1 Uca immewc ayi ijj n uɣanim, igga am ijj n uqeṭṭab n řeɛbar, uca ibedd din Lmalak, inna: “Kkar uca ɛbar Zzawect n AREBBI d uɛalṭar d yenni dayes iɛebbden, ^□  ■   2 maca azzay wenni ɣar barra n Zzawect Tameqqrant, ejj i-t, war t ttɛebbar, minzi aqa immewc i řegnus uca nitni ad ɛefsen x tendint iqeddsen tnayen u arebɛin n iyuren. ^□  ■   3 Necc ad wceɣ ṣṣulṭa i tnayen n řechud inu, maḥend ad nebban s wawař n Arebbi ařef u mitayen u-settin n wussan, am yarḍen txancet n wecḍan.”

4 Nitni d tnayen n tzitunin d tnayen n řeqnadeř i ibedden zzat i wudem n SIDI n marra tammurt. ^■   5 Mařa din ca n yijjen ixs ad ten ihweř, ad dd-teffeɣ tmessi zeg uqemmum nsen uca ad tecc řɛedyan nsen. Ammu i ɣa ttwanɣen inni ixsen ad ten ḍarren. 6 Nitni ɣarsen ṣṣulṭa maḥend ad qqnen ajenna, ḥima war dd-iweṭṭi wenẓar deg wussan min di i ɣa nebban nitni, u ɣarsen ṣṣulṭa ḥima ad arren aman d idammen u ḥima ad seyyḥen tammurt s marra jjriḥect meřmi ma xsen. ^■  

7 Xmi i ɣa kemmřen cchadet nsen, ad dd-igeɛɛed řweḥc zi řaǧaɣ, ad kisen imneɣ, ad xasen iɣelleb uca ad ten ineɣ. ^■   8 Řxecbat nsen ad iřint deg wazzay n tendint tameqqrant umi qqaren s řmeɛna arruḥi nnes ‘Sadum d Miṣra’, mani nɣin Siditsen x ṣṣalib. ^■   9 Uca zi řegnus d tqebbař d iřsawen d ccuɛub ad ẓaren řxecbat nsen, řqedd n třata n wussan d wezyen, war ttejjin řxecbat nsen ad ttwammarsent deg imeḍřan.

10 Imezdaɣ n temmurt ad zzaysen farḥen, ad iřin mliḥ, ad arezfen ijjen ɣar wenneɣni, ad ad ssekken ikaduten i wayawya, minzi tnayen n inabiyyen-a tuɣa ɣezzan deg imezdaɣ n temmurt.

11 Maca awarni třata n wussan d wezyen yudef daysen buḥbeř n tudart zi AREBBI uca kkaren, bedden x iḍaren nsen u tewḍa-dd xasen Arruḥ n Tudart uca tiggʷudi temɣar tewḍa-dd x marra inni ten iẓrin. ^■  

12 Nitni sřen ict n tmijja tejhed tᵉttřaɣa zeg ujenna, teqqar asen: “Gaɛɛdem-dd da!” Uca nitni geɛɛden ɣar ujenna deg useynu uca řɛedyan nsen ẓrin ten.

13 Di tsaɛɛet nni imsar ijj n wenhezzi n temmurt d ameqqran. Ict n tɛeccart n tendint tehdem u sebɛa ařef n ismawen n iwdan mmuten s wenhezzi aya n temmurt. Wi iqqimen dewřen ggʷeden aṭṭas uca ssuɛřan zi AREBBI n ujenna.

14 ‘Xzar, tnayen n wuctat ɛdunt, uca xzar ‘Uct!’ wiss třata ad dd-yas deɣya. ^■  

15 Lmalak wiss sebɛa iṣuḍ di řbuq nnes uca kkarent-i-dd tmijjawin timeqqranin deg ujenna, ttřaɣant:

“Tagelda n ddunect aqa tedweř-dd ɣar AREBBI nneɣ u ɣar Lmasiḥ nnes, uca Netta ad iḥkem am Ujeǧid i řebda qaɛ.”

16 Arebɛa u ɛicrin n imɣaren, inni iqqimen zzat i AREBBI x řekrasi nsen igellden, uḍaren ɣar temmurt s uɣembub nsen uca ɛebden AREBBI,

17 nnan:

“Neccin nettqada Cek, a SIDI AREBBI, Amzemmar x kuřci,

Cek d wenni iǧan d wenni tuɣa,

aqa teksid jjehd nnek ameqqran deg ufus nnek,

uca tebdid ad tḥekmed am Ujeǧid. ^■  

18 Řegnus tuɣa xeyyqen xak, maca yusa-dd weɣḍab,

uca tiweḍ-dd řweqt ḥima ad ttwaḥasben imettinen

u ḥima ad temmewc řmunet i imsexxaren nnek,

inabiyyen, i imqeddasen

u i marra inni itteggʷeden Isem nnek,

am imeẓyanen am imeqqranen,

u ḥima ad ttwareyyben inni ittaredǧen tammurt.”

19 Nnurzment tewwura n Zzawect deg ujenna ařami ittwaẓar Ttabut n Řɛahd nnes di Zzawect nnes, uca kkaren wassamen d wajjajen d tmijjawin d inhezzan n temmurt uřa d ibquqen imeqqranen n tebruri. ^□  ■