1 Bulus iqceɛ deg inni iqqimen di Lmeḥkama Tameqqrant, inna: “A iryazen tawmat! Aqa necc uyureɣ s tnefsect teṣfa zzat i AREBBI ař ass-a!” ^■   2 Ananiyas, arrays n ikehhanen, yumur inni i tuɣa din akides ibedden, ad t wten ɣar uqemmum. ^■   3 Xenni inna as Bulus: “Ad cek iwwet AREBBI, cek d řḥiḍ ijiyyaren! Aqa cek teqqimed da maḥend ad xafi tḥekmed ɛlaḥsab Ccariɛa, maca txařafed Ccariɛa s yixef nnek am tumured ad ayi wten!” ^■   4 Inni i tuɣa kis ibedden, nnan: “Ma tdeǧmed arrays n ikehhanen n AREBBI?” 5 Inna Bulus: “A tawmat, war ssineɣ aqa-t d Akehhan, minzi tura: ‘Azeǧif n řgens nnek war t ttzawar!’ ” ^■  

6 Umi issen Bulus, aqa azyen zzaysen d Iṣaduqiyyen u wenneɣni zeg Ifarisiyyen, iřaɣa di Lmeḥkama Tameqqrant n Wudayen: “A iryazen tawmat, necc d Afarisi, mmis n Ifarisiyyen, necc tᵉttwaḥakameɣ di ssibbet n usitem d tnukra n imettinen.” ^■   7 Ařami inna aya, imsar ijj n uxarweḍ jar Ifarisiyyen d Iṣaduqiyyen uca ittwabḍa řɣaci, 8 minzi Iṣaduqiyyen qqaren belli war teǧi ca d tanukra niɣ d lmalakat uřa d buḥbeř, maca Ifarisiyyen cehden x man aya s tnayen. ^■   9 Bdan sɣuyyun aṭṭas u ca n imseřmaden n idlisen zeg wezyen n Ifarisiyyen kkaren, ttemnaqacen akidsen s jjehd, nnan: “War nufi uřa d ijj n řɣar di bnadem-a. Mařa issiweř akides ijj n buḥbeř niɣ ijj n lmalak, man řɛib iǧan xenni di man aya?” ^■  

10 Umi ikkar ijj n uxarweḍ ameqqran, iggʷed ukumandar ad mezzqen Bulus. Xenni yumur iɛeskariyyen Irumaniyyen maḥend ad dd-asen, ad t xeḍfen zi řwest nsen, uca ad t awyen ɣar lqecla.

11 Di ǧiřet awarni as iḍhar-dd Siditneɣ i Bulus, inna as: “Egg uř, minzi am mammec xafi tcehded di Urcalim ammu i ɣa tcehded uřa di Ruma!” ^■  

12 Ařami d iṣbeḥ řḥař, munen ca n yeryazen zeg Wudayen, qqnen ixef nsen s ict n nneɛřet maḥend war ttᵉtten war sessen ař d nɣen Bulus. ^■  

13 Ktar zi arebɛin n yeryazen kksen wawař-a s ict n tjaǧit.

14 Ina ruḥen ɣar imeqqranen n ikehhanen d imɣaren n řgens, nnan: “Aqa neqqen ixef nneɣ s ict n nneɛřet maḥend war nᵉttett walu ař ɣa nenneɣ Bulus.

15 Xenni, kenniw uřa d imeqqranen n Lmeḥkama Tameqqrant n Wudayen, ttarem zeg ukumandar ad t-i-dd-indeh ɣarwem axmi texsem ad txebbcem di tmesřact-a mliḥ. Aqa neccin newjed ḥima ad t nenneɣ qbeř ma ad ɣarwem dd-yaweḍ.”

16 Isřa mmis n učmas n Bulus x texceft-a, xenni yudef ɣar lqecla uca ixebbar Bulus x man aya.

17 Iřaɣa Bulus i yijjen zeg iqebṭanen x mya, inna as: “Ruḥ s ubřiɣ-a ɣar ukumandar minzi ɣares ca ad as t yini.”

18 Iksi řqebṭan x mya, uca iwyi t ɣar ukumandar, inna: “Bulus, ameḥbus, iřaɣa ayi-dd, ittar ayi ad ac awyeɣ abřiɣ-a i ɣar iǧa ca ad ac t ini.”

19 Iṭṭef i-t ukumandar s ufus, iddur zzayes weḥḥdes uca isseqsa t: “Min ɣarek ad ayi t tinid?” 20 Inna as ubřiɣ: “Aqa Udayen arezzun ad zzayek ttaren maḥend ad dd-tessehwid Bulus tiwecca ɣar Lmeḥkama Tameqqrant n Wudayen, axmi xsen ad t sseqsan ɛad. ^□  ■   21 War ten ttiqqi, minzi ktar zi arebɛin n yeryazen zzaysen ggin as taxceft, qqnen ixef nsen s ict n nneɛřet maḥend war ttᵉtten war sessen ař t nɣen. Aqa nitni wejden řexxu, ttrajan ad tewced ttesriḥ nnek.” 22 Akumandar ijja abřiɣ ad iraḥ, inna as: “War qqar i ḥed, aqa tessaregbed ayi x man aya.”

23 Xenni iřaɣa-dd ɣares x tnayen n iqebṭanen x mya, inna: “Sewjdem mitayen n iɛeskariyyen maḥend ad raḥen ɣar Qayṣariya ɣar třata n ǧiřet, akidsen sebɛin n yinni inyin x yiysan u mitayen n yinni yarebbun lansa s ufus ufusi. 24 Ejj i-ten ad ssewjdem ict n zzayřet maḥend ad xas ssɣimen Bulus, ad t nedhen ɣar lɛamil Filiks di řaman.” 25 Xenni yura ict n tebrat, iwca asen tt. Ammu i dayes yura:

26 “Kludiyus Lisiyas, i lɛamil yuɛřan Filiks: Sřam xak!

27 Udayen aqa ṭṭfen aryaz-a u tuɣa xsen ad t nɣen. Wciɣ as afus ak-d ict n terbiɛt n iɛeskariyyen Irumaniyyen uca fekkeɣ t umi sřiɣ aqa-t d Arumani. ^■   28 Minzi tuɣa xseɣ ad ssneɣ min xef t ḍeřmen, iwyeɣ t ɣar Lmeḥkama Tameqqrant nsen. 29 Ufiɣ aqa ḍeřmen t di ssibbet n ca n tmesřayin n Ccariɛa nsen, maca war din ufiɣ aḍřam i isdaheǧen řmewt niɣ iceddiyyen. 30 Umi d ayi ittwanna, belli Udayen nwan ad as ggen taxceft, ssekkeɣ t-i-dd řexdenni ɣarek, umureɣ i yenni t iḍeřmen maḥend ad ac inin zzatek mi xef t ḍeřmen. S ttisir!”

31 Iɛeskariyyen Irumaniyyen ksin Bulus, am mammec d asen yumur, uca iwyen t s ǧiřet ɣar tendint n Antipatris. 32 Tiwecca nnes jjin inni inyin x yeysan ad ɛeqben iɛeskariyyen imeddukkař nsen x iḍaren ɣar lqecla. 33 Xenni iwyen t ɣar Qayṣariya, wcin tabrat i lɛamil uca ssbedden Bulus zzates. 34 Awarni řami iɣra tabrat nni, isseqsa x man jjihet i zi dd-yusa netta uca yufa belli netta yusa-dd zi Kilikiya. 35 Inna as: “Ad ac sřeɣ mařa uřa d yenni i cek iḍeřmen iwḍen-dd da!” Xenni yumur ad t ḥḍan di taddart n ccreɛ n Hirudus, umi qqaren ‘Prituriyum’.