1 Ařami yarzem Yezmar acemmiɛ wiss sebɛa, tuɣa ajenna yarsa ɛřaḥař azyen n tsaɛɛet.

2 Uca ẓriɣ sebɛa n lmalakat inni ibedden zzat i AREBBI uca immewc asen sebɛa n waccawen n uyicc n icarri.

3 Aqa ijj n lmalak nneɣni yusa-dd, yuyur ad ibedd ɣar sennej n uɛalṭar s ict n teqduḥt n wureɣ i řebxur. Immewc as waṭṭas n řebxur ḥima ad t iwehheb ak-d tẓaǧitin n marra imqeddasen x uɛalṭar n wureɣ qibač i řɛarc. 4 Uca ddexxan n řebxur ak-d tẓaǧitin n imqeddasen tuɣa ittgeɛɛad zeg ufus n lmalak ɣar zzat n AREBBI. ^■  

5 Lmalak iksi taqduḥt n řebxur, iccur i-tt s tmessi zeg uɛalṭar uca inḍar i-t ɣar temmurt uca usin-dd wajjajen d tmijjawin d wassamen d ijj n wenhezzi n temmurt.

6 Uca ḥezzmen sebɛa n lmalakat inni ɣar iǧa sebɛa n waccawen n uyicc n icarri ḥima ad daysen ṣuḍen.

7 Uca iṣuḍ umezwaru di řbuq nnes, uca tewḍa-dd tebruri d tmessi xeǧḍent ak-d waman, ttwamenḍarent x temmurt, uca ict n ttuřut n temmurt d ict n ttuřut n tcejjura tᵉttwasscemḍent uca marra řeḥtic n temmurt tᵉttwassecmeḍ.

8 Xenni iṣuḍ wenni d wiss tnayen di řbuq nnes, uca ca n tmesřact am wedrar ameqqran icemmḍen, immenḍar di řebḥar uca ict n ttuřut n řebḥar idweř d idammen, 9 u ict n ttuřut n imuddaren di řebḥar inni ɣarsen řeɛmar, mmuten, uca ict n ttuřut n iɣarruba tareddeǧ. ^□  

10 Xenni iṣuḍ wenni d wiss třata di řbuq nnes, uca iwḍa-dd ijj n itri ameqqran zeg ujenna, yurɣa am weṣfeḍ, u iwḍa-dd x ict n ttuřut n iɣezran u x tařawin n waman.

11 Itri aya qqaren-as ‘Absint’, ixs ad yini ‘Cciḥ’. Uca ict n ttuřut n waman tedweř tarzeg am ‘Absintus’, uca mmuten aṭṭas n yewdan s waman umi dewřen d imerzagen amecnaw ‘cciḥ’. ^□  

12 Xenni iṣuḍ wenni d wiss arebɛa di řbuq nnes, uca tᵉttwaṭṭef ict n ttuřut n tfuct d ict n ttuřut n tziri d ict n ttuřut n itran, ařami tbbarcen ict n ttuřut zzaysen, war tᵉttiři ɛad tfawt i yict n ttuřut n uziř uca ammu uřa di ǧiřet.

13 Uca sřiɣ ijj n ugider iṭṭaw-dd di řwest n ujenna, iqqar: “Uct, uct, uct x yinni izeddɣen x temmurt x ssibbet n tmijjawin inneɣni n waccawen n icarri n třata n lmalakat i ɣa iṣuḍen ɛad daysen.