellben ad iwart man aya,

uca Necc ad iřiɣ d AREBBI nnes,

u netta ad yiři d mmi. ^■  

8 Maca inni ittcekkan, d lkuffar, d iɛeffanen,

d imexmaj, d iqettařen, d yenni iggin taseḥḥart,

d ayt n farq-ccɣeř d yenni iɛebbden l’aṣnam

d marra ayt n bu-ixarriqen,

ad tiři tesɣart nsen deg uyeřmam ittcefcufen

s tmessi d řecbareyyet,

ta d řmewt wiss tnayen.” ^■  

9 Uca yusa-dd ijjen zi sebɛa n lmalakat tinni ɣarsent sebɛa n ṭṭawyat ccurent s sebɛa n jjrayeḥ tineggura, uca issiweř akidi, inna:

“As-dd, ad ac ssecneɣ Tasřit, Tamɣart n Yezmar.” ^■  

10 Indeh ayi di Arruḥ ɣar ijj n wedrar d ameqqran yuɛřan aṭṭas uca isscen ayi tandint iqeddsen, Urcalim, am dd-tehwa zeg ujenna, zi zzat n AREBBI, ^■  

11 am ɣares iǧa uɛuǧi n AREBBI, uca ṭṭya nnes tᵉttissiq amecnaw aẓru iɣřan aṭṭas, am weẓru n yaspis nni dd-iḍharen am ukristal.

12 Iquwwar as dd ijj n weɣbar d ameqqran yuɛřa ɣares tenɛac n tewwura u tenɛac n lmalakat tuɣa ttbeddant ɣar tiwwura, u ttwarin xasent ismawen, aqa ismawen n tenɛac n tqebbař n ayt n Israil.

13 Aqa din třata n tewwura ɣar manis d tneqqar tfuct u ɣar ccamal třata n tewwura u ɣar ljanub třata n tewwura u aqa din třata n tewwura ɣar mani tɣeǧi tfuct.

14 Aɣbar n tendint ibedd x tenɛac n dsusa ttwarin xasen tenɛac n ismawen n rrusul n Tmemmit. ^□  ■  

15 D wenni tuɣa akidi issawařen, ɣares ijj n uɣanim n řeɛbar ḥima ad zzayes iɛbar tandint d weɣbar nnes. ^■  

16 Tandint tuɣa ɣares arebɛa n tɣemmura u tazuggart nnes am tiru nnes. Netta iɛbar tandint s uɣanim nnes n řeɛbar. Tuɣa tazuggart nnes tenɛac-ařef n ‘istadiyyen’, ɛřaḥař ařfayen u mitayen kilumitr. Tiru nnes d řuɛřa nnes d icten.

17 Iɛbar aɣbar nnes: mya u-arebɛa u-arebɛin n iɣaǧen, aqa-t d řqedd n ijj n bnadem, aqa-t n lmalak.

18 Aɣbar nnes ggin t s yaspis, u tandint ggint s ureɣ iṣfan, ittban am zzaj iṣfan.

19 Dsusa n weɣbar n tendint tuɣa ttwazewwqen kuřci s iẓra iɣřan. Tuɣa dsas amezwaru n weẓru n yaspis, wenni wiss tnayen n ṣaffir, wenni wiss třata n xalcidun d acemřař, wenni wiss arebɛa n smiralda, 20 wenni d wiss xemsa n sarduniks, wenni wiss setta n sardiyus, wenni wiss sebɛa n weẓru n wureɣ qqaren as ‘krisulit’, wenni wiss tmenya n biril, wenni wiss tesɛa n tupas, wenni wiss ɛecra n krisupras, wenni wiss ḥiṭac n yazint uca wenni wiss tenɛac n umetist. ^□   21 Tenɛac n tewwura d tenɛac n tyaqutin, ict ict. Kuř icten zi tewwura nni tuɣa zeg ict n tyaqut. Maca abrid n tendint tuɣa-t n wureɣ iṣfan, am zzaj iṣfan.

22 War ẓriɣ ca Zzawect dayes minzi SIDI AREBBI, Amzemmar x kuřci, Netta simant nnes d Zzawect nnes. 23 Izmar d tendint war ḥdajen ca tfuct uřa d taziri ḥima ad xas ssarɣent, minzi aɛuǧi n AREBBI yareqq dayes uca Izmar d Řefnar nnes. ^■   24 Uca řegnus ad uyuren s tfawt nnes uca ijeǧiden n temmurt ad ɣares ssidfen aɛuǧi. ^■   25 Tiwwura nnes war ttwaqqnent ɛemmarṣ s uziř, minzi ǧiřet war tᵉttɣimi ca din. ^■   26 Nitni ad awyen aɛuǧi d ccan n řegnus. 27 Ɛemmarṣ ad dayes tadef ca n řḥajjet tamengust niɣ wenni iggin nnɛawat niɣ wenni issxarriqen, maca inni ittwarin deg Wedlis n Yezmar waha. ^■