1 Awarni xemsa n wussan ihwa Ananiyas, arrays n ikehhanen, ak-d imɣaren n řgens u ak-d ijj n weryaz s řhard iṣebḥen, qqaren as Tartulus, uca xebbaren lɛamil x Bulus. ^■   2 Umi xas dd-řaɣan, iqarreb-dd Tartulus ɣar zzat maḥend ad t iḍřem, inna:

“Aqa zzayek ɣarneɣ iǧa řehna tameqqrant u ssiyasa nnek aqa tiwi-dd aṭṭas n řxar i řgens-a i dd-yiwyen ssahřa, 3 u di kuř amcan marra neccin neqbeř tcuni nnek, a sidi Filiks yuɛřan. 4 Maca ḥima war cek hekkweřeɣ aṭṭas, ttareɣ zzayek ad aneɣ tesřid deɣya cwayt s řxaḍar nnek. 5 Minzi nufa belli bnadem-a aqa-t d ijj n řeḥřac, ittsebbeb aɣuwweɣ jar marra Udayen di mkuř tammurt, minzi netta d azeǧif n tebridt n Inaṣiriyyen. 6 Netta tuɣa yarezzu ɛawed maḥend ad issexmej Zzawect Tameqqrant nneɣ, xenni neṭṭef i-t uca tuɣa nexs ad xas neḥkem s Ccariɛa nneɣ. ^■   7 Maca akumandar Lisiyas yusa-dd di řwest s uhettek aṭṭas, iksi t jar ifassen nneɣ, issekk i-t ɣarek, 8 uca yumur maḥend inni ixsen ad t ḍeřmen, ad ɣarek dd-asen. Mařa t tesseqsid, ad tfehmed zzayes s yixef nnek marra mi xef t neḍřem.”

9 Udayen sɣuyyun xas, nnan: “Man aya ammu i iǧa!”

10 Xas uca iceyyar lɛamil i Bulus maḥend ad issiweř. Bulus yarra-dd, inna:

“Necc ssneɣ belli cek d řqaḍi x řgens-a i yijj n řmijař n waṭṭas n iseggʷusa, s uyenni ad wteɣ x yixef inu s teryast ktar.

11 Am mammec i ɣa yiři tessned cek, aqa ɛdun mɣir tenɛac n wussan waha zeg wami geɛɛdeɣ ḥima ad ɛebdeɣ di Urcalim.

12 Nitni war d ayi ufin di Zzawect Tameqqrant ttemnaqaceɣ ak-d ca n ijjen niɣ ssmuneɣ ijj n ubarru n řgens, war iǧi di temzidawin nsen, war iǧi di tendint nsen. ^■  

13 Nitni war zemmaren ad ssbiyynen min zi d ayi ḍeřmen řexxu.

14 Maca man aya ad ac neɛmeɣ, belli ɛebbdeɣ AREBBI n řejdud inu x řeḥsab n tebridt nni x ssawařen, minzi umneɣ marra min yurin di Ccariɛa u deg inabiyyen,

15 am ɣari asitem di AREBBI, - am mammec uřa d nitni ttrajan tt - , aqa ad din tiři tnukra zi taddart n imettinen, tanukra n imseggaden uřa d tanukra n yinni war iseggden.

16 Ammu uřa d necc tteggeɣ tizemmar deg ixef inu ḥima ad ɣari tiři řebda tnefsect teṣfa zzat i AREBBI u zzat i iwdan. ^■  

17 Aṭṭas n iseggʷusa usiɣ-dd maḥend ad awyeɣ ṣṣdaqi i řgens inu u maḥend ad awyeɣ tiɣarṣin. ^■  

18 Aqa iwdan-a ufin ayi di Zzawect Tameqqrant awarni řami ttwassizdegeɣ, am war din ɣari řɣaci niɣ d axarweḍ. ^■  

19 Maca Udayen nni dd-yusin zi Asiya, inni issekkaren iwdan, aqa ittxeṣṣa ad ḥḍaren da akidi zzatek maḥend ad ayi ttahmen mařa ɣarsen ca xafi. 20 Niɣ ad inin ina i da ibedden man řɛib i dayi ufin umi beddeɣ zzat i Lmeḥkama Tameqqrant nsen, 21 mɣir awař-a i tuɣa řaɣiɣ umi beddeɣ jar asen: ‘Ass-a ttwaḥekmeɣ zzatwem di ssibbet n tnukra n imettinen!’ ” ^■  

22 Umi issen Filiks Abrid-a mliḥ, issbedd i-ten, inna: “Xmi dd ɣa yas ukumandar, ad kemmřeɣ aseǧi ɣar min din jar awem.” 23 Xas uca yumur i řqebṭan x mya ḥima ad iḥḍa Bulus s cwayt n lḥurriya ktar u war imenneɛ uřa d ijj zeg inni iǧan nnes ad xas sexxaren. ^■  

24 Awarni ca n wussan ijja Filiks d Drusilla, tamɣart nnes d Tudact, ad dd-awyen Bulus uca sřan zzayes x liman di Lmasiḥ. 25 Ařami yiweḍ řhard x tsegda d ḍḍebṭ n nnefs u x lḥisab i dd ɣa yasen, iggʷed Filiks, inna as: “Ruḥ řexxu! Xmi ɣari i ɣa yiři řweqt, ad ac-dd řaɣiɣ.” 26 Netta tuɣa issitim ɛawed maḥend Bulus ad as iwc tmenyat ḥima ad as iḍřeq. S uyenni tuɣa xas dd-iřaɣa aṭṭas n twařawin ḥima ad kis issiweř.

27 Maca umi kemmřen tnayen n iseggʷusa, yareḥḥeb Filiks s Purkiyus Fastus wenni t i ɣa ixeřfen. Umi tuɣa Filiks ixs ad yarḍa Udayen, ijja Bulus di snaseř di řeḥbes.