1 Beddem nican di tiřelli i zi d aneɣ ifekk Lmasiḥ uca war ttdekkwiřem ɛawed maḥend ad teksim azayřu n tesmuɣi. ^■  

2 Aqa ayi necc Bulus ad awem iniɣ, mařa tᵉttwaxetnem, Lmasiḥ war kenniw ineffeɛ deg walu. ^■   3 Ɛawed cehhdeɣ i marra bnadem i ɣa ittwaxetnen, aqa netta s umarwas ḥima ad igg marra min iǧan di Ccariɛa. 4 Kenniw inni ittexsen ad ttwaseggdem s Ccariɛa, aqa tdewřen tarxum zi Lmasiḥ uca zi arḍa i zi dd-tewḍam. 5 Minzi neccin nettraja asitem n tsegda s Arruḥ nni iǧan zi l’iman. 6 Maɣar di Yeccu Lmasiḥ, axtan niɣ břa axtan war isekkwi walu, maca l’iman nni ittwakemmřen s tayri. ^■  

7 Kenniw tuzzřem mliḥ, wi kenniw imenɛen ařami war tᵉṭṭiɛem ɛad i tidett? ^■   8 Ṭwaɛ-a war iǧi zeg wenni d awem ittřaɣan. 9 Cwayt n wentun issmemm marra arecti. ^■  

10 Necc ttiqqeɣ daywem di Siditneɣ, aqa war tecɣiřem ixef nwem uřa s ict n řḥajet nneɣnit, d wenni kenniw ittseddaɛen, aqa ad yarbu řḥukm, man wen ma iɛna netta. ^■  

11 A aytma, mařa necc barrḥeɣ kenniw ɛad s wextan, mayemmi ɛad i ɣa ttwamarrteɣ? Ma tᵉttwakkes taɛenkrift n ṣṣalib? ^■  

12 Maɛlik qaɛ qessen ixef nsen inni kenniw iqellqen. ^■  

13 Minzi kenniw i tiřelli umi dd-tᵉttwařaɣam, a aytma, maca war ttqeǧbem tiřelli amecnaw lfurṣa i ddat, maca sexxarem ijjen i wenneɣni s tayri. ^■  

14 Minzi marra Ccariɛa tkemmeř s yijj n wawař, aqa d manaya: “Ad texsed amqarreb nnek amecnaw ixef nnek.” ^■  

15 Maca mařa tzeɛfem u tmezzqem ijjen wenneɣni, xenni ḥḍam ixef nwem war ttᵉttem ca ayawya qaɛ. ^■  

16 Maca necc ad awem iniɣ: Uyurem di Arruḥ uca war ttkemmřen ca nnecwat n ddat! ^■  

17 Minzi ddat ittemɣer ḍidd n Arruḥ uca Arruḥ ḍidd n ddat, minzi nitni ttbeddan ak-d wayawya, x uyenni war tzemmarem ad teggem min texsem. ^■  

18 Maca mařa tᵉttwagewwdem s Arruḥ, war teǧim ɛad sadu Ccariɛa.

19 Řexdayem n ddat banent, aqa atent d zzina d řexmej d farq-ccɣeř ^□  ■   20 d uɛbad i l’aṣnam d tseḥḥart d řeɛdawet d umcebbec d řeḥsed d tefqeḥt d uɣewweɣ d ubeṭṭu d tɣuriwin i dd-itteffɣen zeg webrid, ^□   21 d tusmi d wenɣay d uɣelli d řefsed uřa d timesřayin nneɣnit am tina. Inni iceɣřen ixef nsen ak-d tmesřayin-a, aqa izwareɣ nniɣ t, u ad t iniɣ ɛawed, aqa nitni war warrten ca Tageldit n AREBBI. ^■  

22 Maca řɣiǧet n Arruḥ aqa-tt d tayri d řefraḥet d řehna d ttasiɛ n řxaḍar d řeḍrafet d tcuni d l’iman d temhint uřa d ṣṣbar. ^■   23 Ccariɛa war teǧi ḍidd n tmesřayin-a. ^■   24 Maca inni iǧan zi Lmasiḥ aqa ṣellben ddat nsen ak-d marra ccehwat d nnecwat. ^■   25 Ejj aneɣ ad neddar s Arruḥ u ad nsellem ixef nneɣ i Arruḥ. 26 War d aneɣ tejji ad niři břa ccan am i ɣa nesseḥqar ijjen wenneɣni uca ad nasem ijjen zeg wenneɣni.