1 Uca ẓriɣ ijj n Lmalak nneɣni, ihwa-dd zeg ujenna, tuɣa yarḍ aseynu uca tasřit n wenẓar tbedd as x uzeǧif. Aɣembub nnes igga am tfuct, iḍaren nnes am ipilaren n tmessi. ^■   2 Iṭṭef deg ufus nnes ijj n wedlis ittwannḍen ameẓyan yarzem. Issars aḍar nnes afusi x řebḥar, aḍar nnes azeřmaḍ x temmurt 3 uca iřaɣa s tmijja tejhed, am wayrad izehharen, uca awarni řami dd-iřaɣa, jjin sebɛa n wajjajen ad sřen tmijjawin nsen.

4 Řami kemmřen sebɛa n wajjajen nni awař nsen, tuɣa xseɣ ad t ariɣ, maca sřiɣ i yict n tmijja třaɣa-dd zeg ujenna wiss sebɛa: “Egg acemmiɛ x min nnan sebɛa n wajjajen, war t ttari ca.” ^■  

5 Lmalak nni tuɣa ẓriɣ ibedd x řebḥar d temmurt, iksi afus nnes ɣar ujenna ^■   6 uca ijjuǧ ɣar wenni iddaren i řebda qaɛ, wenni iggin ajenna d min dayes u tammurt d min dayes uřa d řebḥar d min dayes: “War teqqim bu řweqt ɛad! ^■   7 Maɣar deg wussan n lmalak wiss sebɛa xmi i ɣa iṣuḍ netta di řbuq nnes, ggur ad ikmeř ssirr n AREBBI nni tuɣa ittbarreḥ i imsexxaren nnes, inabiyyen.”

8 Uca tmijja i sřiɣ zeg ujenna tessiweř-dd ɣari ict n twařa nneɣnit, tenna: “Uyur, ksi adlis ittwannḍen yarezmen i iǧan deg ufus n Lmalak nni ibedden x řebḥar d temmurt.” 9 Uca uyureɣ ɣar Lmalak, ttareɣ as ad ayi iwc adlis ittwannḍen ameẓyan. Inna ayi: “Ksi t, teccid t uca ad issarzeg aɛeddis nnek, maca deg uqemmum nnek ad yiři d amiẓid am tamment.” ^■  

10 Necc ksiɣ adlis ameẓyan ittwannḍen zeg ufus n Lmalak uca cciɣ t. Tuɣa-t d amiẓid deg uqemmum inu, maca řami t cciɣ, yarzeg deg uɛeddis inu.

11 Xenni inna ayi: “Immewc as ɛad řweqt maḥend ad tnebbid i waṭṭas n řegnus d temmura d iřsawen d ijeǧiden.”