1 Řami dd-yusa ɣar tneddam n Dirbi d Listra, tuɣa din ijj n umeḥḍar qqaren as Timutiyu. Tuɣa netta d mmis n ict n temɣart d tudact d řmumina, maca babas d Aramiyu. ^□   2 Tawmat n Listra d Ikuniya cehden xas s řxar. 3 Bulus tuɣa ixs wa ad isafar akides. Xenni iksi t uca ixten as, minzi Udayen di tendint nni ssnen belli babas d Aramiyu. ^■  

4 Umi kkin x tneddam ttbarrḥen, sseřmaden řumur nni weṣṣan rrusul d imɣaren di Urcalim, ḥima timesmunin ad daysen ṭṭfen. ^□  ■  

5 Ammu dewřent tmesmunin beddent mliḥ di liman uca tuɣa řqedd nsent imeqqar kuř ass.

6 Umi cuqqen nitni di jjwayeh n Frixiya d Galaṭiya, imneɛ i-ten Arruḥ Iqeddsen maḥend ad beccaren s Wawař di Asiya. 7 Řami dd-usin ɣar temmurt n Misya, arzun ad raḥen ɣar Bitiniya, maca Arruḥ n Yeccu war ten ijji. 8 Xenni ffɣen-dd zi Misya, hwan ɣar temmurt n Truwas. ^■   9 Deg ict n tmeẓriwt s ǧiřet iban-dd ijj n weryaz zi Makiduniya ɣar Bulus, ikkar dinni, ittar zzayes, inna: ‘Hwa-dd ɣar Makiduniya ḥima ad ayi tewced afus!’

10 Awarni řami iẓra Bulus tameẓriwt-a, řexdenni narezzu ad nraḥ ɣar Makiduniya, minzi nefhem belli Siditneɣ iřaɣa aneɣ-dd ḥima ad asen nbarreḥ s Řexbar Aṣebḥan.

11 Aqa nuyur di řebḥar zi Truwas uca nruḥ nican ɣar Samutraki, u tiwecca nnes nruḥ ssenni ɣar Niyapulis.

12 Ssenni nruḥ ɣar Filippi, tenni d tandint tamezwarut di jjwayeh-a n Makiduniya, tuɣa-tt deg ifassen n Irumaniyyen. Neqqim ca n wussan di tendint nni.

13 Deg wass n ssebt neffeɣ zi tewwart n tendint ɣar tma n yeɣzar minzi neẓra din ict n taddart n tẓaǧit. Awarni řami neqqim din, nessiweř ak-d temɣarin tinni tuɣa imunen dinni.

14 Ict n temɣart tenni izzenzen řeḥrar, qqarent as Ludiya zi tendint n Tiyatira, tuɣa tᵉtteggʷed AREBBI. Siditneɣ yarzem as uř nnes ḥima ad tseř mliḥ mixef issawař Bulus.

15 Ssɣeḍṣen tt, nettat d řeḥbab n taddart nnes, uca xenni tᵉttar zzayneɣ, tenna: “Mařa s tidett tᵉttwařam belli necc umneɣ di Siditneɣ, iwa araḥem-dd, qqimem di taddart inu!” Tuɣa tzawg aneɣ aṭṭas. ^■  

16 Am neggur ɣar taddart n tẓaǧit, nemmseřqa ak-d ict n tayya, dayes řaryaḥ n tgezzant, tiwi-dd ijj n řefḍeř imɣar i aytbab nnes s tgezzant nni. ^■  

17 Nettat tḍeffar Bulus d neccin, tesɣuyyu, teqqar: “Iwdan-a d imsexxaren n AREBBI, Amɛuǧi x kuřci, nitni ttbarrḥen i kenniw s webrid n Tudart!”

18 Ammu i teqqim aṭṭas n wussan. Maca Bulus, umi tuɣa ittxeyyaq x man aya, inneqřeb, inna i řaryaḥ: “Ttumureɣ cek s Yisem n Yeccu Lmasiḥ, ffeɣ zzayes.” Uca iffeɣ-dd di tsaɛɛet nni. ^■  

19 Umi ẓrin aytbab nnes belli asitem n řefḍeř nsen iffeɣ zzayes, ṭṭfen Bulus d Silas, jarren ten, iwyen ten ɣar ssuq. ^■   20 Nitni iwyen ten zzat i řquḍat d imḍebbaren n tendint, nnan: “Iwdan-a ttxarwaḍen tandint nneɣ, minzi nitni d Udayen. ^■   21 Nitni ttbarḥen aneɣ s ttaqalid nni war iḥeǧeř ad tent neqbeř niɣ ad tent neḍfar, minzi neccin d Irumaniyyen!” 22 Issmun xasen ijj n řɣaci d ameqqran. Xenni carrgen xasen řquḍat arruḍ nsen, umuren ad ten hettken s urekkuḍ. ^■   23 Awarni řami ten hettken aṭṭas s urekkuḍ, nḍaren ten di řeḥbes, umuren i uɛessas n řeḥbes ḥima ad xasen iɛess mliḥ. 24 U netta, umi iksi tewṣeyyet-a, inḍar i-ten ɣar daxeř qaɛ n řeḥbes, iqqen i-ten zeg iḍaren nsen deg ijj n řqařeb n ǧuḥ.

25 Deg wezyen n ǧiřet tuɣa Bulus d Silas ttẓaǧan u ttsebbaḥen AREBBI am d asen sřin imeḥbas. ^■   26 Řexdenni imsar ijj n wenhezzi n temmurt d ameqqran ařami ittwanhezz dsas n řeḥbes, uca deɣya nnurzment marra tiwwura uca ttwafsyen iceddiyyen n marra imeḥbas. ^■  

27 Řami d ifaq uɛessas n řeḥbes, iẓra tiwwura arzment, ijbed ssif nnes, tuɣa iggur ad ineɣ ixef nnes, ittɣiř as belli imeḥbas arewřen. 28 Maca Bulus iřaɣa s jjehd: “War ttḍarra ixef nnek, aqa aneɣ da marra!” 29 Xenni issareɣ ijj n řefnar, ingez ɣar daxeř, ittarjiji, inḍar ixef nnes ɣar iḍaren n Bulus d Silas.

30 Issuffeɣ i-ten-dd ɣar barra, inna: “A řejwad, min ittxeṣṣa ad ggeɣ ḥima ad ttwassnejmeɣ?” ^■   31 Nitni nnan as: “Amen di Siditneɣ Yeccu Lmasiḥ, ad tᵉttwassnejmed, cek d řeḥbab n taddart nnek!” ^■   32 Ssiwřen Awař n SIDI akides u ak-d marra aytbab n taddart nnes.

33 Di tsaɛɛet nni n ǧiřet iwyi ten-dd ɣares, issird asen iyezzimen nsen, uca deɣya ittwaseɣḍeṣ netta ak-d marra řeḥbab n taddart nnes. 34 Xenni iwyi ten ɣar taddart nnes, issewjed asen ṭṭabřa, ifarḥ netta d aytbab n taddart nnes, minzi ṭṭfen liman zi AREBBI. ^■  

35 Umi dd-yiweḍ uziř, ssekken řquḍat imxazniyyen n taddart n ccreɛ n tendint ḥima ad inin i uzeǧif n řeḥbes: “Ḍeřq asen-dd i iwdan nni.” 36 Umi isřa aya uzeǧif n řeḥbes, yudef-dd ɣar daxeř uca issiweḍ awařen-a ɣar Bulus, inna: “Řquḍat sekken-dd ḥima ad awem ḍeřqen. S uyenni řuḥem di řehna!” 37 Maca Bulus inna as: “Waxxa neccin d Irumaniyyen, jjin ad aneɣ hettken s urekkuḍ s bṭayṭay am war dayneɣ iǧi řɛib, nḍaren aneɣ di řeḥbes, uca řexxu, ma xsen nitni ad aneɣ ḍeřqen s tnuffra? Lla, ejj i-ten ad dd-asen s yixef nsen, ḥima ad aneɣ ḍeřqen.” 38 Imxazniyyen n taddart n ccreɛ ruḥen, ssiwḍen awařen-a nni d asen ittwannan ɛawed ɣar řquḍat u nitni ggʷeden umi sřin aqa Bulus d Silas d Irumaniyyen. 39 Xenni usin-dd ɣarsen, ttaren zzaysen ad ruḥen, ad ffɣen zi tendint. ^■   40 Awarni řami ffɣen-dd zi řeḥbes, ɛeqben ɣar Ludiya, mani ẓrin tawmat. Sscejjɛen ten uca uyuren.