Izmar d meyya u arebɛa u arebɛin ařef x wedrar n Ṣihyun
14
1 Uca ẓriɣ, aqa Izmar ibedd x wedrar n Ṣihyun, uca akides mya u-arebɛa u-rebɛin-ařef, inni ɣarsen Isem nnes d Yisem n Babas, ittwarin x tenyart nsen. ■ 2 Sřiɣ ict n tmijja tusa-dd zeg ujenna, am řḥess n waṭṭas n waman u am řḥess n wajjaj ameqqran, uca řḥess i sřiɣ tuɣa amecnaw ayt n lharpa ittiraren di lharpat nsen. ■ 3 Aqa nitni ɣennjen min iǧan amecnaw ijj n yezři n jdid qaɛ zzat i řɛarc u zzat i arebɛa n imeddaren d imɣaren, uca uřa d ijj war izemmar ad iřmed izři-ya n uṣebbeḥ mɣir mya u-arebɛa u-rebɛin-ařef, inni ittwafdin zi temmurt. ■ 4 Ina d inni war ittwafesden ak-d temɣarin, minzi nitni d iɛezriyyen imezdagen. Nitni ḍeffaren Izmar manis ma ikka, aqa ttwafdin zeg iwdan am imenza i AREBBI u i Yezmar. ■ 5 Aqa war ittwifi ca řɣecc deg uqemmum nsen, aqa war daysen bu řɛib. ■
Třata n lmalakat
6 Xas uca ẓriɣ ijj n lmalak nneɣni tuɣa iṭṭaw di řwest n ujenna, ɣares Řexbar Aṣebḥan i Řebda ḥima ad zzayes ibarreḥ i yenni izeddɣen di temmurt, i kuř řgens d teqbič d yiřes d cceɛb, 7 uca iřaɣa s jjehd:
“Ggʷedem AREBBI, wcem as-dd aɛuǧi,
aqa tasaɛɛet n lḥisab nnes tiweḍ-dd.
Sejdem i wenni iggin ajenna d temmurt
d řebḥar d tařawin n waman.” ■
8 Uca wenneɣni, wenni d wiss tnayen, iḍfar i-t, inna:
“Aqa tewḍa, aqa tewḍa Babilun, tandint tameqqrant
i yejjin ad swen marra řegnus zeg waman n uḍiř
n tefqeḥt n farq-ccɣeř nnes.” ■
9 Uca wenneɣni, ijj n lmalak wiss třata, iḍfar i-ten uca iřaɣa s jjehd:
“Wenni iɛebden řweḥc d řexyař nnes
d wenni iksin řeɛřamet x tenyart nnes
niɣ deg ufus nnes,
10 d netta ad isu ɛawed zeg waman n uḍiř n tefqeḥt n SIDI
wenni isswejden břa axeǧeḍ deg uɣarraf n weɣḍab nnes,
uca ad ittwaɛeddeb s tmessi d řecbareyyet
qibač i tiṭṭawin n lmalakat iqeddsen
u qibač i tiṭṭawin n Yezmar. ■
11 Uca ddexxan n uɛeddeb nsen ad iqqim igeɛɛed i řebda.
War din bu arraḥet ass d ǧiřet
i yenni isejjaden i řweḥc d řexyař nnes,
u i marra wenni iksin řeɛřamet n yisem nnes. ■
12 Aqa da ittban-dd ṣṣbar n imqeddasen,
inni itteṭṭfen di tweṣṣa n AREBBI
u di l’iman n Yeccu.” ■
13 Uca sřiɣ ict n tmijja tᵉttřaɣa-dd zeg ujenna, teqqar:
“Ari, sseɛd n imettinen inni i ɣa immuten di Siditneɣ, zi řexxu tsawent!”
“Wah, inna Arruḥ, maɣar ad areyyḥen zi řexdayem nsen!”,
aqa řexdayem nsen ad ten ḍfarent.
Tameyra n temmurt
14 Uca ẓriɣ, aqa ijj n useynu d acemřař uca x useynu iqqim xas wenni iǧan amecnaw ijj n mmis n bnadem, ɣares ttaj n wureɣ x uzeǧif nnes uca amjar iqḍeɛ deg ufus nnes. ■
15 Uca ijj n lmalak nneɣni iffeɣ-dd zi Zzawect Tameqqrant uca iřaɣa s jjehd x wenni iqqimen x useynu:
“Sekk-dd amjar nnek, mjar!
Aqa tasaɛɛet n tmeyra tiweḍ-dd!” ■
16 Uca wenni iqqimen x useynu, issekk-dd amjar nnes ɣar temmurt uca tᵉttwamjar temmurt.
17 Uca ijj n lmalak nneɣni iffeɣ-dd zi Zzawect Tameqqrant tenni deg ujenna, uřa d netta ɣares ijj n wemjar iqḍeɛ.
18 Uca ijj n lmalak nneɣni wenni ɣar teǧa ṣṣulṭa x tmessi, iffeɣ-dd zeg uɛalṭar uca iřaɣa-dd s jjehd x wenni ɣar iǧa wemjar iqḍeɛ, inna:
“Sekk-dd amjar nnek iqeḍɛen,
řqeḍ izekkunen n tzayarin n temmurt,
minzi aḍiř nnes aqa yiweḍ.”
19 Uca lmalak issekk-dd amjar nnes ɣar temmurt, iřqeḍ aḍiř n tzayart n temmurt, inḍar i-t di tsirt tameqqrant n weɣḍab n AREBBI. ■ 20 Ḥaryen di tsirt n uḍiř ař barra n tendint uca ruccen-dd idammen zi tsirt ařami iwḍen ɣar sřimat n yeysan, řqedd n ařef u-mitayen n ‘istadiyyen’, ixs ad yini ɛřaḥař mitayen u-ɛicrin kilumitr. □ ■