1 ... “A iryazen tawmat d ibabaten, sřem i min d awem ɣa iniɣ x udafeɛ inu.” 2 Umi sřin, aqa issawař akidsen s yiřes n Tɛibranit, qqimen sqaren ɛad ktar. Inna asen: 3 “Necc d ijj n bnadem d Uday, xeřqeɣ-dd di Tarsus di Kilikiya, maca arebbiɣ di tendint-a ɣar iḍaren n Gamaliyal u ttwassřemdeɣ ɛlaḥsab tidett nican n Ccariɛa n řejdud nneɣ. Ceṭṭareɣ x min iǧan n AREBBI am mammec uřa d kenniw marra. ^■   4 Necc tuɣa ḍeffareɣ Abrid-a s řmewt am carrfeɣ iryazen d temɣarin, ttsellameɣ ten ɣar řeḥbes. ^■   5 Arrays n ikehhanen d marra imɣaren n řgens zemmaren ad cehden belli ksiɣ tibratin i tawmat, maḥend ad ruḥeɣ ɣar Dimacq ḥima ad awyeɣ inni din iǧan ɛawed s tcarfin ɣar Urcalim ḥima ad ṭṭfen řḥukm s řmewt.

6 Umi d ayi tuɣa deg webrid u gguɣ ad awḍeɣ ɣar Dimacq ɣar wezyen n wass, tenneḍ ayi-dd s řɣefřet ict n tfawt temɣar zeg ujenna. ^■   7 Wḍiɣ x temmurt, sřiɣ ict n tmijja, teqqar ayi: ‘Cawul, Cawul, mayemmi d ayi tdarrced?’ 8 Arriɣ xas: ‘Min teɛnid Cek, a Sidi?’ Inna ayi: ‘Necc d Yeccu, Nnaṣiri, wenni tᵉttdarrced!’ 9 Iryazen nni tuɣa iǧan akidi, ẓrin tafawt, maca war sřin ca i tmijja n wenni akidi issawařen. ^■  

10 Nniɣ: ‘Min i ɣa ggeɣ, a Sidi?’ Inna ayi Siditneɣ: ‘Kkar, traḥed ɣar Dimacq, din ad ac ittwanna x marra min d ac yuran ad tegged!’

11 Umi dewřeɣ war ttwiřiɣ zi tissiqt n tfawt nni, gewwden ayi inni i tuɣa akidi iǧan zeg ufus, uca ammu i dd-iwḍeɣ ɣar Dimacq.

12 Tuɣa din ijj weryaz, qqaren as Ananiyas. Netta d amsegged ɛlaḥsab Ccariɛa, am mammec tuɣa xas cehhden marra Udayen. ^■  

13 Netta yusa-dd ɣari, inna ayi: ‘A uma Cawul, arzem tiṭṭawin nnek!’ Řexdenni di tsaɛɛet nni ttwarzment tiṭṭawin inu, uca ẓriɣ t.

14 Netta inna ayi: ‘Aqa AREBBI n řejdud nneɣ ixḍar i cek, ḥima ad tessned min ixs Netta, u ḥima ad tẓared Amseggad, ad tesřed tmijja nnes zeg uqemmum nnes.

15 Cek ad as tiřid d acehhad ɣar marra iwdan s marra min teẓrid u s min tesřid.

16 Iwa řexxu, mayemmi war tezɛimed ɛad? Kkar, ejj ad cek ssɣeḍṣen, ad ttwasirden ddnub nnek am tᵉttřaɣid x Yisem nnes!’

17 Awarni řami dd-ɛeqbeɣ, iwḍeɣ da ɣar Urcalim, uca am tuɣa ttẓaǧiɣ di Zzawect Tameqqrant,

18 ẓriɣ t deg ijj n řewḥiy, inna ayi: ‘Azzeř, teffɣed deɣya zi Urcalim minzi war qebbřen ca cchadet nnek xafi!’ ^■  

19 Nniɣ necc: ‘A Sidi, aqa nitni ssnen belli tuɣa ttḥebbseɣ inni yumnen zzayek, hettkeɣ ten s urekkuḍ di temzidawin, ^■   20 u řami ttwasizzřen idammen n ucehhad nnek Stifanus, tuɣa beddeɣ akidsen, arḍiɣ x yenni ixsen ad t nɣen u ḥḍiɣ arruḍ n yinni t yarejmen.’ ^■   21 Xenni inna ayi: ‘Ruḥ, minzi ad cek ssekkeɣ ɣar řaggʷaj ḥima ad tbarrḥed i řegnus!’ ^■  

22 Tuɣa ttesřan as ař awař-a, xenni kkaren ssgeɛɛden tmijja nsen, qqaren: ‘Kksem t zi temmurt, minzi amecnaw wa war isdiheǧ ad iddar.’ ” ^■   23 Am tuɣa sɣuyyun, neṭṭaren arruḍ nsen, uca zuzzaran ucař ɣar ujenna. 24 Yumur ukumandar maḥend ad t ssidfen ɣar lqecla, ad t sseqsan am t tthettaken s urekkuḍ ḥima ad zzayes ifhem mayemmi xas sɣuyyen ammu. 25 Umi t jebden s tḥezzanin i uhettek s urekkuḍ, inna Bulus i řqebṭan x mya i din ibedden: “Ma iḥeǧeř awem ɛlaḥsab ccariɛa nwem ad thettkem ijj n bnadem d Arumani s urekkuḍ am war xas teḥkimem ɛad?”

26 Umi isřa řqebṭan x mya man aya, iruḥ ɣar ukumandar, inna as: “Min i ɣa tegged? Aqa aryaz-a d Arumani!” 27 Iqarreb-dd ɣares ukumandar, inna as: “Ini ayi, ma cek d Arumani?” Yarra-dd xas Bulus: “Wah!” 28 Yarra-dd xas ukumandar, inna: “Necc ṭṭfeɣ řḥeqq-a n umezdaɣ Arumani s ijj n řqedd d ameqqran n tmenyat!” Bulus inna: “Maca necc xeřqeɣ-dd zzayes!” 29 Řexdenni, inni tuɣa nwan ad t hettken s urekkud, jjin t. Akumandar idweř iggʷed, minzi ifhem aqa-t d Arumani u minzi ijja i-t ad t carfen. 30 Tiwecca nnes am tuɣa ixs ad issen tidett mi xef t ḍeřmen Wudayen, ifsi iceddiyyen nnes uca yumur ad ssmunen imeqqranen n ikehhanen d marra Lmeḥkama Tameqqrant n imeqqranen n Wudayen, uca issehwa-dd Bulus ɣar din, issbedd i-t di řwest nsen. ^□