1 Xenni iṣuḍ wenni d wiss xemsa di řbuq nnes, uca ẓriɣ ijj n yetri iwḍa-dd zeg ujenna x temmurt, temmewc as tasarut n uqemmum n tesraft yuǧɣen. ^■   2 Uca yarzem tasraft uca igeɛɛed-dd ddexxan zeg uqemmum n tesraft, am ddexxan n tefqunt tameqqrant yareqqen, uca tfuct d řeɛwin barcnen zi ddexxan n tesraft. 3 Zi ddexxan ffɣen-dd zzayes iburexsen ɣar temmurt, temmewc asen ṣṣulṭa am tenni iǧan ɣar tɣarḍmiwin n temmurt. 4 Ittwanna asen, maḥend war jeyyḥen řeḥtic n temmurt uřa d qaɛ aɣemmuy aziza d qaɛ tacejjart, mɣir iwdan waha inni war ɣar iǧi ucemmiɛ n AREBBI x tenyart nsen. ^□  ■   5 Temmewc asen tzemmar maḥend war ten neqqen, maca ad ten ɛeddben řqedd n xemsa n iyuren, uca aɛeddeb nsen am uɛeddeb n tɣarḍent xmi tᵉtteqqes i bnadem.

6 Deg wussan nni ad arzun iwdan x řmewt, maca war tt ttᵉṭṭifen, uca ad ttaren ad mmten, maca řmewt ad zzaysen tarweř. ^■   7 Iburexsen ggin am iysan i iwejden i umenɣi, uca ɣarsen x izeǧifen nsen ca am ttajat axmi tent ggin s wureɣ, u iɣembab nsen am iɣembab n iwdan, ^■   8 uca acuwwaf nsen am ucuwwaf n temɣarin u tiɣmas nsen am tinni n wayraden, 9 u tuɣa ɣarsen tcappat x idmaren nsen am useřqi n wuzzař uca ddriz n wafriwen nsen am ddriz n ikarruten ak-d waṭṭas n iysan itteqnunnuyen ɣar umenɣi,

10 ɣarsen ikennasen am yenni n tɣarḍmiwin uca tuɣa din ijj n usennan deg ikennasen nsen. Uca ɣarsen ṣṣulṭa ḥima ad ssehwan druct x iwdan, řmijař n xemsa n iyuren.

11 Nitni ɣarsen lmalak n tesraft d ajeǧid xasen, qqaren as s Tɛibranit ‘Abaddu’, s Tramit ‘Cara’, u s Tgrigit ‘Apulliyun’, ixs ad yini ‘Amkeḥḥaḍ’.

12 Uct tamezwarut teɛdu, awarni man aya ad dd-asent ɛad tnayen n řewjeɛ. ^■  

13 Awarni man aya iṣuḍ lmalak wiss setta, uca sřiɣ tmijja i dd-yusin zi arebɛa n waccawen n uɛalṭar n wureɣ i ibedden qibač i AREBBI,

14 tenna i lmalak wiss setta i ɣar iǧa uyicc n icarri: “Fsiy i arebɛa n lmalakat nni icarfen ṭṭarf n yeɣzar ameqqran, Lfuraṭ.”

15 Uca arxun asen i arebɛa n lmalakat nni tuɣa iwejden dinni ɣar wass d uyur d useggʷas, ḥima ad nɣen ict n ttuřut n iwdan.

16 Tuɣa řqedd nsen tyuya n ɛecra-ařaf s ɛecra n řuřuf n imnayen, inni ineddhen iysan, uca sřiɣ mecḥař di ǧan. ^□  

17 Ammu i ẓriɣ iysan d yenni xasen inyin di tmeẓriwt-a: tuɣa ssduruyen idmaren nsen s wuzzař d azeggʷaɣ am tmessi d wezbaybi am weẓru n xalsidun d wewraɣ am řecbareyyet uca izeǧifen n iysan nni am izeǧifen n wayraden uca zeg iqemmumen nsen teffeɣ-dd zzaysen tmessi d ddexxan d řecbareyyet.

18 Aqa ict n ttuřut n iwdan tᵉttwaneɣ s třata aya n jjrayeḥ: s tmessi d ddexxan d řecbareyyet i dd-itteffɣen zeg iqemmumen nsen.

19 Minzi ṣṣulṭa nsen aqa-tt deg iqemmumen d ikennasen nsen, minzi ikennasen nsen ggin am ifiɣran nni ɣar iǧa izeǧifen, uca ttjeyyḥen zzaysen iwdan.

20 Iwdan iqqimen, inni war ittwanɣen ca s jjrayeḥ-a, war tuben ca zi řexdayem n ifassen nsen ařami war ɛebbden ɛad ccwaṭen d l’aṣnam n wureɣ d nnuqart d nnḥas d weẓru d ukeccuḍ, inni war ittwiřin, war ittesřin, war igguren, ^■   21 uca nitni war tuben ca zeg wenɣay nsen, řa zi tseḥḥart nsen, uřa zi farq-ccɣeř nsen.