1 Řami tuɣa Apullus di Kurintus, icuqq Bulus di jjwayeh yuɛřan n temmurt, yiweḍ-dd ɣar Afasus, uca ibda ittseqsa imeḥḍaren i din yufa. ^■   2 Isseqsa ten: “Ma tqebřem Arruḥ Iqeddsen řami tumnem?” Nitni arrin-dd xas, nnan: “War nesři qaɛ belli din Arruḥ Iqeddsen.” 3 Xas uca inna asen: “Xenni min zi tᵉttwasɣeḍṣem?” Nnan as: “S useɣḍeṣ n Yuḥanna!” 4 Xenni inna Bulus: “Tuɣa Yuḥanna isseɣḍaṣ řgens s useɣḍeṣ n ttubet, iqqar asen ittxeṣṣa ad amnen s wenni i dd ɣa yasen awarni as, aqa Netta d Yeccu Lmasiḥ.” ^■   5 Awarni řami sřin timesřayin aya, ttwasɣeḍṣen deg Yisem n Siditneɣ Yeccu Lmasiḥ. 6 Awarni řami xasen issars Bulus ifassen, ihwa-dd xasen Arruḥ Iqeddsen, uca bdan ssawařen s ijj n yiřes nneɣni uca bdan ttnabben. ^■   7 Tuɣa-ten qaɛ tenɛac n yeryazen.

8 Yudef Bulus ɣar temzida, issawař akidsen teřt n iyuren s teryast, ittḥeddat ɣarsen, yarezzu ad ten isseqnaɛ di min itthemman Tageldit n AREBBI.

9 Maca řami dewřen ca zzaysen qesḥen, war ṭṭiɛen, ceqqfen deg Webrid n AREBBI zzat i řɣaci, xenni iggʷej xasen uca issbeɛɛed xasen imeḥḍaren, ibda issawař akidsen kuř ass di temzida n ijj n weryaz qqaren as Tirannus. ^■  

10 Ammu i yegga tnayen n iseggʷusa ařami marra inni tuɣa izeddɣen di Asiya, sřin Awař n SIDI, am Udayen am Iramiyyen.

11 Tuɣa AREBBI ittegg řeɛjayeb imeqqranen s ifassen n Bulus, ^■  

12 ařami ksin řemḥamat n řeqṭen d westawen n ibuyas i iǧan arruḍ x arrimet nnes, ssarsen ten x imehřac, uca xenni ruḥent xasen řehřacat u řaryaḥ imengas ffɣen zzaysen.

13 Maca tuɣa din ɛawed ca n Wudayen inni tuɣa igguren di temmurt, tuɣa ssuffuɣen ccwaṭen. Nitni ttɛezzmen x yenni di iǧa řaryaḥ aɛeffan s Yisem n Siditneɣ Yeccu, qqaren: “Neccin nettɛezzem xak s Yisem n Yeccu i zi ittbarreḥ Bulus.”

14 Inni t iggin, aqa nitni d sebɛa n tarwa n Skiwa, wenni d ijj n umeqqran n ikehhanen d Uday.

15 Maca cciṭan yarra-dd, inna asen: “Yeccu ssneɣ t uřa d Bulus ssneɣ t, maca min teɛnam kenniw?”

16 Uca bnadem i di iǧa řaryaḥ d aɛeffan ingez xasen, iɣeřb i-ten, inḍar i-ten x temmurt uca ijhed xasen ařami arewřen zi taddart d iɛaryanen d iyezmen.

17 Řexbar-a iffeɣ-dd ɣar marra Wudayen d Iramiyyen inni izeddɣen di Afasus. Tewḍa-dd ict n tiggʷudi temɣar x marra nitni uca ittwassemɣar Isem n Siditneɣ Yeccu Lmasiḥ.

18 Aṭṭas n yinni yumnen usin-dd, neɛmen s min tuɣa tteggen. ^■  

19 Aṭṭas n iseḥḥaren yarwen idlisen nsen, sscemmḍen ten zzat i marra. Nitni ggin asen řeḥsab uca ufin belli ssekkwan xemsa-ařaf n řewzan n nnuqart. 20 Ammu tuɣa liman n AREBBI iggam, yarenni di jjehd. ^■  

21 Ařami kemmřent tmesřayin-a, igga Bulus s Arruḥ, awarni řami icuqq di Makiduniya d Axaya, ḥima ad isafar ɣar Urcalim, inna: “Xmi din i ɣa reḥḥgeɣ, ittxeṣṣa ayi ad ẓareɣ Ruma ɛawed.” ^■   22 Issekk tnayen n yinni tuɣa ixeddmen akides ɣar Makiduniya, ina d Timutiyu d Irastus, maca netta simant nnes tuɣa iqqim din ɛad ca n řweqt di Asiya.

23 Di řweqt nni ikkar din ijj n uxarweḍ war iǧi drust x ssibbet n Webrid n AREBBI. ^■   24 Minzi tuɣa din ijj n usiyaɣ n nnuqart, qqaren as Dimitriyu, wenni tuɣa ittṣennaɛ tizawiyyin timeẓyanin n Artimis di řeqwařeb, yarbeḥ i ayt n ṣṣenɛet nnes ijj n arbeḥ d ameqqran. ^■   25 Issmun-dd ayt n ṣṣenɛet nnes ak-d inni ixeddmen akidsen, inna asen: “A iryazen, kenniw tessnem belli marra arbeḥ nneɣ yusa-dd ak-d ṣṣenɛet-a. 26 Kenniw tesřim u tessnem belli Bulus wanita isseqnaɛ aṭṭas n iwdan, war iǧi inni zi Afasus waha, maca uřa d ibarruten n marra Asiya, aqa issbeɛɛed i-ten x řexyařat, iqqar: ‘Irebbiten i ittwaggen s ifassen war ǧin ca d irebbiten!’ ^■   27 War teǧi tsebbabt-a waha di lxaṭar uca teggur ad tedweř d ict n tmesřact ibeṭṭřen, maca uřa d zzawect n Artimis tarebbit tameqqrant ad tt ḥesben d walu uca ad isseḥqar tarebbit-a i tɛebbed temmurt n Asiya uřa d marra řegnus.”

28 Umi tt sřin, dewřen xeyqqen aṭṭas. Sɣuyyun, nnan: “Tameqqrant d tarebbit Artimis n Ifasusiyyen!” 29 Tandint qaɛ txarweḍ am tekmeř uca uzzřen ɣar umesgun am ijj n bnadem, uca Xayus d Aristarxus, iryazen zi Masiduniya, inni d imɛacaren n Bulus deg usafar nnes, ṭṭfen ten s jjehd uca iwyen ten-dd akidsen. ^■   30 Uřa d Bulus tuɣa ixs ad yadef ɣar lmesraḥ, maca imeḥḍaren nnes war t jjin. 31 Uřa d ca n imḍebbaren n jjwayeh n Asiya, inni tuɣa aten d imeddukkař nnes, ttaren zzayes ḥima war ittidef ɣar umesgun.

32 Řɣaci deg umesgun tuɣa d ijj n uxarweḍ marra. Nitni sɣuyyun ijj i wenneɣni, maɣar azyen ameqqran zzayes war issin mixef tuɣa munen. 33 Řɣaci n Wudayen i din iǧa, nedhen ijj n weryaz ɣar zzat, qqaren as Aliksandir. Netta ikkar, iceyyar s ufus nnes, u tuɣa ixs ad issiweř s jjehd x udafeɛ zzat i řgens. 34 Maca umi fehmen belli aqa-t d Uday, sɣuyyen marra s tmijja d icten ɛřaḥař tnayen n tsaɛɛetin: “Tameqqrant d Artimis n Ifasusiyyen!”

35 Lwali n tendint isshedden řɣaci, inna: “A iryazen n Afasus, man wen war issinen belli tandint n Ifasusiyyen tḥeṭṭa x zzawect n Artimis u x řexyař i dd-iwḍan zeg ujenna! 36 S uyenni, umi war izemmar uřa d ijjen ad iɛekkes timesřayin-a, icuwwar awem ad tarsem, war tteggem ca s uqeǧeq, 37 minzi tiwyem-dd iryazen-a danita, inni war iǧin d iceffaren n tzawiyyin uřa řa d nitni war ttceqqafen di trebbit nneɣ. 38 Maca mařa tuɣa ɣar Dimitriyu u ɣar yenni iǧan akides di ṣṣenɛet ca n ucetci x yijjen, aqa din ijj n lɛamil di tendint. Ejj i-ten ad qarrben u ad carrɛen ak-d wayawya din. 39 Maca mařa texsem ca n tmesřact i war iɛeddřen zi jjihet n ccariɛa, ittxeṣṣa ad ittwaqḍa wegraw, 40 minzi aqa aneɣ di lxaṭar ad xaneɣ ḥekmen ass-a s uɣuwweɣ, minzi war din bu řesbab i zi nzemmar ad dd-narr s yijj n wawař di tmesřact n uxarweḍ-a deg wass-a, minzi nessmuna di řbaṭeř u nettɣewweɣ amenni waha.” 41 Awarni řami inna aya, ismeḥ i wegraw ad yuyur.