Adlis ittwannḍen d Yezmar
5
1 Uca ẓriɣ deg ufus afusi n wenni iqqimen x řɛarc ijj n wedlis ittwannḍen, tuɣa xas tira ɣar daxeř d barra, uca adlis tuɣa ittwacemmeɛ s sebɛa n icemmiɛen. ■ 2 Uca ẓriɣ ijj n lmalak ijhed nneɣni, ittřaɣa s jjehd: “Man wen isdaheǧen ad yarzem adlis-a ittwannḍen uca ad ikkes icemmiɛen nnes?” 3 Uca uřa d ijj deg ujenna niɣ di temmurt niɣ sadu temmurt izemmar ad yarzem adlis-a ittwannḍen u ad ikkes icemmiɛen nnes, ad dayes ixzar. ■ 4 Necc ruɣ aṭṭas umi war ufin wi isdaheǧen ad yarzem adlis-a ittwannḍen u ad yarzem icemmiɛen nnes. 5 Ijjen zeg imɣaren inna ayi: “War ttru ca! Xzar Ayrad zeg ayt n Yahuda, Aẓwar n Dawud, aqa iɣelleb ḥima ad yarzem adlis-a ittwannḍen u ḥima ad yarẓ icemmiɛen nnes.” ■ 6 Uca ẓriɣ di řwest n řɛarc d arebɛa n imeddaren uca di řwest n imɣaren, ijj n Izmar ibedd, igga axmi d taɣarṣt. Netta ɣares sebɛa n waccawen d sebɛa n tiṭṭawin, nitni d sebɛa n Arruḥat n AREBBI inni dd-ittwassekken ɣar ddunect tmun. □ ■ 7 Aqa Netta yusa-dd uca iksi adlis ittwannḍen zeg ufus n wenni tuɣa iqqimen x řɛarc.
8 Ařami iṭṭef adlis ittwannḍen, wḍan-dd arebɛa n imeddaren d arebɛa u-ɛicrin n imɣaren ɣar temmurt zzat i Yezmar. Nitni marra idsen ɣarsen ict n lgambri d ṭṭbaṣa n wureɣ ccurent s řebxur: man aya d tiẓaǧitin n imqeddasen. ■ 9 Uca ɣennjen ijj n izři n jdid:
“Cek tesdaheǧed ad teksid adlis ittwannḍen,
ad tekksed icemmiɛen nnes,
minzi Cek tᵉttwaɣarṣed
uca s idammen nnek tesɣid aneɣ i AREBBI,
zi kuř taqbič d yiřes d řgens d cceɛb. ■
10 Cek tarrid ten d tgelda d ikehhanen i AREBBI nneɣ,
u nitni ad ḥekmen am ijeǧiden x temmurt.” ■
11 Xenni ẓriɣ, uca sřiɣ tmijja n waṭṭas n lmalakat nnḍent i řɛarc u n imeddaren u n imɣaren, uca tuɣa aten ɛecra-ařaf di ɛecra n řuřuf u ařaf di řuřuf, ■
12 qqaren s tmijja ijehden:
“Izmar wenni ittwaɣarṣen isdaheǧ ad iṭṭef
ṣṣulṭa d wagřa d tiɣit,
d jjehd d ccan d uɛuǧi,
d lbaraka!” ■
13 Uca marra wi iǧan deg ujenna u x temmurt d sadu temmurt u x řebḥar, wah qaɛ min iǧan daysen, sřiɣ asen, qqaren:
“Aqadi d ccan d uɛuǧi d ṣṣulṭa
ad iřin i wenni iqqimen x řɛarc u i Yezmar,
i řebda qaɛ!”
14 Uca umi arebɛa n imeddaren nnan: “Amin!”, wḍan imɣaren ɣar temmurt, sejden.