1 Uca dewřeɣ beddeɣ x ijdi ɣar tma n řebḥar, uca ẓriɣ ijj n řweḥc igeɛɛed-dd zi řebḥar, ɣares ɛecra n waccawen d sebɛa n izeǧifen. X waccawen nnes ɛecra n temrisin uca x izeǧifen nnes yuran xasen ijj n yisem n ttekfir. ^■   2 Řweḥc i ẓriɣ, yarwes deg uɣiřas, iḍaren nnes am iḍaren n ddub, axenfuc nnes am uxenfuc n wayrad. Řhaycet tewca as jjehd nnes d řɛarc nnes uřa d ṣṣulṭa imɣaren. 3 Ijjen zeg izeǧifen nnes igga axmi iyzem ař řmewt, xenni ittwasgenfa uyezzim nnes i iggin axmi iyezmen ař řmewt, uca marra tammurt teḍfar řweḥc s utebhet ameqqran. 4 Aqa nitni ɛebden řhaycet, minzi nettat tewca ṣṣulṭa i řweḥc, uca nitni ɛebden řweḥc, nnan: “Man wen yarwesen di řweḥc d man wen izemmaren ad kides immɛařan?” ^■   5 Immewc as i řweḥc aqemmum nni issawařen s ukebbar u s uceqqef di AREBBI, uca temmewc as ṣṣulṭa ḥima ad yegg ammu, i yijj n řqedd n tnayen u-arebɛin n iyuren. ^□  ■   6 Uca netta yarzem aqemmum nnes ḥima ad iceqqef di AREBBI, u ḥima ad iceqqef deg Yisem nnes u di Tzeddiɣt nnes, uřa di marra inni izeddɣen deg ujenna. 7 Immewc as ṣṣulṭa maḥend ad imneɣ ak-d imqeddasen u maḥend ad xasen iɣelleb. Temmewc as ṣṣulṭa x kuř taqbič d řgens d yiřes d ccuɛub. ^■   8 Marra inni tuɣa izeddɣen di temmurt ad t ɛebden, inni umi war yurin ismawen nsen deg Wedlis n Tudart n Yezmar wenni umi ittwaɣarṣ qbeř tamarsiwt n ddunect. ^■  

9 Wenni ɣar ǧan imezzuɣen, ejj i-t ad iseř.

10 Mařa din ijjen wenni issidfen ɣar tmeḥbast, ad ittwandeh netta s yixef nnes ɣar tmeḥbast. Inni inɣin s ssif, ad ttwanɣen s ssif. Aqa da ittban-dd ṣṣbar d l’iman n imqeddasen. ^■  

11 Xenni ẓriɣ ijj n řweḥc nneɣni igeɛɛed-dd zi temmurt, tuɣa ɣares tnayen n waccawen uca yarwes deg Izmar, maca issiweř amecnaw řhaycet. ^■  

12 Tuɣa iḥekkem s marra ṣṣulṭa n řweḥc amezwaru zzat i tiṭṭawin nnes, yarra-dd tammurt d imezdaɣ nnes marra ad ɛebden řweḥc amezwaru, wenni iggenfan zeg uyezzim nnes i iggin axmi iyzem ař řmewt. ^■  

13 Ittegg řeɛřamat timeqqranin ař dd-issehwa timessi zeg ujenna x temmurt qibač i tiṭṭawin n iwdan. ^■  

14 Ad iɣwa inni izeddɣen di temmurt s řeɛřamat i d as immewcen ḥima ad ten igg qibač i tiṭṭawin n řweḥc amezwaru, maḥend ad yini i yenni izeddɣen di temmurt ad kkaren ad ssbedden řexyař i řweḥc, wenni tuɣa iyzem s ssif uca iddar-dd ɛawed. ^■  

15 Uca immewc as ad igg ijj n arruḥ i řexyař n řweḥc, ḥima ad issiweř řexyař n řweḥc uca ad igg belli marra inni war iɛebbden řweḥc, ad ttwanɣen. ^■  

16 Uca ad igg belli ad immewc i marra ict n řeɛramet x ufus nsen afusi niɣ x tenyart nsen, i imeẓyanen d imeqqranen, i aytbab n wagřa d imezřaḍ, i iḥurriyyen d isemɣan, ^□  

17 uca ad igg belli uřa d ijj war izemmar ad iseɣ niɣ ad izzenz mɣir wenni ɣar teǧa řeɛřamet, d yisem n řweḥc niɣ nnumru n yisem nnes. ^■  

18 Danita teǧa tiɣit: wenni ɣar iǧa řeɛqeř, izemmar ad issen nnumru n řweḥc, minzi netta d nnumru n ijj n bnadem uca nnumru nnes d setta-mya u-setta u-settin. ^■