1 Umi war nzemmar ad t neṣbar ktar, tuɣa ittɣiř aneɣ mliḥ maḥend ad neqqim di Atina weḥḥedneɣ, 2 uca nessekk awem-dd umatneɣ Timutiyu. Netta d amsexxar n AREBBI d amɛawen nneɣ di tbarreḥt n Řexbar Aṣebḥan n Lmasiḥ, ařami izemmar ad kenniw issejhed u ad iqeǧeb l’iman nwem, ^■   3 ḥima uřa d ijj zzaywem war iqeṭṭeɛ řayas zi ssibbet n řemḥayem-a. Aqa kenniw tessnem simant nwem, belli nettwagg i man aya, ^■   4 minzi, řami d aneɣ tuɣa akidwem, nizzar nenna, belli ad xaneɣ tekk řeḥṣaret uca ammu i imsar am mammec tessnem kenniw. 5 S uyenni, umi war zemmareɣ ad ṣbareɣ ktar, aqa ssekkeɣ t-i-dd ḥima ad ssneɣ x l’iman nwem, ma ad taɣ wenni ittjarraben aqa ijarreb kenniw uca ad teffeɣ řxedmet nneɣ d walu.

6 Maca řexxu idweř-dd ɣarneɣ Timutiyu wenni zzaywem uca issiweḍ aneɣ-dd řexbar aṣebḥan n l’iman nwem d tayri nwem, aqa kenniw řebda tᵉttidarem aneɣ s řxar zi marra iɣezdisen u daywem meẓri maḥend ad aneɣ tẓarem, am mammec uřa d neccin dayneɣ meẓri ad kenniw nẓar. 7 S uyenni nettwafewwej zzaywem, a awmaten, di marra tamara nneɣ d řemḥayem nneɣ, zi ssibbet n l’iman nwem. 8 Uca řexxu neddar, mařa kenniw tbeddem nican di Siditneɣ. 9 Mammec i ɣa negg ad nqada AREBBI zi ssibbet nwem x marra řefraḥet i zi nfarreḥ zzaywem,

10 mɣir umi nettᵉttar AREBBI ǧiřet d wass s waṭṭas, ḥima ad kenniw nẓar s uɣembub uca ad nkemmeř min itteḥdaja ɛad l’iman nwem. ^■  

11 Maca Babatneɣ u Siditneɣ Yeccu Lmasiḥ, Netta ad iseggem abrid nneɣ ɣarwem.

12 Netta ad ikettar u ad yarni di tayri nwem n ijjen i wenneɣni, u tayri nwem i marra, am mammec nettexs neccin uřa i kenniw,

13 uca ad ismeḥḥed uřawen nwem, ḥima ad tiřim břa řɛib di tqeddast qibač i AREBBI Babatneɣ, x minni dd ɣa yas Siditneɣ Yeccu Lmasiḥ ak-d marra imqeddasen nnes. ^■