Aweṭṭu n Babilun
18
1 Awarni as ẓriɣ ijj n lmalak nneɣni ihekkwa-dd zeg ujenna, ɣares ṣṣulṭa tameqqrant, uca ṭṭya n uɛuǧi nnes tegga tafawt kuřci i temmurt. 2 Netta iřaɣa s tmijja tejhed, iqqar: “Aqa tewḍa, tewḍa Babilun tameqqrant,
tedweř d tazeddiɣt n ccwaṭen
d řeḥbes i kuř řaryaḥ amengus amenɛi, ■
3 minzi txeǧeḍ binu n farq-ccɣeř nnes i marra řegnus,
u minzi ijeǧiden n temmurt aqa ssfesden ixef nsen zzayes,
u minzi isebbaben n temmurt dewřen d twajjar
s jjehd n uṭemmes nnes.” ■
4 Uca sřiɣ i tmijja nneɣni třaɣa-dd zeg ujenna:
“Ffeɣ zzayes, a řgens inu,
ḥima war ttiřin ddnub nnes x yiri nnek,
uca war tkessid zi jjrayeḥ nnes, ■
5 minzi ddnub nnes aqa iwḍen ɣar ujenna,
uca AREBBI aqa iɛqeř x řmuɛṣiyyet nnes.■
6 Arrem-dd xas am mammec dd-tarra nettat,
arrem-dd xas s uḍeffus ɛlaḥsab řexdayem nnes,
xeǧeḍ as s uḍeffus deg uɣarraf nni tuɣa txeǧeḍ nettat. ■
7 Xeřfem as-dd aɛeddeb d wecḍan
anect tuɣa nettat tessɛuǧi u tessgeɛɛed ixef nnes
minzi teqqar deg wuř nnes:
‘Aqa qqimeɣ am tjeǧidt, war ǧiɣ d tajjač,
uca acḍan war t ẓarreɣ ca!’ ■
8 S uyenni deg ijj n wass ad xas wḍant marra jjrayeḥ nnes: řmewt, acḍan d řaẓ, uca ad tᵉttwasecmeḍ di tmessi, minzi SIDI, d wenni xas i ɣa iḥekmen, aqa ijhed. ■
9 Ijeǧiden n temmurt, inni kides iggin ffarq-cɣeř u ssgeɛɛden ixef nsen, ad xas run, ad xas wten agejdur xmi i ɣa ẓaren ddexxan n tmessi nnes. ■
10 Nitni ad qqimen bedden ɣar řaggʷaj zi teggʷudi n uɛeddeb nnes, qqaren:
“Uct, uct, uct, xam, a tandint tameqqrant,
Babilun, a tandint ijehden,
minzi aqa yusa-dd řḥukm nnem deg ict n tsaɛɛet!” ■
11 Isebbaben n temmurt ad xas run, ad ceḍnen, minzi uřa d ijj war issiɣ ɛad sseřɛet nsen:
12 sseřɛet n wureɣ d nnuqart d yeẓra yiɣřan d tyaqutin d řeqṭen azdad d arjuwani d řeḥrir azeggʷaɣ iḥedqen d ɛřam kuř akeccuḍ ittfuḥen d ɛřam kuř řeqcuɛ zi řɛaj d ɛřam kuř řeqcuɛ zeg ukeccuḍ iɣřan d nnḥas d wuzzař d řmarmur □
13 d řqarfa d řebxur d ddhen ittfuḥen d jjawi d binu d zzect n zzitun d aren n ssmid d yirden d řmař d wuǧi d yeysan d ikarruten uřa d arrimat d řeɛmur n iwdan. ■
14 Aqa řɣiǧet i di tuɣa tᵉttmeẓri tnefsect nnem, aqa tiggʷej xam, uca marra min tuɣa ɣarem d agřa d min ittissiqen, aqa iweddar, war t tẓarred ɛemmarṣ ɛad.
15 Isebbaben n řeḥwayej-a, inni idewřen zzaysent d twajjar, war tent ttifen ɛad, uca ad qqimen ɣar řaggʷaj zi teggʷudi n uɛeddeb nnes, am ttrun u am ceṭṭnen,
16 ad inin:
“Uct, uct xam, a cem, tandint tameqqrant
i yarḍen řeqṭen azdad d arjuwani
d azeggwaɣ iḥedqen iqqen s wureɣ
d yeẓra iɣřan d tyaqutin, ■
17 s minzi deg ict n tsaɛɛet
aqa iweddar wagřa ameqqran nnes!”
Marra inni ineddhen iɣarruba d marra ibeḥriyyen d marra inni ixeddmen di řebḥar qqimen bedden ɣar řaggʷaj,
18 u nitni cetcan umi ẓrin ddexxan n tmessi nnes, qqaren:
“Wi izemmaren ad imqudda ak-d tendint-a tameqqrant?” ■
19 Ssuyusen ucař x izeǧifen nsen uca sɣuyyen, am ttrun u am ttecḍinen, qqaren:
“Uct, uct xam, a cem, tandint tameqqrant,
tenni i zi dewřen d twajjar
marra inni ɣar iǧa iɣarruba di řebḥar,
s ubarru n wagřa nnes,
minzi deg ict n tsaɛɛet tweddar!
20 Farḥet zzayes, a ajenna,
d imqeddasen d rrusul d inabiyyen,
minzi AREBBI aqa issuffeɣ-dd řeḥkamet nnes xas!” □ ■
21 Uca ijj n lmalak ijehden issgeɛɛed ijj n weẓru ameqqran anect n teṣḍart n tsirt, inḍar i-t di řebḥar, iqqar:
“Ammu s jjehd ad temmenḍar Babilun,
tandint tammeqrant nni
uca war tᵉttwif ɛad ɛemmarṣ! ■
22 Řḥess n ayt n lharpa u n uṣuḍi deg uyicc n icarri,
u n ɛřam kuř aɣennej d tɣuyyit,
war ittwaseř ɛad dayem. ■
23 Ɛemmarṣ ad dayem taryeɣ ɛad ṭṭya n řefnar,
uca uřa d řḥess n wesři d tesřit
war ittwaseř ɛad dayem.
Isebbaben nnem tuɣa aten d imeqqranen n temmurt,
minzi s tseḥḥart nnem, aqa ttwaxedɛen řegnus marra. ■
24 Aqa ittwaf dayem idammen n inabiyyen
u n imqeddasen inni ittwanɣen di temmurt.” ■