1 Asargab n Yeccu Lmasiḥ i d as iwca AREBBI, ḥima ad isscen i imsexxaren nnes min ittxeṣṣa ad imsar deɣya, uca issargeb i-t, am t issekk s ufus n lmalak nnes, i umsexxar nnes Yuḥanna. 2 Wanita iched x Wawař n AREBBI u zi cchadet n Yeccu Lmasiḥ u zi marra min iẓra, 3 Sseɛd n wenni iqqaren d yenni ittesřan awařen n nubbuwa u qqimen tᵉṭṭfen di min dayes ittwarin. Aqa řweqt tiweḍ-dd. ^■  

4 Yuḥanna, i sebɛa n tmesmunin di Asiya: ad kidwem yiři arḍa d řehna zeg Wenni iǧan d Wenni tuɣa d Wenni dd ɣa yasen, uřa zi sebɛa n arruḥat nni iǧan zzat i řɛarc nnes, ^■   5 u zi Yeccu Lmasiḥ, Acehhad Amtiqqi, Amenzu jar n imettinen d Ameqqran n ijeǧiden n temmurt. I Wenni d aneɣ ittexsen u d aneɣ ifekken zi ddnub nneɣ s idammen nnes, ^■   6 - aqa yarr aneɣ d ijeǧiden d ikehhanen ɣar AREBBI Babas - , i Netta ad ɣares yiři uɛuǧi d ṣṣulṭa i řebda qaɛ. Amin! ^■  

7 Xzar, Netta ad dd-yas ak-d iseynuten, kuř tiṭṭ ad t tẓar, uřa d inni t issnuqqben. Marra tiqebbař n temmurt ad xas wtent agejdur. Wah, amin! ^■  

8 Necc d Alif d Taw, Amezwaru d Uneggaru, iqqar SIDI AREBBI, d wenni iǧan d wenni tuɣa d wenni dd ɣa yasen, Amzemmar x kuřci. ^■  

9 Necc, Yuḥanna, umatwem d umɛacar nwem di řmeḥnet u di ṣṣbar nni iǧan di Yeccu, tuɣa ayi di tegzirt qqaren as Batmus di ṭṭweɛ n Wawař n AREBBI d cchadet n Yeccu Lmasiḥ.

10 Usiɣ-dd di Arruḥ deg wass amezwaru n simana uca sřiɣ awarni ayi ict n tmijja tejhed amecnaw aṣuḍi deg uyicc n ucarri, ^□  ■  

11 teqqar: “Min tᵉttwařid, ari t deg ict n tebrat, ssekk i-t-i-dd i sebɛa n tmesmunin: ɣar Afasus, ɣar Smirna, ɣar Pirɣamus, ɣar Tiyatira, ɣar Sardis, ɣar Filadilfiya uca ɣar Layudikiya.”

12 Xenni nnqeřbeɣ ḥima ad ssneɣ wi kidi issawařen. Ařami nnqeřbeɣ, ẓriɣ sebɛa n řeqnadeř n wureɣ

13 uca di řwest n řeqnadeř ijjen amecnaw Mmis n bnadem, tuɣa yarḍ apalṭu n ukehhan u ɣares ijj n webyas n wureɣ x idmaren. ^■  

14 Azeǧif nnes d ucuwwaf nnes tuɣa aten d icemřařen am taḍuft, am wedfeř, uca tiṭṭawin nnes am iḥudaq n tmessi, ^■  

15 iḍaren nnes am nnḥas n Lubnan, iḥman deg ufarran, u řḥess nnes am řḥess n waṭṭas n waman. ^■  

16 Tuɣa ɣares deg ufus nnes afusi sebɛa n yetran uca zeg uqemmum nnes itteffeɣ-dd zzayes ssif iqḍeɛ uca tmurɣi nnes tᵉttecḍiḍiḥ amecnaw tafuct s jjehd nnes. ^■  

17 Ařami t ẓriɣ, wḍiɣ as ɣar iḍaren nnes axmi mmuteɣ uca Netta issars xafi afus nnes afusi, inna: “War tteggʷed ca! Aqa Necc d Amezwaru d Uneggaru, ^■  

18 Necc d wenni iddaren, u Necc tuɣa mmuteɣ, u xzar, aqa Necc d wenni iddaren i řebda qaɛ! Aqa ɣari tsarut n řmewt d řaxart. ^■  

19 S uyenni ari min teẓrid, d min iǧan, d min ɣa imsaren awarni man aya. 20 Aqa ssirr n sebɛa n itran i teẓrid deg ufus inu afusi u ssirr n sebɛa n řeqnadeř n wureɣ d wa: sebɛa n itran aqa aten d lmalakat n sebɛa n tmesmunin uca sebɛa n řeqnadeř, aqa atent d sebɛa n tmesmunin.”