1 Uca ẓriɣ deg ujenna ict n řeɛřamet nneɣni, d tameqqrant d tanebhet: sebɛa n lmalakat nni dd-iwyen sebɛa n jjrayeḥ tineggura, minzi ikmeř zzaysent weɣḍab n AREBBI. ^■  

2 Uca ẓriɣ amecnaw řebḥar n zzaj, wenni ixeǧḍen ak-d tmessi, uca inni iɣellben x řweḥc d řexyař nnes d nnumru n yisem nnes, bedden x tma n řebḥar n zzaj, ɣarsen lharpat n AREBBI. ^■   3 Nitni ɣennjen izři n Musa, amsexxar n AREBBI, d yezři n Yezmar, qqaren:

“D timeqqranin d tṣebḥanin řexdayem nnek,

a, SIDI AREBBI, Amzemmar x kuřci,

řexdayem nnek d tasegda d tidett,

a Ajeǧid n marra ikuden! ^■  

4 Man wen war Cek itteggʷeden, a SIDI,

man wen war issemɣaran Isem nnek?

Cek weḥḥdek i iǧan d amqeddas,

maɣar marra řegnus ad dd-asen,

ad sejden zzatek,

minzi Cek d tidett.” ^■  

5 Awarni as ẓriɣ, aqa tennurzem Zzawect di Tzeddiɣt n Cchadet deg ujenna. ^■   6 Sebɛa n lmalakat nni ɣar iǧa sebɛa n jjrayeḥ ffɣent i-dd zi Zzawect, yarḍen řeqṭen azdad izdigen ittissiqen, uca ɣarsen x idmaren ijj n webyas n wureɣ. ^■   7 Uca ijjen zi arebɛa n imeddaren iwca asen i sebɛa n lmalakat sebɛa n ṭṭawyat, ccurent s weɣḍab n AREBBI wenni d Tudart i řebda qaɛ. Amin! 8 Uca tᵉttwaɛemmar Zzawect Tameqqrant s ddexxan i dd-itteffɣen zeg uɛuǧi n AREBBI u n jjehd nnes. Uřa d ijjen war izemmar ad dd-yadef ɣar Zzawect Tameqqrant ař ɣa kkent sebɛa n jjrayeḥ tinni dd-iwyen sebɛa n lmalakat. ^■