1 Xenni tᵉttwaẓar ict n řeɛřamet tameqqrant deg ujenna: ict n tmeṭṭut tyarḍ tafuct, u taziri sadu iḍaren nnes uca ɣares x uzeǧif nnes ijj n ttaj s tenɛac n itran. 2 Tuɣa teksi ddeyset, tesɣuyyu s řewjeɛ u s unezbar n tarut. 3 Xenni tᵉttwaẓar ict n řeɛřamet nneɣni deg ujenna, aqa din ict n řhaycet tameqqrant tazeggwaɣt am tmessi, ɣares sebɛa n izeǧifen d ɛecra n waccawen, uca x izeǧifen nnes sebɛa n temrisin ^□   4 uca akennas nnes ifarḍ ict n ttuřut n itran zeg ujenna, tessẓareyyeḍ i-ten ɣar temmurt. Uca řhaycet tuɣa tbedd zzat i tmeṭṭut i ɣa yarwen, ḥima ad tṣarḍ mmis nnes xmi t-i-dd i ɣa taruw.

5 Uca turuw-dd aḥenjir wenni i ɣa iḥekmen x marra řegnus s uzeǧaḍ n wuzzař, uca mmis immeksi deɣya ɣar AREBBI u ɣar řɛarc nnes. ^■   6 Maca tameṭṭut tarweř ɣar řexřa, ɣar mani tuɣa d as igga AREBBI amcan ḥima ad as sseccen, řqedd n wařef u-mitayn u-settin n wussan. ^■  

7 Uca ikkar umenɣi deg ujenna. Mixayil d lmalakat nnes mmenɣen ak-d řhaycet, uca uřa d řhaycet d lmalakat nnes menɣen, 8 maca nitni war jhiden ca uca war ittwifi ɛad wemcan deg ujenna i nitni. ^■   9 Temmenḍar-dd řhaycet tameqqrant, nettat d ufiɣar wenni tuɣa n zic, qqaren as ‘ibřis’ niɣ ‘cciṭan’, wenni iɣekkwan marra ddunect. Aqa temmenḍar-dd x temmurt uca lmalakat nnes mmenḍaren-dd akides. ^■  

10 Uca sřiɣ ict n tmijja deg ujenna teqqar s jjehd:

“Aqa yusa-dd weṣřaḥ d ṣṣulṭa d Tgeldit n AREBBI nneɣ,

minzi wenni iḍeřmen aytmatneɣ aqa immenḍar,

d wenni i ten iḍeřmen ass d ǧiřet,

11 Ɣellben xas s idammen n Izmar,

d wawař n cchadet nsen,

uca nitni war ssɛizzen ca tudart nsen ař řmewt.

12 X uyenni, farḥem, a ijenwan d yenni daysen izeddɣen!

Uct x temmurt d řebḥar,

ibřis aqa ihwa-dd ɣarwem s tefqeḥt nnes imɣaren aṭṭas,

issen ad ɣares iqqim drust n řweqt waha.” ^■  

13 Ařami řhaycet tufa ixef nnes temmenḍar ɣar temmurt, teḍfar tameṭṭut i dd-yurwen aḥenjir awtem.

14 Mmewcen as i tmeṭṭut tnayen n wefriwen n ugider ameqqran ḥima ad teḍuw ɣar wemcan nnes di řexřa, maḥend ad tᵉttwassecc dinni, ijj n wakud d ikuden d wezyen n wakud n řweqt, mani war tt iẓarr ufiɣar. ^□  ■  

15 Afiɣar issusef x tmeṭṭut zeg uqemmum nnes, igga ict n řḥemřet n waman am iɣzar, ḥima ad tt awyen waman.

16 Tammurt tɛawen tameṭṭut uca tarzem temmurt aqemmum nnes, teḥruw iɣzar wenni dd-issusfen řhaycet zeg uqemmum nnes.

17 Uca řhaycet txeyyeq aṭṭas x tmeṭṭut uca tuyur ḥima ad temmneɣ ak-d yenni iqqimen zi zzariɛet nnes uca ak-d inni itteṭṭfen di tweṣṣa n AREBBI u di cchadet n Yeccu. ^□