1 Uca netta isscen ayi ijj n yeɣzar izdig n Waman Iddaren, d amezdag, iṣfa am ukristal, i dd-itteffɣen zi řɛarc n AREBBI u n Yezmar. ^■   2 Di řwest n wazzay, x tnayen n tmuwwa n yeɣzar, tuɣa Tacejjart n Tudart tenni tessenḍay řɣiǧet tenɛac n twařawin. Di mkuř ayur iwca řɣiǧet nnes d tifray nnes i usgenfu n řegnus. ^■   3 War dayes tᵉttiři ɛad nneɛřet. Ad dayes yiři řɛarc n AREBBI u n Yezmar uca imsexxaren nnes ad xas sexxaren. 4 Nitni ad ẓaren udem nnes, Isem nnes ad yiři x tenyarin nsen. ^■   5 War din tᵉttiři ɛad ǧiřet uca nitni war tteḥdijen ɛad ṭṭya n řefnarat niɣ n tfawin niɣ n tfawt n tfuct, minzi SIDI AREBBI ad asen igg tafawt uca ad yiři d Ajeǧid nsen i řebda qaɛ. ^■  

6 Xas uca inna ayi:

“Awařen-a daysen řaman d tidett,

uca SIDI, AREBBI n Arruḥ n inabiyyen iqeddsen,

aqa issekk lmalak nnes

ḥima ad isscen i imsexxaren nnes

min i ɣa yiřin deɣya.” ^■  

7 “Xzar Necc ad dd-aseɣ deɣya.

Sseɛd n wenni itteṭṭfen

deg wawařen n nnubuwat n wedlis-a.” ^■  

8 Necc, Yuḥanna, aqa ẓriɣ u sřiɣ timesřayin-a. Uca řami tent ẓriɣ u sřiɣ, wḍiɣ ɣar iḍaren n lmalak wenni d ayi issecnen timesřayin-a, ḥima ad as ɛebdeɣ. 9 Maca netta inna ayi:

“Ḥḍa, war ttegg man aya,

maɣar necc d amsexxar di ṭṭweɛ nnek

u di ṭṭweɛ n aytmac, inabiyyen,

uřa di ṭṭweɛ n yinni itteṭṭfen deg wawařen n wedlis-a.

Ɛebdet AREBBI!” ^■  

10 Xas uca inna ayi:

“War ttegg acemmiɛ x wawařen i ittwanabben deg wedlis-a,

minzi řweqt aqa tiweḍ-d. ^■  

11 Wenni itteggen min war iseggden,

ad igg min war iseggden ktar,

amengus ad idweř d amengus ktar,

amseggad ad igg tasegda ktar,

uca amqeddas ad idweř d amqeddas ktar.

12 “Xzar Necc ad dd-aseɣ deɣya uca řmunet inu akidi,

ḥima ad xeǧṣeɣ kuř ijjen anect n řxedmet nnes. ^■  

13 Necc d Alif d Taw,

d Amezwaru d Aneggaru,

d Beddu d Akemmeř.” ^■  

14 “Sseɛd nsen i yinni itteggen tiweṣṣa nnes.

Ad ɣarsen tiři ṣṣulṭa x Tcejjart n Tudart

uca ad dd-adfen ɣar tendint zi tewwura nnes.

15 Barra iǧan inni itteggen ffarq-cɣeř d yenni ineqqen

d yenni iɛebbden l’aṣnam d yenni daysen řexmej

d yenni ittseḥḥaren d imwařawen d ayt n bu-ixarriqen.” ^■  

16 “Necc, Yeccu, aqa ssekkeɣ lmalak inu

maḥend ad xawem iched man aya

zzat i tmesmunin.

Aqa d NECC, Aẓwar d Zzariɛet n Dawud,

d Amɛacar nnes, d Itri n Řefjar yareqqen.” ^■  

17 Arruḥ d Tesřit qqaren:

“As-dd!”

D wenni tt isřin, iqqar:

“As-dd!”

“D wenni ifuden, ejj i-t ad dd-yas,

uca ad isu Aman Iddaren baṭeř.” ^■  

18 “Necc cehhdeɣ i marra inni ittesřan

i wawařen n nnubuwat n wedlis-a:

Mařa din ḥed wenni xasen i ɣa yarnin,

AREBBI ad xas yarni jjrayeḥ,

tinni ittwarin deg wedlis-a.

19 Mařa ca n ijjen ikkes

zeg wawařen n wedlis n nnubuwat-a,

ad as ikkes AREBBI tasɣart nnes

zi Tcejjart n Tudart u zi Tendint iqeddsen,

tinni yuran deg wedlis-a.” ^■  

20 Xmi Netta iched x man aya, inna:

“Wah, Necc ad dd-aseɣ deɣya!”

“As-dd, a SIDI Yeccu!”

21 Arḍa n Siditneɣ Yeccu Lmasiḥ aqa-t ak-d marra imqeddasen nnes. Amin!

Aneggar n Řɛahd n Jdid.

Aɛuǧi i Yisem n AREBBI,

Babatneɣ d Siditneɣ d Arruḥ Iqeddsen.