1 Awarni man aya, xzar, ict n tewwart tennurzem deg ujenna. Uca tmijja tamezwarut i sřiɣ akidi dd-issawařen am ijj n uṣuḍi deg uyicc n icarri, tenna: “As-dd da sennej uca ad ac ssecneɣ min ggur ad imsar awarni man aya.”

2 Řexdenni ireḥḥef ayi-dd Arruḥ, u xzar, ijj n řɛarc ibedd deg ujenna, tuɣa Netta iqqim xas, 3 u tifras n Wenni xas iqqimen amecnaw aẓru n yaspis d sardiyus, uca tasřit n wenẓar tenneḍ-dd i řɛarc, tᵉttban amecnaw aẓru n smaraxt.

4 Quwwaren as i řɛarc arebɛa u ɛicrin n řekrasi igellden uca arebɛa u-ɛicrin n imɣaren tuɣa qqimen x řekrasi igellden, arḍen arruḍ acemřař, ɣarsen x uzeǧif ttajat n wureɣ.

5 Uca zi řɛarc nni tteffɣen-dd zzayes wajjajen d assamen d tmijjawin. Zzat i řɛarc areqqent sebɛa n iṣefḍawen, tina d sebɛa n Arruḥat n AREBBI.

6 Ɣar zzat n řɛarc tuɣa din amecnaw řebḥar n zzaj, axmi d aẓru n ukristal. Di řwest n řɛarc d min d as dd-innḍen tuɣa din arebɛa n imeddaren, ɛemmaren s tiṭṭawin marra ɣar zzat d ḍeffar. ^■   7 Ameddar amezwaru yarwes deg wayrad, ameddar wiss tnayen deg uyenduz, ameddar wiss třata tuɣa aɣembub nnes axmi n bnadem uca ameddar wiss arebɛa yarwes deg ugider iṭṭawen. 8 Arebɛa n imeddaren, kuř ijjen weḥḥdes zzaysen ɣares setta n wafriwen ɛemmaren s tiṭṭawin ɣar barra d daxeř, u war aressin ass d ǧiřet, nnan:

“Amqeddas, amqeddas, amqeddas d SIDI AREBBI,

Amzemmar x kuřci

d Wenni tuɣa d Wenni iǧan d Wenni dd ɣa yasen.” ^■  

9 Uca xmi i ɣa wcen arebɛa n imeddaren aɛuǧi d ccan d uqadi i wenni iqqimen x řɛarc, d wenni iddaren i řebda qaɛ, - Amin! - ,

10 xenni arebɛa u ɛicrin n imɣaren wḍan ɣar temmurt ɣar zzat n wenni iqqimen x řɛarc, sejden i wenni iddaren i řebda qaɛ, - Amin! - , uca ssarsen ttajat nsen ɣar zzat i řɛarc, nnan:

11 “Cek, a Siditneɣ d AREBBI nneɣ, tesdaheǧed ad teksid

aɛuǧi d ccan d jjehd,

maɣar Cek d wenni iggin marra timesřayin-a,

u aqa atent din u ttwaxeřqent s řxaḍar nnek!” ^■