Acemmiɛ n Arebbi iddaren
7
1 Awarni man aya ẓriɣ arebɛa n lmalakat bedden ɣar arebɛa n tɣemmura n temmurt, ṭṭfen arebɛa n iṣemmiḍen n temmurt, ḥima war ittṣuḍi usemmiḍ řa x řbarr řa x waman uřa x ca n tcejjart. □ 2 Uca ẓriɣ ijj n lmalak nneɣni yuři-dd manis d tneqqar tfuct, aqa ɣares acemmiɛ n AREBBI iddaren uca iřaɣa s jjehd i arebɛa n lmalakat nni umi temmewc tzemmar ḥima ad ssexsaren tammurt d řebḥar, 3 inna: “War ttsexsarem tammurt uřa d aman uřa d ticejjura ař ɣa negg acemmiɛ x tenyarin n imsexxaren n AREBBI nneɣ.” 4 Uca sřiɣ řqedd n yinni ittwacemmɛen, mya u-arebɛa u-rebɛin-ařef aqa ttwacemmɛen zi marra tiqebbař n Israil: ■
5 tenɛac-ařef zi teqbič n Yahuda,
tenɛac-ařef zi teqbič n Rubin,
tenɛac-ařef zi teqbič n Gad,
6 tenɛac-ařef zi teqbič n Acir,
tenɛac-ařef zi teqbič n Naftali,
tenɛac-ařef zi teqbič n Manassa,
7 tenɛac-ařef zi teqbič n Cimɛun,
tenɛac-ařef zi teqbič n Lawi,
tenɛac-ařef zi teqbič n Isakkar,
8 tenɛac-ařef zi teqbič n Zibulun,
tenɛac-ařef zi teqbič n Yusuf,
tenɛac-ařef zi teqbič n Binyamin.
Řɣaci ameqqran zi řegnus
9 Awarni man aya aqa ẓriɣ ijj n ubarru n řɣaci ameqqran, i war izemmar uřa d ijj ad t iḥseb, zi kuř řgens u zi kuř taqbič u zi marra ccuɛub d iřsawen. Nitni bedden zzat i řɛarc d yezmar, arḍen řeɛbayat tizirarin d ticemřařin, uca ɣarsen tiseḍwin n tini deg ifassen nsen,
10 uca ttřaɣan s jjehd:
“Aṣřaḥ ittiři i AREBBI nneɣ,
wenni iqqimen x řɛarc
u i Yezmar.”
11 Uca marra nitni, lmalakat inni dd-innḍen i řɛarc d imɣaren d arebɛa n imeddaren, aḍaren ɣar temmurt s wudmawen nsen qibač i řɛarc,
12 nnan:
“Amin!
Asemɣar d uɛuǧi d tiɣit d uqadi
d ccan d jjehd d tzemmar
i AREBBI nneɣ i řebda qaɛ.
Amin!”
13 Xenni yarra-dd ijjen zeg imɣaren nni, inna ayi: “Min ɛnan ina, inni yarḍen řeɛbayat tizirarin d ticemřařin, min ɛnan u manis dd-usin?”
14 Necc nniɣ as: “A sidi inu, cek i issnen.” Inna ayi: “Ina aqa usin-dd zi řmeḥnet tameqqrant. Aqa nitni ṣizdigen řeɛbayat nsen uca arrin tent d ticemřařin deg idammen n Izmar.
15 S uyenni nitni bedden zzat i řɛarc n AREBBI uca sexxaren as ass d ǧiřet di Zzawect, uca wenni iqqimen x řɛarc ad xasen iwwet Aqiḍun nnes.
16 War iqqim ɛad ad ǧaẓen niɣ ad ffaden, war ten tᵉttqeddi uřa d tfuct uřa d ict n jjurret n řeḥmu, ■
17 minzi Izmar nni iǧan di řwest n řɛarc ad ten yarwes, ad ten indeh ɣar Tudart u ɣar tařawin n waman, uca Netta ad asen imseḥ kuř ameṭṭa zi tiṭṭawin nsen.” ■