Iẓři x uweṭṭu n Babilun
19
1 Awarni as sřiɣ ijj n řḥess ameqqran n waṭṭas n řɣaci deg ujenna, nnan: “Hallilu-Yah,
řefdiyyet d uɛuǧi d jjehd aqa aten s AREBBI nneɣ.
2 Minzi řeḥkamat nnes mɣir d tidett d řḥeqq,
umi iḥaseb x temɣart n farq-ccɣeř taẓuwart,
tenni yareddǧen ddunect s farq-ccɣeř nnes,
uca Netta yuɣa tasɣart x idammen n imsexxaren nnes
i yumsen ɣar ifassen nnes.” ■
3 Nnan i umur wiss tnayen:
“Hallilu-Yah!”
Uca ad yaři ddexxan nnes ɣar ujenna i řebda qaɛ.” ■
4 Uca arebɛa u-ɛicrin n imɣaren d arebɛa n imeddaren wḍan ɣar temmurt, sejden i AREBBI wenni iqqimen x řɛarc, nnan:
“Amin, Hallilu-Yah!”
5 Uca tusa-dd ict n tmijja zi řɛarc, tenna:
“Semɣarem AREBBI nneɣ,a kenniw marra imsexxaren nnes,
u marra inni t itteggʷeden,
am umeẓyan am umeqqran!”
Řemřac n Yezmar
6 Uca sřiɣ aqa qqaren amecnaw s tmijja n ubarru n řɣaci, amecnaw s řḥess n waṭṭas n waman, amecnaw s zzhir n wajjaj ameqqran:
“Hallilu-Yah, minzi SIDI AREBBI,
Amzemmar x kuřci, aqa iḥekkem am Ujeǧid. ■
7 Nfarḥ, ad nesřiwřiw,
ad as negg aɛuǧi,
maɣar urar n Yezmar yiweḍ-dd,
uca tamɣart nnes aqa tḥezzem, ■
8 uca temmewc as ad tyarḍ arruḍ
zi řqeṭṭan ifsusen ittissiqen izdigen,
minzi řqeṭṭan nni ifsusen nni netta d tasegda n imqeddasen.”
9 Niti nnan ayi:
“Ari: Sseɛd n yinni ittwaɛarḍen
ɣar umensi n wurar n Izmar.’
Xenni inna ayi ca n yijjen:
“Ina d awařen n tidett n AREBBI.” ■
10 Uca wḍiɣ as ɣar iḍaren nnes ḥima ad t ɛebdeɣ. Uca netta inna ayi:
“Lla, war ttegg ca man aya! Aqa necc d amsexxar am cek d aytmac inni ɣar teǧa cchadet n Yeccu. Ɛebdet AREBBI, minzi cchadet n Yeccu nettat d Arruḥ n min ittwanabben.” ■
Amnay s uyis d acemřař
11 Awarni aya ẓriɣ ajenna innurzem, u xzar, aqa din ijj n uyis d acemřař d Wenni xas inyin, qqaren as ‘Wenni d Amtiqqi d Tidett!’, uca Netta ad iḥaseb u ad imneɣ s tsegda. ■
12 Tuɣa tiṭṭawin nnes amecnaw iḥudaq n tmessi, ɣares x uzeǧif nnes aṭṭas n ttajat, ittwari xasen Isem i war t issin ḥed mɣir Netta waha. ■
13 Tuɣa yarḍ ijj n warruḍ ittwassɣeḍṣen deg idammen, uca wa d Isem nnes: ‘Awař n AREBBI’. ■
14 Řɛeskarat n ujenna ḍfaren t-i-dd x yeysan icemřařen, arḍen řqeṭṭan d acemřař izdig. ■
15 Ffeɣ-dd řesyuf iqeḍɛen zeg iqemmumen nsen maḥend ad zzaysen nɣen řegnus, u Netta ad ten iḥḍa s uzeǧaḍ n wuzzař, u Netta simant nnes ad iɛfes di tsirt n tefqeḥt n weɣḍab n AREBBI, Amzemmar x kuřci. ■
16 X warruḍ nnes u x tmeṣṣaṭ nnes ittwari xasen Isem-a wanita: ‘Ajeǧid x marra ijeǧiden, Sidi x marra řeḥkamat.’ ■
17 Uca ẓriɣ ijj n lmalak nneɣni ibedd di tfuct. Netta iřaɣa s jjehd, inna i marra ijḍaḍ iṭṭawen di řwest n ujenna:
“Asettiw-d, munettiw-dd
ɣar umensi ameqqran n AREBBI, ■
18 ḥima ad teccem aysum n ijeǧiden
d weysum n imeqqranen x wařef
d weysum n yinni ijehden
d weysum n iysan d yenni xasen inyin,
d weysum n iḥurriyyen d isemɣan,
am n imeẓyanen am n imeqqranen.”
19 Uca ẓriɣ řweḥc ak-d ijeǧiden n temmurt d iɛeskarriyyen nsen inni imunen ḥima ad mmenɣen ak-d wenni inyin x uyis u ak-d iɛeskariyyen nnes. 20 Aqa ittwaṭṭef řweḥc ak-d unabi issxarriqen, wenni iggin zzates řeɛřamat nni zi tuɣa iɣecc inni iksin řeɛřamet n řweḥc uca sejden i řexyař nnes. Nitni s tnayen idsen ttwammenḍaren deg uyeřmam n tmessi ittcefcufen ɛawed s řecbareyyet. ■ 21 Wi iqqimen ttwanɣen s wuzzař i dd-ikkin zeg uqemmum n wenni inyin x uyis. Uca marra ijḍaḍ ittkeccaḍen jjiwnen s weysum nsen.