1 Uca ẓriɣ ijj n lmalak nneɣni ihwa-dd zeg ujenna, ɣares tasarut n tesraft i iǧan sadu temmurt d ict n ssnesřet tameqqrant deg ufus nnes. ^■   2 Netta iṭṭef řhaycet, afiɣar awessar, wenni d ibřis d cciṭan uca icarf i-t i yijj n řqedd n wařef n iseggʷusa, ^■   3 uca inḍar i-t di tesraft sadu temmurt, ibelleɛ xas uca igga xas acemmiɛ, ḥima war ittɣecci ɛad řegnus. Awarni man aya ittxeṣṣa ad as yarxun ɣar cwayt n řweqt. ^■  

4 Uca ẓriɣ řekrasi igellden d yenni xasen iqqimen uca immewc asen řḥukm. Aqa řeɛmur-a n yinni umi kksen izeǧifen nsen di ṭṭweɛ n cchadet n Yeccu d wawař n AREBBI, inni war sejden i řweḥc uřa i řexyař, inni war ɣar iǧi bu řeɛřamet x tenyart nsen uřa deg ufus nsen, dewřen ɛawed ad ddaren, ad ḥekmen ak-d Lmasiḥ ařef n iseggʷusa. ^■  

5 D ta d tanukra tamezwarut. 6 Sseɛd d umqeddas n wenni i ɣa iṭṭfen tasɣart di tnukra tamezwarut. Řmewt wiss tnayen war ɣares tiři bu ṣṣulṭa xasen, maca nitni ad iřin d ikehhanen n AREBBI u n Lmasiḥ uca ad kis ḥekmen ařef n iseggʷusa. ^■  

7 Xmi i ɣa iqfeř ařef n iseggʷusa, ad ittwaḍřeq cciṭan zi řeḥbes nnes, 8 uca ad dd-iffeɣ ḥima ad iɣecc řegnus inni iǧan ɣar arebɛa n tɣemmura n temmurt, Hajuj d Majuj, ad ten issmun i umenɣi u řqedd nsen am yejdi n řebḥar. ^□  ■   9 Ḥarrcen-dd zi ṭṭarf n temmurt uca nnḍen as i řmargeḥ n řɛeskar n imqeddasen d tendint iɛizzen, uca tewḍa-dd tmessi zeg ujenna, zi zzat AREBBI, uca tecca i-ten.

10 Uca ibřis, wenni tuɣa ten iɣwan, aqa immenḍar deg uyeřmam n tmessi ittcefcufen s řecbareyyet mani iǧa řweḥc d unabi issxarriqen uca ad ttwaɛeddben ass d ǧiřet i řebda qaɛ. ^■  

11 Uca ẓriɣ ijj n řɛarc d ameqqran d acemřař d Wenni xas iqqimen, aqa zi arendad n uɣembub nnes tarweř temmurt d ujenna, uca war d asen iqqim bu wemcan ɛad.

12 Necc ẓriɣ imettinen bedden zzat i řɛarc, imeqqranen d imeẓyanen. Aqa nnurzmen idlisen ittwanḍen uca innurzem wedlis ittwanḍen nneɣni, Adlis n Řḥukm. Uca ittwaḥkem x imettinen zi min tuɣa ittwari deg idlisen, x řeḥsab n řexdayem nsen. ^■  

13 Uca řebḥar iwca imettinen inni tuɣa aten dayes uca řmewt d řaxart wcint imettinen inni tuɣa aten daysent uca ittwaḥkem xasen, kuř ijjen anect n řexdayem nnes.

14 Řmewt d řaxart mmenḍarent deg uyeřmam n tmessi. Ta d řmewt wiss tnayen.

15 Mařa ittwaf ḥed war ittwari ca deg Wedlis n Tudart, immenḍar deg uyeřmam n tmessi.