1 Hwan-dd yeryazen zi Yahudiyya ɣar Antiyuxiya uca bdan sseřmaden i tawmat, nnan: “Mařa war tᵉttwaxetnem ɛlaḥsab Ccariɛa n Musa, war tzemmarem ad tᵉṭṭfem Tudart ittduman.” ^■   2 Ikkar ijj n uxarweḍ d unaqec akidsen zi ṭṭarf n Bulus d Barnaba. Imsar aqa Bulus d Barnaba u akidsen ɛad ijjen nneɣni ruḥen ɣar rrusul d imɣaren di Urcalim zi ssibbet n tmesřact-a. ^□  ■  

3 Tessqebbeḍ u tessekk i-ten tmesmunt. Nitni cuqqen di marra Finiqiya d temmurt n Samarya uca xebbaren mammec tuben inni iǧan zi řegnus, ssfarḥen marra tawmat aṭṭas. 4 Řami iwḍen ɣar Urcalim, tareḥḥeb zzaysen tmesmunt d rrusul d imɣaren u nitni xebbaren i-ten s marra min zzaysen igga AREBBI.

5 Maca ca zi tebridt n Ifarisiyyen inni idewřen umnen, kkaren, nnan: “Ittxeṣṣa ad ten txetnem u ad ten umuren ad cebbaren di Ccariɛa n Musa.”

6 Munen rrusul d imɣaren ḥima ad mcawaren x tmesřact-a. 7 Řami ikkar ijj n uxarweḍ d ameqqran, ibedd Cimɛun, inna asen: “A iryazen tawmat, kenniw tessnem belli aṭṭas zeg wami AREBBI ixḍar aqa řegnus ad sřen i wawař n Řexbar Aṣebḥan s uqemmum inu uca ad zzayes amnen. ^■   8 AREBBI, wenni issnen min iǧan deg wuřawen, iched xasen am d asen iwca Arruḥ Iqeddsen amecnaw i neccin. ^■   9 Netta war ittegg bu řfarz jar neccin d nitni, am issizdeg uřawen nsen s liman. ^■  

10 Iwa řexxu, mayemmi tᵉttjarrabem ɛad AREBBI u tᵉtteggem ijj n uzayřu x irawen n imeḥḍaren i war zemmaren řejdud nneɣ uřa d neccin ad t narbu? ^■  

11 Maca s arḍa n Siditneɣ Yeccu Lmasiḥ numen aqa ad neṭṭef Tudart amecnaw nitni.” ^■  

12 Isqar řɣaci, nitni sřan i Barnaba d Bulus ttɛawaden x řeɛřamat d řeɛjayeb timeqqranin i zzaysen igga AREBBI jar řegnus.

13 Umi qqimen sqaren, ikkar Yaɛqub, inna: “A iryazen tawmat, sřem-dd ɣari.

14 Cimɛun ixebbar mammec tuɣa igga AREBBI deg umezwar ḥima ad ixdar ijj n řgens zi řegnus i Yisem nnes.

15 Man aya ittas-dd ak-d wawařen n inabiyyen amecnaw mammec tura:

16 ‘Awarni man aya ad dd-ɛeqbeɣ

uca ad ssbeddeɣ ɛawed Tazeddiɣt iwḍan n Dawud

u min zzayes yareddǧen ad t areqqɛeɣ

uca ad tt ssgeɛɛdeɣ ɛawed,

17 ḥima min iqqimen n iwdan ad arzun x SIDI,

uřa d marra řegnus i xef ittwařaɣan s Yisem inu,

ammu i iqqar SIDI wenni iggin marra aya.’ ^■  

18 Řexdayem n AREBBI aqa ttwassnent zi řebda.

19 S uyenni ttwařiɣ icuwwar war nesseḍqiř ca x yenni dd-idakkwařen ɣar AREBBI zi řegnus, 20 maca ad asen nari ḥima ad beɛɛden x texmuji zi tɣarṣa i l’aṣnam u x farq-ccɣeř u x jjiyfat u x idammen. ^■   21 Minzi Musa ɣares zeg wecḥař uya di kuř tandint imxeṭṭaben di temzidawin, inni zzayes ittbarrḥen kuř ass n ssebt.”

22 Xenni ixḍaren rrusul d imɣaren ak-d marra tamesmunt iryazen zi řwest nsen uca ssekken Yahuda, umi qqaren ɛawed Barsabas, d Silas ak-d Bulus d Barnaba ɣar Antiyuxiya. Iryazen-a tuɣa aten d imeqqranen jar tawmat. 23 Urin s ufus nsen ammu:

“Rrusul d imɣaren d tawmat.

I tawmat inni iǧan di Antiyuxiya d Suriya d Kilikiya, i tawmat i iǧan zi řegnus. Sřam xawem!

24 Nesřa belli ca n yinni dd-yusin zi řwest nneɣ, ṣedɛen kenniw s wawařen nsen, ssenhezzen tanefsect nwem, qqaren: ‘Ittxeṣṣa ad tᵉttwaxetnem u ad tᵉṭṭfem di Ccariɛa!’, umi neccin war d asen numur s man aya. ^■   25 S uya nemcawar awarni řami nmun marra, uca nfarz ca n yeryazen ḥima ad ten nessekk ɣarwem-dd ak-d imɛizzen nneɣ Barnaba d Bulus. 26 Nitni d iryazen inni iṭṭewwɛen tudart nsen i Yisem n Siditneɣ Yeccu Lmasiḥ. ^■   27 Nessekk-dd akidsen Yahuda d Silas, inni kenniw i ɣa ixebbaren man aya ɛawed s uqemmum nsen. 28 Minzi aqa-t di řxaḍar n Arruḥ Iqeddsen u di řxaḍar nneɣ, ḥima war xawem nesseḍqiř ca sennej i timesřayin tinni labudda zzaysent, 29 aqa ad taggʷejem x min wehhben d taɣarṣt i l’aṣnam uřa x idammen uřa x jjiyfat uřa x farq-ccɣeř. Mařa teḥḍam ixef nwem zi man aya, ad teggem mliḥ. Iřim d imtiqqan di Siditneɣ.” ^■  

30 Inni dd-ittwassekken iwḍen ɣar Antiyuxiya uca ssmunen marra iwdan, wcin asen tabrat. 31 Řami tt ɣrin, farḥen nitni, ttwassfewwjen. 32 S wawařen aṭṭas ssjehden tawmat uca ssmetnen inni iǧan ak-d Yahuda d Silas, maɣar uřa d nitni tuɣa aten d inabiyyen. 33 Awarni řami qqimen dinni aṭṭas n řweqt, ssqebḍen ten wawmaten s řehna ḥima ad dd-dewřen ɣar rrusul. 34 Maca Silas tuɣa ixs ad iqqim dinni.

35 Bulus d Barnaba qqimen di Antiyuxiya, ssɣaran ttbarrḥen s Wawař n AREBBI ak-d waṭṭas inneɣni.

36 Awarni ca n wussan inna Bulus i Barnaba: “Ejj aneɣ ad neɛqeb ɣar tawmat di kuř tandint mani tuɣa nettbarreḥ s Wawař n AREBBI, ad nargeb mammec i ɣa iffeɣ umeddur nsen.” 37 Barnaba tuɣa ixs ad kisen indeh Yuḥanna wenni ittkennan Markus, ^■   38 maca Bulus tuɣa war ixs ad t yiwi minzi Markus ismeḥ daysen umi tuɣa-ten di Pamfiliya u minzi war kisen iruḥ ɣar řxedmet. 39 Ikkar ijj n umcubbec d ameqqran jar asen ařami mmsebḍan ijjen x wenneɣni. Barnaba yiwi Markus akides uca ibeḥḥar ɣar tegzirt n Qubrus. 40 Maca Bulus ixḍar Silas uca iffeɣ, awarni řami sellmen t wawmaten ɣar arḍa n AREBBI. 41 Icuqq di Suriya d Kilisiya, ittcejjaɛ timesmunin.