1 Uca ẓriɣ umi Izmar ifsi ijjen zi sebɛa n icemmiɛen, uca sřiɣ i yijjen zi arebɛa n imeddaren iqqar s ict n tmijja am wajjaj: “As-dd, xzar!” 2 Xenni sřiɣ u ẓriɣ, u xzar ijj n uyis d acemřař, d wenni xas inyin ɣares ijj n řqewṣ n fřitca uca immewc as ijj n ttaj uca iffeɣ-dd, iɣřeb, ittɣellab u maḥend ad iɣřeb. ^■  

3 Ařami yarzem acemmiɛ wiss tnayen, sřiɣ i umuddar wiss tnayen, iqqar: “As-dd!” 4 Uca iffeɣ-dd ijj n uyis d azeggʷaɣ, uca wenni xas inyin, ggin t ḥima ad ikkes řehna x temmurt, ḥima ad kkaren iwdan ad ɣarṣen i wayawya uca immewc as ijj n ssif imɣar.

5 Ařami yarzem acemmiɛ wiss třata, sřiɣ i umuddar wiss třata iqqar: “As-dd!” Xzar, ijj n uyis d abarcan, d wenni xas inyin ɣares ijj n řmizan deg ufus nnes. 6 Zi řwest n imeddaren sřiɣ i yict n tmijja teqqar: “Ijj n řmud n yirden s yijj n dinar u třata n řemdud n imendi s yijj n dinar, uca zzect d binu war ten ttḍiyyiɛem ca!” ^■  

7 Ařami yarzem acemmiɛ wiss arebɛa, sřiɣ i tmijja n umuddar teqqar: “As-dd!” 8 Uca ẓriɣ ijj n uyis d asnabi, d wenni xas inyin, qqaren as: ‘Řmewt’, uca teḍfar i-t řaxart. Temmewc asen ṣṣulṭa x ijj n arbeɛ n temmurt ḥima ad nɣen s ssif, s řaẓ, s řmewt u s řewḥuc n temmurt. ^□  

9 Ařami yarzem acemmiɛ wiss xemsa, ẓriɣ sadu uɛalṭar řeɛmur n yinni ittwanɣen di ṭṭweɛ n wawař n AREBBI u di ṭṭweɛ n cchadet n Yeccu i tuɣa ɣarsen. ^■  

10 Nitni řaɣan s jjehd, nnan: “A SIDI, a Amqeddas d Bab n tidett, mecḥař i ɣa teqqimed war tḥekkmed, war ttneqmed ca i idammen nneɣ zeg inni izeddɣen di temmurt?”

11 Uca wcin i kuř ijjen zzaysen řeɛbayat d ticemřařin, u ittwanna asen belli ad areyyḥen drus ař ɣa ikemmeř lɛadad n imsexxaren nsen d wawmaten nsen, inni i ɣa ittwanɣen ɛawed am nitni.

12 Uca ẓriɣ ařami yarzem acemmiɛ wiss setta, aqa imsar ijj n wenhezzi n temmurt d ameqqran u tafuct tedweř d tabarcant am ict n txancet n wecḍan uca taziri tmun tegga am idammen, ^■  

13 uca itran n ujenna wḍan-dd ɣar temmurt amecnaw artu immenḍar iqurraɛ nnes xmi t-i-dd iɣeṭṭeř ijj n usemmiḍ d ameqqran. ^□  

14 Ajenna immeksi am ijj n wedlis ittwannḍen nneḍen t, uca kuř adrar d marra tegzirin ttwakksen zeg imucan nsen.

15 Ijeǧiden n temmurt d imeqqranen d yenni d imeqqranen x wařef d aytbab n wagřa d yenni ɣar teǧa ṣṣulṭa d kuř ismeɣ d aḥurri, aqa nitni ssnuffaren ixef nsen deg ifran u jar řejruf n idurar,

16 nnan i idurar d řejruf: “Wḍam-dd xaneɣ, ffarem aneɣ zeg wudem n Izmar, ^■  

17 minzi ass ameqqran n weɣḍab nnes aqa yusa-dd, man wen izemmaren ad iqqim ibedd?”