1 Ari i lmalak n tmesmunt di Afasus!

Ammu i iqqar wenni ɣar iǧa sebɛa n itran deg ufus nnes, wenni igguren di řwest n sebɛa n řeqnadeř n wureɣ:

2 “Necc ssneɣ řexdayem nnek d warbar nnek d ṣṣbar nnek, belli war tzemmared ad tḥemřed inni iɛeffnen uca tqeǧbed inni itteggen ixef nsen d rrusul, maca war ǧin ca, uca tufid ten d ayt n bu-ixarriqen. ^□   3 Cek tṣebbared u teksid armeḥ x ssibbet n Yisem inu u war tuḥiřed ca.

4 Maca ɣari xak ca, belli tejjid tayri nnek tamezwarut. 5 Ɛqeř manis-dd tewḍid uca tub, xenni egg řexdayem timezwura! Mařa war iǧi amenni, ad ɣarek dd-aseɣ deɣya, ad ksiɣ řqendiř nnek zeg wemcan nnes, mařa war tubid ca.

6 Maca man aya tiwḍed, aqa tcarrhed řexdayem n ayt n Inikulayiten, tinni carrheɣ uřa d Necc. ^■  

7 Wenni ɣar ǧan imezzuɣen, ejj i-t ad iseř min iqqar Arruḥ i tmesmunin.

Wenni i ɣa iɣellben ad t ssecceɣ zi tcejjart n Tudart i yeǧan di jjennet n AREBBI.” ^□  ■  

8 Ari i lmalak n tmesmunt di Smirna!

Ammu i iqqar wenni d Amezwaru d Uneggaru, wenni immuten uca idweř-dd iddar ɛawed: ^■  

9 “Aqa ssneɣ řmeḥnet d wezřaḍ nnek - qaɛ amenni cek tᵉttejjared - u aqa-yi ssneɣ uřa d aceqqef n yinni iqqaren aqa aten d Udayen s tidett, maca nitni war ǧin ca d Udayen, maca d tamzida n cciṭan.

10 War tteggʷed ca zi min ɣa tᵉttwaɛeddbed. Aqa ibřis ad inḍar ca zzaywem di řeḥbes, ḥima ad tᵉttwajarrbem. Ad ɣarwem tiři řmeḥnet n ɛecra n wussan. Iřim d imtiqqan ař řmewt, řexdenni ad ac wceɣ ttaj n tudart.

11 Wenni ɣar ǧan imezzuɣen, ejj i-t ad iseř min iqqar Arruḥ i tmesmunin.

Wenni i ɣa iɣellben war d as dd-tᵉttiwi ca txessart zi řmewt wiss tnayen.” ^■  

12 Ari i lmalak n tmesmunt di Pirɣamus!

Ammu i iqqar wenni ɣar iǧa ssif iqḍeɛ x tnayen n wudmawen: ^■  

13 “Necc ssneɣ mani tzeddɣed, diha mani ittbedda řɛarc n cciṭan. Aqa teqqimed tᵉṭṭfed deg Yisem inu uca war tenkared ca l’iman dayi, maɣar deg wussan umi tuɣa cek ak-d ucehhad amtiqqi inu tᵉttmenɣed di ṭṭweɛ n marra icehhaden inu imtiqqan, aqa ittwaneɣ jar awem.

14 Maca ɣari xak ca, minzi ɣarek dinni inni itteṭṭfen deg useřmed n Balɛam, wenni tuɣa issřemden i Balak mammec i ɣa inḍar taɛenkrift i ayt n Israil ḥima ad ccen zi min ɣarṣen i l’aṣnam uca ad sefssaden ixef nsen. ^■  

15 Ɣarek din ɛawed inni itteṭṭfen di tɣuri n Inikulayiten.

16 S uyenni tub! Mařa war iǧi amenni, ad ɣarwem dd-aseɣ deɣya, ad kisen menɣeɣ s ssif n uqemmum inu. ^■  

17 Wenni ɣar ǧan imezzuɣen, ejj i-t ad iseř min iqqar Arruḥ i tmesmunin.

Wenni i ɣa iɣellben ad as ssecceɣ ‘manna’ innufaren uca ad as wceɣ ijj n uqayas d acemřař, ittwari x uqayas nni ijj n isem n jdid, war t issin ḥed mɣir wenni t iṭṭfen.” ^■  

18 Ari i lmalak n tmesmunt di Tiyatira!

Ammu i iqqar Mmis n AREBBI wenni ɣar iǧa tiṭṭawin am iḥudaq n tmessi d iḍaren nnes am nnḥas zi Lubnan: ^■  

19 “Necc ssneɣ řexdayem nnek uřa d tayri nnek d l’iman nnek d tsexxart nnek d ṣṣbar nnek, aqa řexdayem nnek tineggura imɣaren x tmezwura.

20 Maca ɣari xak aṭṭas, aqa tejjid tameṭṭut nnek Izabil, tenni iqqaren belli nettat d tanabit, tesseřmad uca tessɣekkʷa imsexxaren ḥima ad ssfesden ixef nsen uca ad ccen min ittwaɣarṣen i l’aṣnam. ^■   21 Aqa wciɣ as ca n řweqt ḥima ad tᵉtub, maca nettat war tᵉttexs ca ad tᵉtub zi farq-ccɣeř nnes. 22 Xzar, ad tt ɣeḍřeɣ di řeḥmeř i yijj n umettin uca inni akides izennan, ad ten nedheɣ di řmeḥnet tameqqrant mařa war tuben ca zi min ggin. 23 Tarwa nnes ad ten wteɣ s řmewt uca marra timesmunin ad fehment aqa Necc d wenni iqeǧben tiẓẓař d wuřawen uca ad awem wceɣ marra anect n řexdayem nwem. ^■  

24 Maca i kenniw, inni iqqimen di Tiyatira - marra inni war ɣar iǧi ca taɣuri aya uca war ssinen umi qqaren nitni ‘řaǧaɣ n cciṭan’ - ad awem iniɣ: Necc war xawem ttdarraceɣ ca taɣrart nneɣnit. 25 Maca min ɣarwem, ṭṭfem dayes ař dd ɣa yaseɣ. ^■  

26 Wenni i ɣa iɣellben u wenni i ɣa iṭṭfen di řexdayem inu, ad as wceɣ ṣṣulṭa x řegnus, 27 maḥend ad ten yarwes s uzeǧaḍ n wuzzař, uca ad ttwarẓen nitni am iɣarrafen n třaxt n bu-třaxt, aqa ammu i tᵉṭṭfeɣ uřa d Necc zi Baba, ^■   28 uca Necc ad as wceɣ itri n řefjar.

29 Wenni ɣar ǧan imezzuɣen, ejj i-t ad iseř min iqqar Arruḥ i tmesmunin.”