1 Ẓwan x Amfipulis d Apulluniya, iwḍen ɣar Tissalunika mani tuɣa ict n temzida n Wudayen. 2 Bulus yudef-dd din ɣarsen, am tuɣa d lqaɛida nnes. Di třata n wussan n ssebt issiweř akidsen zi Tira Iqeddsen. 3 Iffessar u issbeyyen asen ammu: “Tuɣa ittxeṣṣa i Lmasiḥ ad ittwaweddeb u ad dd-ikkar zi taddart n imettinen. Aqa Netta d Yeccu Lmasiḥ min xef d awem barrḥeɣ.” ^■   4 Ca zzaysen umnen, munen ak-d Bulus d Silas, uřa d ijj n řɣaci d ameqqran zeg Iyunaniyyen inni itteggʷeden AREBBI, uřa d timɣarin icenɛen war iǧi drust zzaysent, ^■  

5 Maca Udayen dewřen ttasmen, nedhen ca n yeryazen iɛeffanen zeg ibriden n tendint, ssgeɛɛden ijj n řɣaci, sshajan tandint uca ssekkaran ten ḍidd n taddart n Yasun, arzun ad ten gewwden zzat i iwdan. 6 Umi war ten ufin, jarren Yasun d ca n wawmaten qibač i imḍebbaren n tendint, sɣuyyun: “Ina inni issɣewwɣen tammurt marra, aqa usin-dd ɛawed da! ^■   7 Yasun issidef i-ten ɣares d inewjiwen, waxxa nitni marra ttɛekksen tiwṣeyyat n qayṣar, qqaren aqa da ajeǧid nneɣni, aqa-t d Yeccu.” ^■   8 Ssarejfen imḍebbaren n tendint d řgens umi sřin aya. 9 Maca awarni řami ṭṭfen řɛarbun zi Yasun d yinneɣni, arxun asen.

10 Řexdenni ssekken tawmat Bulus d Silas ɣar Biriya s ǧiřet. Umi din iwḍen, ruḥen ɣar temzida n Wudayen, ^■  

11 minzi Udayen dinni tuɣa aten xar zeg inni i yeǧan di Tissalunika, minzi tuɣa xsen ad sřen i Wawař kuř ass, arezzun ad ssnen zeg Idlisen ma timesřayin-a aqa tent amenni. ^■  

12 Aṭṭas zzaysen zeg Wudayen nni umnen, uřa d aṭṭas n temɣarin d yeryazen zeg Iyunaniyyen.

13 Maca, umi Udayen n Tissalunika ssnen belli Bulus tuɣa ittbarreḥ Awař n AREBBI ɛawed di Biriya, usin-dd nitni ɛawed din maḥend ad ssɣewwɣen u ad ssxarewḍen imezdaɣ n tendint. ^■  

14 Xas uca ssekken wawmaten Bulus řexdenni ɣar řebḥar, maca Silas d Timutiyu qqimen din.

15 Inni issqebḍen Bulus, iwyen t ɣar Atina. Xenni, umi t jjin, ṭṭfen zzayes ict n tebrat i Silas d Timutiyu maḥend nitni ad ɣares dd-asen deɣya. ^■  

16 Am ten tuɣa ittraja Bulus di Atina, tuɣa arruḥ nnes ixeyyeq umi iẓra tandint teccur s řexyařat n l’aṣnam.

17 S uyenni tuɣa issawař di temzida ak-d Wudayen uřa ak-d yenni itteggʷeden AREBBI uřa di ssuq kuř ass ak-d inni i tuɣa ittaf dinni.

18 Ɛad ca n ifaylasufen zi temzida n Ipikurus u ca nneɣni, qqaren as Istuwakiyyen, mnaqacen akides. Ca zzaysen nnan: “Min ixs ad yini wanita s řhard-a qaɛ?” Maca inneɣni nnan: “Iḍhar-dd aqa-t d ambarreḥ n irebbiten iɣriben, minzi tuɣa ittbarreḥ asen s Yeccu d tnukra nnes zeg imettinen.

19 Uca iwyen t, nedhen ɣar ijj n wemcan qqaren as Ariyupagus, nnan: “Ma iɛeddeř ad nessen man taɣuri n jdid i xef tessawařed?”, 20 minzi cek tiwyed ca n tmesřayin tiɣribin i imezzuɣen nneɣ, u neccin nexs ad nessen min ixs ad yini man aya.” 21 Marra inni zi Atina d marra ibarraniyyen inni din iqqimen, sseɛdun řweqt mɣir ḥima ad xebbaren u ḥima ad sřen ict n řḥajjet n jdid.

22 Ikkar-dd Bulus, ibedd di řwest n Ariyupagus, inna: “A iryazen n Atina, ufiɣ belli kenniw tceɣřem deg weɛbad n ccwaṭen zi kuř aɣezdis. 23 Minzi umi nnḍeɣ di tendint nwem, ẓriɣ tizawiyyin nwem, ufiɣ ɛawed ijj n uɛalṭar zemmen xas: ‘I AREBBI i war ittwassnen’. S uyenni wenni tɛebbdem kenniw, am war t tessinem, d Wa i zi d awem ttbeccareɣ. 24 Minzi AREBBI wenni dd-yejjin ddunect d marra min dayes, wenni iǧan d Sidi n ujenna d temmurt, war izeddeɣ ca di tudrin i ittwaggen s ifassen n iwdan, ^■   25 uřa war xas ittwasexxar s ifassen n iwdan axmi Netta iḥwaj ca, minzi Netta simant nnes iwca i mkuř bnadem tudart d nnefs nnes. ^■   26 Zeg idammen n yijjen igga marra řegnus n bnadem ḥima ad zedɣen x wudem n temmurt marra, u s řumur nnes iḥedd asen ikuden n řweqt d iymiren n tzeddiɣt n iwdan, ^■   27 ḥima ad arzun x AREBBI u ad zzayes ttaren, ad taɣ ad t afen s marra min zzayes ittwaggen, maɣar Netta war iggʷij ca aṭṭas x kuř ijjen zzayneɣ. 28 Minzi neccin dayes i neddar u dayes i nettenhezza, uca, am mammec nnan ca n imiɣisen nwem inni iǧan jar awem: ‘Aqa neqqars-dd zzayes Netta!’ 29 S uyenni, am dd-iqqars bnadem zi AREBBI, ittxeṣṣa war nḥesseb ca belli AREBBI amecnaw ureɣ d nnuqart uřa amecnaw aẓru i ittwaggen s lfenn u zeg uxarraṣ n bnadem. ^■   30 AREBBI xenni, ijja ad ɛdun ikuden n uɣekkwi, maca di řweqt-a ad yumur i marra iwdan: ‘Ittxeṣṣa i kuř ijjen di kuř amcan ad dd-idweř ɣar AREBBI!’ ^■   31 Minzi Netta igga ijj n wass i di i ɣa iḥkem x marra tammurt s řḥeqq s ijj n Bnadem i yixḍar. Netta iɛeyyen i-t maḥend marra ad zzayes yamen, řami t-i-dd-issnekkar zi taddart n imettinen.”

32 Umi sřin x tnukra zi taddart n imettinen, bdan sthezzan s manaya, maca inneɣni nnan: “Ict n twařa nneɣni ad zzayek nseř ktar x man aya.” 33 Ammu iffeɣ Bulus zi řwest nsen. 34 Ca zzaysen ḍfaren t, umnen. Jar asen Diyunisiyus, wenni iqqimen x Ariyupagus, d ict n temɣart qqaren as Damaris u inneɣni akidsen.