1 Uca yusa-dd ijjen zi sebɛa n lmalakat, inni ɣar iǧa sebɛa n ṭṭawyat, issiweř akidi, inna:

“As-dd, ad ac ssecneɣ řḥukm

x temɣart n farq-ccɣeř

i iqqimen x waṭṭas n waman,

2 tenni zi ssfesden ijeǧiden n temmurt ixef nsen,

uca marra imezdaɣ n temmurt

scaren s binu n farq-ccɣeř nnes.”

3 Indeh ayi di Arruḥ ɣar řexřa, uca ẓriɣ ict n tmeṭṭut tenya x ijj n řweḥc azeggʷaɣ iḥedqen i iccuren s ismawen n ttekfir, uca tuɣa ɣares sebɛa n izeǧifen d ɛecra n waccawen. ^■   4 Tuɣa tameṭṭut tyarḍ taqendurt turjuwanit d tazeggwaɣt iḥedqen teqqen s wureɣ d yeẓra iɣřan d tyaqutin. Tuɣa ɣares deg ufus nnes ijj n uɣarraf n wureɣ iccur s nnɛawat u s řexmej n farq-ccɣeř nnes. ^■   5 Ittwari x tenyart nnes ijj n isem: ‘Ssirr n Babilun tameqqrant, tayemmat n temɣarin n farq-ccɣeř d marra nnɛawat n temmurt’. ^■   6 Uca ẓriɣ tameṭṭut tescar s idammen n imqeddasen u s idammen n yinni icehhden x Yeccu. Ařami tt ẓriɣ, ttbehteɣ aṭṭas. ^■  

7 Inna ayi lmalak: “Mayemmi tᵉttbehted? Necc ad cek ssargbeɣ x ssirr n tmeṭṭut d řweḥc s sebɛa n izeǧifen d ɛecra n waccawen, wenni tt yarebbun.

8 Řweḥc i teẓrid d wenni tuɣa d wenni war iǧin, ad igeɛɛed zi řebḥar, ad iweddar. Uca ad tbehten imezdaɣ n temmurt, inni isem nsen war ittwari ca deg Wedlis n Tudart zeg wami dd-teffeɣ ddunect, ad tbehten xmi i ɣa ẓaren řweḥc wenni tuɣa, d wenni war iǧin, ɛad ad yiři. ^■   9 Aqa da řmeɛna i wenni ɣar teǧa řefhamet: sebɛa n izeǧifen aqa d sebɛa n idurar min xef teqqim tmeṭṭut. ^■  

10 Ɛawed aqa aten d sebɛa n ijeǧiden, xemsa zzaysen wḍan, ijjen aqa iǧa ɛad, d wenneɣni aqa-t ɛad war dd-yusi. Mařa netta ad dd-yas, ittxeṣṣa ad iqqim drus n řweqt.

11 Uca řhaycet d řweḥc nni iǧan d wenni war iǧin, aqa netta s yixef nnes uřa d wiss tmenya, maca ad iffeɣ zi sebɛa nni uca ad iweddar.

12 Ɛecra n waccawen i teẓrid, aqa d ɛecra n ijeǧiden, ɛad war ɣarsen bu tgelda, maca ad ṭṭfen ṣṣulṭa n ijeǧiden řqedd n ict n tsaɛɛet ak-d řweḥc. ^■  

13 Nitni ɣarsen array d ijjen, ad wcen jjehd nsen d ṣṣulṭa nsen i řweḥc.

14 Ina ad mmenɣen ak-d Izmar uca Izmar ad xasen iɣřeb minzi Netta d Sidi x marra isiditen d Ujeǧid x marra ijeǧiden, u minzi inni akides iǧan, aqa nitni d imřaɣan d inni ittwafarzen d řmuminin.” ^■  

15 Inna ayi ɛawed: “Aman i teẓrid i x teqqim temɣart n farq-ccɣeř, aqa aten d řegnus, d ibarruten n řɣaci, d ccuɛub, d iřsawen. ^■  

16 Uca ɛecra n waccawen i teẓrid x řweḥc, nitni ad carhen tamɣart n farq-ccɣeř ad tt ggen weḥḥdes d taɛeryant, ad ccen aysum nnes, ad tt sscemḍen s tmessi. ^■  

17 Maɣar AREBBI iwca asen deg wuřawen nsen ḥima ad ggen nneyyet n řweḥc, u maḥend ad tt ggen s array d ijjen, uca ad wcen tageldit nsen i řweḥc ař ɣa ttwakemmřen awařen n AREBBI.

18 Uca tameṭṭut i teẓrid, nettat d tandint tameqqrant, tenni ɣar teǧa tgelda x ijeǧiden n temmurt.” ^■