1 Awarni man aya ijja Bulus tandint n Atina, yusa-dd ɣar Kurintus. 2 Yufa din ijj n Wuday qqaren as Akwila. Wanita yiweḍ-dd din zi Punṭus, yusa-dd drus zeg wami zi Iṭalya, ak-d Priskilla, tamɣart nnes, minzi qayṣar Kludiyus tuɣa yumur maḥend marra Udayen ad ffɣen zi Ruma. Uca yusa-dd Bulus ɣarsen. ^■   3 Umi tuɣa ɣarsen ṣṣenɛet d icten, iqqim ɣarsen, ixeddem akidsen, minzi nitni tuɣa aten di ṣṣenɛet nsen d imɛicwen tteggen iqiḍan. ^■   4 Tuɣa ittḥeddat kuř ssebt di temzida, yarezzu ad isseqneɛ Udayen d yenni zi řegnus inneɣni maḥend ad amnen.

5 Umi dd-ihwa Silas d Timutiyu zi Makiduniya, ssbedden Bulus zeg ubarreḥ n Wawař minzi Udayen tuɣa ttḍaddan t, ttceqqfen dayes umi iched aqa Yeccu Netta d Lmasiḥ. ^■   6 Izzerz taɛejjact zeg warruḍ nnes, inna asen: “Zi řexxu ttbariɣ ixef inu zzaywem, uca ad raḥeɣ ɣar řegnus.” ^■   7 Iruḥ ssenni uca yusa-dd ɣar taddart n ijj n weryaz qqaren as Titus wenni tuɣa iɛebbden AREBBI. Tuɣa taddart nnes teřṣeq ak-d temzida. 8 U Krispus, ameqqran x temzida, yumen di Siditneɣ ak-d marra řeḥbab n taddart nnes uca aṭṭas n Ikurintiyyen umi d as sřin, umnen di AREBBI, ttwassɣeḍṣen. ^■  

9 Xenni inna SIDI i Bulus deg ict n tmeẓriwt: “War tteggʷed, siweř, war ttseqqara, ^■  

10 minzi Necc akidek uca uřa d ijj war izemmar ad cek iḍarr, minzi ɣari aṭṭas n iwdan di tendint-a!”

11 Uca iqqim din ijj n useggʷas d setta n iyuren, isseřmad asen awař n AREBBI.

12 Maca umi tuɣa Ɣaliyun lwali x Axaya, kkaren Wudayen am ijj n weryaz x Bulus uca iwyen t-i-dd ɣar řkursi n ccreɛ,

13 nnan: “Wa isseqnaɛ iwdan maḥend ad ɛebden AREBBI s řɛeks n Ccariɛa.”

14 Umi ittar Bulus ttesriḥ maḥend ad yarzem aqemmum nnes, inna Ɣaliyun i Wudayen: “Mařa tusim-dd da zi ssibbet n ijj n ufturi niɣ n ijj n řɣecc niɣ n ict n tmesřact taɛeffant nneɣni, a Udayen, xenni ggur ad kenniw qebřeɣ s řḥeqq.

15 Maca mařa din ixarwiḍen di ssibbet n ijj n wawař niɣ n ca n ismawen niɣ di ssibbet n Ccariɛa nwem, ḥḍam t kenniw s yixef nwem, minzi necc war xseɣ ad iřiɣ d řqaḍi x tmesřayin-a!”

16 Uca yuẓẓeř xasen zi řkursi n ccreɛ.

17 Řexdenni ṭṭfen marra lkuffar Sustinis, amɣar n temzida, wtin t qibač i řkursi n ccreɛ, maca Ɣaliyun war d as icqi man aya qaɛ.

18 Awarni řami iqqim Bulus din ɛad aṭṭas n wussan, iweddeɛ tawmat uca ibeḥḥar ssenni ɣar Suriya u Priskilla d Akwila ruḥen akides. Netta tuɣa iḥeff azeǧif nnes di Kinxriyus, minzi tuɣa ijjaǧ ict n tjaǧit. ^■  

19 Umi dd-iwḍen ɣar Afasus, yudef Bulus ɣar temzida, tuɣa ittḥeddat Udayen. 20 Řami zzayes ttaren ad kisen iqqim ktar, yugi. 21 Netta inna: “Ittxeṣṣa nican ad ɛeyydeɣ Řɛid i dd ɣa yasen di Urcalim. Maca ad ɣarwem dd-ɛeqbeɣ ɛawed mařa ixs AREBBI!” Uca ijja Akwila d Priskilla di Afasus. ^■   22 Icuqq řebḥar uca yiweḍ-dd ɣar Qayṣariya, igeɛɛed ɣar Řɛid di Urcalim, iseǧem x tmesmunt, xenni isafar ɣar Antiyuxiya.

23 Ařami din isseɛdu ijj n řmijař n řweqt d azirar, iffeɣ uca icuqq di temmurt n Galaṭiya d Frixiya, issemḥeḍ imeḥḍaren marra.

24 Ijj n weryaz, qqaren as Apullus, zi Iskandariyya, netta tuɣa d ijj n weryaz issen ad issiweř, ittḥaka deg idlisen iqeddsen, yusa-dd ɣar Afasus. ^■   25 Wa tuɣa ittwaseřmed deg webrid n SIDI, tuɣa-t s arruḥ imeḥḍen, issawař u isseřmad timesřayin n Yeccu s cḍaret, waxxa netta war issin mɣir aseɣḍeṣ n Yuḥanna. 26 Ibda issawař s bṭayṭay di temzida. Řami d as sřin Akwila d Priskilla, iwyen t-i-dd ɣarsen uca ssfehmen as abrid n SIDI marra. 27 Ařami tuɣa ixs ad isafar ɣar Axaya, cejjɛen t wawmaten, urin ɣar imeḥḍaren ad t qebřen mliḥ. Umi dd-yiweḍ wa ɣar din, iɛawen s arḍa n Arebbi marra inni tuɣa yumnen. ^■   28 Minzi netta tuɣa isseřmad Udayen zzat i ubarru n iwdan s waṭṭas n jjehd, issbeyyen asen zeg Idlisen belli Yeccu Netta d Lmasiḥ.