1 Yahuda, amsexxar n Yeccu Lmasiḥ, d umas n Yaɛqub, i yenni ittwařaɣan zi řegnus, inni ittwaɛizzen zi AREBBI, Tababat, u inni ittwaḥḍan di Yeccu Lmasiḥ. 2 Iři ad ɣarwem temmarni arreḥmet d řehna d tayri.

3 A imɛizzen, umi ceṭṭareɣ maḥend ad awem dd-ariɣ x usenjem nneɣ imunen, aqa ufiɣ belli ittxeṣṣa ayi ad awem dd-ariɣ s uziyyar ḥima ad temmenɣem s jjehd x l’iman i immewcen ict n twařa i imqeddasen. 4 Minzi ca n iwdan xtuttřen ɣar daxeř, inni tuɣa ittwazemmen i řḥukm-a qbeř, aqa nitni d lkuffar, inni ibeddřen arḍa n AREBBI nneɣ deg ufucceḥ, uca nekkaren ayenni n Sidi AREBBI d Siditneɣ, Yeccu Lmasiḥ. ^■  

5 Maca xseɣ ad kenniw ssɛeqřeɣ, aqa kenniw tessnem man aya mliḥ, belli AREBBI, umi ifekk řgens zi temmurt n Miṣra, tuɣa ihellek awarni man aya inni war yuminen ca. ^■   6 Uca lmalakat nni war ḥḍint aweqqar nsen amezwaru, maca jjint tazeddiɣt nsen, aqa Netta iḥḍa xasen s ssnaseř war ittwiřin sadu taǧest i řḥukm n wass ameqqran, ^■   7 am mammec Sadum d Ɛamurra d tneddam i d as dd-innḍen, mani ggin nitni farq-ccɣeř amecnaw min ggint tina s tnayen u ḍfarent arrimat nneɣni, aqa ttwammarsent d imedya n tmessi ittduman am ttwaḥekment ɣar ccreɛ. ^■  

8 Amenni ɛawed i imsar i yenni itthadfen di tirja: nitni ssexmajen arrimet, war qebbřen ṣṣulṭa uca ttceqqafen di min iǧan d Aɛuǧi.

9 Maca Mixayil, azeǧif n lmalakat, řami tuɣa ittemcubbec ak-d ibřis x arrimet n Musa, war xas iḥkim s ijj n řḥukm ittceqqafen, maca inna: “SIDI ad cek ixeǧeṣ!” ^■  

10 Maca ina ttceqqafen di marra min war ssinen, uca s tmesřayin i ɣar ttwajebbden nitni amecnaw imuddaren ignawen ɛlaḥsab ṭṭbiɛet nsen, aqa ttwaɣeccen zzaysent. ^□  ■  

11 Uct xasen, minzi nitni uyuren abrid n Qayin, ḍfaren aɣekkwi n Balɛam di ṭweɛ n řmunet, u ttwahelken deg uɣewweɣ n Kurax. ^■  

12 Ina d inni issfeṭṭaḥen ixef nsen deg uraren nsen, war ttseḍḥin ca ad ɣebban. aqa aten d iseynuten břa anẓar, ttwaɛarrnen zi ssa ɣar diha s usemmiḍ, aqa aten d ticejjura nni di iǧa řɣiǧet nsent tweddar, war tticent řɣiǧet, mmutent wiss martayen uca ttwaqeřɛent x iẓewran nsent. ^■  

13 Nitni d řemwaj n řebḥar ihajen, inni issusufen ikuffan n řefḍiḥet nsen, aqa aten d itran weddaren inni umi tᵉttwasewjed tubbarcent n taǧest i řebda. ^■  

14 Maca Ḥanux, wenni d wiss sebɛa zi Adam, inebba xasen, inna: “Xzar, SIDI ad dd-yas ak-d řuřuf n řuřuf n imqeddasen nnes, ^■  

15 ḥima ad igg řḥukm nnes x marra, ḥima ad isseqneɛ marra lkuffar nni iǧan jar asen x řexdayem n lkufr nsen, tinni iggin di lkufr nsen, u x wawařen iqesḥen i zi ceqqfen imednab ikfaren.” ^■  

16 Ina ttɛekkasen, ttcetcan x kuř ddab n ssibbet, am gguren ɣar nnecwat nsen, aqemmum nsen issawař s tmesřayin tiɛeffanin ař ṭṭarf, tteggen tiqedduḥin i ca n iwdan i tizi nsen. ^■  

17 Maca kenniw, a imɛizzen inu, ɛeqřem awařen i izzar ssiwřen zzaysen rrusul n Siditneɣ Yeccu Lmasiḥ, ^□  

18 inni d awem innan, aqa deg uneggar n ikuden ad din iřin imestehezayyen, inni i ɣa yuyuren ɛlaḥsab nnecwet n řeqjaḥet nsen. ^■  

19 Aqa d yina d inni ifarrzen ixef nsen am iwdan iḍeffaren ṭṭbiɛet n yixef nsen, minzi war ɣarsen bu Arruḥ.

20 Maca kenniw, a imɛizzen inu, ttwabnam ɛawed di l’iman nwem iqeddsen, am teẓẓaǧam di Arruḥ Iqeddsen. 21 Ejj aneɣ ad neḥḍa ixef nneɣ di tayri n AREBBI am nᵉttraja arreḥmet n Siditneɣ Yeccu Lmasiḥ i Tudart nneɣ ittduman. 22 Qeřɛem ca zzaysen zi tmessi. 23 uca, mařa tuben nitni, seccnem asen arreḥmet s tiggʷudi, am tᵉttɛiffid zi tcamir i ittwasxemjen zeg weysum.

24 Maca i Netta, wenni izemmaren ad aneɣ iḥḍa břa ddenb niɣ řexmej u ad aneɣ yejj ad nbedd nican břa řɛib, 25 - aqa Netta d AREBBI weḥḥdes, Amsenjem nneɣ - , i Netta, am nbedd zzat i uɛuǧi nnes s řefraḥet, ad ɣares yiři usemɣar d ṣṣulṭa d ccan d lɛaḍama, am řexxu am ssa ɣar zzat i řebda qaɛ. Amin. ^■