1 Uca sřiɣ ict n tmijja zi Zzawect Tameqqrant tᵉttřaɣa x sebɛa n lmalakat nni, tenna:

“Uyurem, tfarrɣem sebɛa n ṭṭawyat n weɣḍab n AREBBI x temmurt!”

2 Wenni d amezwaru yuyur, ikebb ṭṭawya nnes x temmurt. Uca idweř ijj n ubuɛrus d aɛeffan iqbeḥ ɣar iwdan inni ɣar teǧa řeɛřamet n řweḥc uca ɣar yenni isejden i řexyař nnes. ^□  ■  

3 Xenni ifarreɣ lmalak wiss tnayen ṭṭawya nnes di řebḥar uca idweř am řmewt minzi kuř řeɛmar iddaren di řebḥar immut. ^■  

4 Xenni ifarreɣ lmalak wiss třata ṭṭawya nnes x iɣezran d tařawin, uca aman dewřen d idammen.

5 Uca sřiɣ i lmalak n waman iqqar:

“Cek d amseggad,

Cek d wenni iǧan, d wenni tuɣa d wenni d amqeddas,

umi tkemmřed řeḥkamat-a ammu. ^■  

6 Minzi nitni ssizzřen idammen

n imqeddasen d inabiyyen,

tewcid asen ɛawed ad swen idammen,

maɣar ammu i d asen dd-iffeɣ.” ^■  

7 Uca sřiɣ aqa aɛalṭar min xef ttwamarsent ddbayeḥ, iqqar:

“Wah, a SIDI AREBBI, Amzemmar x kuřci,

řeḥkamat nnek d tidett d tasegda.” ^■  

8 Xenni ifarreɣ lmalak wiss arebɛa ṭṭawya nnes x tfuct uca temmewc as i tfuct, ḥima ad tecnef iwdan s tmessi nnes. 9 Uca cemḍen iwdan s řɛabuq imɣaren n tmessi uca ceqqfen deg Yisem n AREBBI wenni ɣar teǧa ṣṣulṭa x jjrayeḥ-a, uca war tuben ca maḥend ad as wcin aɛuǧi. ^■  

10 Xenni ifarreɣ lmalak wiss xemsa ṭawya nnes x řɛarc n řweḥc uca tewḍa-dd taǧest x tgeldit n řweḥc uca zeɛfen deg iřes nsen s ssibbet n řeḥriq

11 uca ceqqfen di AREBBI n ujenna s ssibbet n řeḥriq d ibuɛrusen nsen, uca war tuben ca zi řexdayem nsen.

12 Xenni ifarreɣ lmalak wiss setta ṭṭawya nnes deg iɣzar ameqqran, iɣzar n Lfuraṭ, uca uẓɣen waman nnes, ařami issewjed abrid i ijeǧiden inni dd ɣa yasen zi manis dd-tneqqar tfuct.

13 Xenni ẓriɣ, aqa třata n řaryaḥ imengas amecnaw iqarqriwen ffɣen-dd zeg uxenfuc n řhaycet u zeg uqemmum n řweḥc u zeg uqemmum n unabi issxarriqen.

14 Maɣar nitni d řaryaḥ n ccwaṭen inni itteggen řeɛřamat i dd-itteffɣen ɣar ijeǧiden n ddunect, maḥend ad ten ssmunen i umenɣi deg wass ameqqran n AREBBI, Amzemmar x kuřci. ^■  

15 “Xzar, Necc ad dd-aseɣ amecnaw aceffar!

Sseɛd n wenni i ɣa iqqimen ifaq,

wenni ad iḥḍa arruḍ nnes

ḥima war iggur d aɛaryan

uca war ittwaẓar useḍḥi nnes.” ^■  

16 Issmun i-ten ɣar wemcan umi ttřaɣan s Tɛibranit ‘Megiddu’.

17 Xenni ikebb lmalak wiss sebɛa ṭṭawya nnes x řeɛwin uca tusa-dd ict n tmijja tejhed zi Zzawect Tameqqrant, zi řɛarc, teqqar:

“Aqa temmejra!” ^■  

18 Uca usin-dd wassamen d wajjajen d tmijjawin, uca imsar ijj n wenhezzi n temmurt d ameqqran, war temsar ammu zeg wami iǧa bnadem di temmurt, ammu i imɣar. ^■  

19 Tandint tameqqrant tewḍa tebḍa x třata n tseqqar uca marra tineddam n řegnus hedment uca AREBBI iɛqeř x Babilun tameqqrant ḥima ad as iwc aɣarraf n waman n uḍiř n tefqeḥt n weɣḍab nnes. ^■   20 Kuř tagzirt tarweř, war ttwifin ca idurar ɛad. 21 Wḍan-dd ibquqen imeqqranen n tebruri zeg ujenna x iwdan, tuɣa ddqeř nsen anect n ict n ‘talint’, ɛřaḥař ɛicrin ař arebɛin kilu, uca iwdan ceqqfen di AREBBI zi ssibbet n jjriḥect n tebruri, minzi jjriḥect nnes tuɣa temɣar aṭṭas. ^■