1 Deg Ikuniya udfen nitni jmiɛ ɣar temzida n Wudayen uca ssiwřen ařami umnen aṭṭas n řɣaci, am Wudayen am Iyunaniyyen. 2 Maca Udayen jar inni war yuminen, ssekkaren imezdaɣ n tendint i yeǧan zi řegnus nneɣni maḥend ad ssɛiǧten tawmat. 3 Waxxa amenni kkin dinni aṭṭas n řweqt, ttbarrḥen s bṭayṭay s SIDI. U Netta tuɣa ittic cchadet i Wawař n arḍa nnes s řeɛřamat d řeɛjayeb i igga s ifassen nsen. ^■   4 Marra řɣaci n imezdaɣ n tendint imsebḍa. Ca zzaysen ruḥen ak-d Wudayen u ca nneɣni ak-d rrusul. ^□   5 Tuɣa din řeɛdawet n yinni zi řegnus u n Wudayen d imeqqranen nsen, ḥima ad xasen karfsen u ḥima ad ten arejmen. 6 Řami ssnen man aya, ffɣen-dd uca arewřen ɣar tneddam n Likaɛunya, aqa aten d Listra d Dirbi, u ɣar dcurat i d as dd-innḍen, ^■   7 uca ttbarrḥen dinni s Řexbar Aṣebḥan.

8 Tuɣa izeddeɣ ijj n weryaz di Listra i war ɣar iǧi jjehd deg iḍaren nnes, aqa-t d aneɛḍab zeg uɛeddis n yemmas, war yuyur ɛemmarṣ. ^■   9 Tuɣa ittesřa i Bulus am issawař netta. Řami t iẓra Bulus, yuca aqa dayes liman ḥima ad ittwassgenfa.

10 Inna as s ict n tmijja tejhed: “Ad ac iniɣ deg Yisem n Siditneɣ Yeccu Lmasiḥ, kkar, tbedded nican x iḍaren nnek!” Ingez, ikkar, uca iggur.

11 Řami iẓra řɣaci min igga Bulus, ssgeɛɛden tmijja nsen, nnan s řhard n temmurt nni: “Aqa irebbiten dewřen arewsen deg iwdan, hwan-dd ɣarneɣ!” ^■  

12 Nitni semman Barnaba s yisem ‘Sidi n irebbiten’, u Bulus s yisem ‘Hirmis’, minzi netta izwar ɣar wawař.

13 Akehhan n ‘Sidi n irebbiten’ tuɣa barra i tendint, yiwi iyenduzen d timrisin n nnuwwac ɣar tiwwura n řemraḥ mani qqimen, tuɣa ixs ad ten iqeddem d tɣarṣt i nitni.

14 Řami sřin Barnaba d Bulus x man aya, carrgen arruḍ nsen, negzen, uyuren ɣar barra jar řɣaci, sɣuyyun,

15 nnan: “A iryazen, min i tᵉtteggem? Uřa d neccin d ijj n lbacar d ijjen amecnaw kenniw, nettbarreḥ s Řexbar Aṣebḥan ḥima ad tbeɛɛdem x tmesřayin-a ibeṭṭřen ḥima ad tubem ɣar AREBBI iddaren i dd-ixeřqen ajenna d temmurt d řebḥar d marra min daysen. ^■  

16 Di řweqt n řecyuř iɛdun ijja Netta marra řegnus ad uyuren deg ibriden nsen, ^■  

17 waxxa amenni war ijji ixef nnes břa cchadet am d asen iwca tcuni zeg ujenna, issehwa-dd anẓar u iwca aṭṭas n řɣiǧet di řweqt nsen ittwaggen uca issjiwen uřawen nneɣ s macca d řefraḥet.” ^■  

18 Waxxa ssawařen amenni, tuɣa ɛad iqseḥ xasen ad ssbedden řɣaci maḥend war ttqeddimen tiɣarṣin.

19 Maca usin-dd Wudayen zi Antiyuxiya d Ikuniya, ssqenɛen řɣaci uca arejmen Bulus, jarren t barra i tendint, minzi ittɣiř asen aqa immut. ^■   20 Maca am d as dd-nnḍen imeḥḍaren, ikkar uca yudef ɣar tendint. Xenni tiwecca nnes iffeɣ ak-d Barnaba, iwḍen ɣar tendint n Dirbi.

21 Umi barrḥen s Řexbar Aṣebḥan i imezdaɣ n tendint nni, ggin aṭṭas n imeḥḍaren. Xenni ɛeqben ɣar Listra d Ikuniya d Antiyuxiya, 22 ggin uř di řeɛmur n imeḥḍaren, ɛeřmen asen ad cebbaren di liman, nnan asen belli ittxeṣṣa ad nadef ɣar Tgeldit n AREBBI s waṭṭas n řemḥayem. ^■   23 Areccḥen imɣaren di kuř tamesmunt am ttẓuman u ttẓaǧan akidsen, uca xenni sellmen ten i Siditneɣ i di umnen nitni. 24 Xas uca ẓwan Pisidiya, usin-dd ɣar Pamfiliya. 25 Awarni řami ssiwřen s Wawař n SIDI di Pirxa, hwan-dd ɣar Attalya. 26 Ssenni ruḥen di řebḥar ɣar Antiyuxiya minzi dinni tuɣa ttwasqebbḍen i arḍa n SIDI di ṭṭweɛ n řxedmet tenni aqa kemmřen. ^■   27 Řami din iwḍen, řaɣan x tmesmunt, xebbaren s marra řexdayem timeqqranin i yegga AREBBI s ifassen nsen u mammec yarzem tawwart n liman i řegnus. 28 Uca qqimen din ict řweqt d azirar ak-d imeḥḍaren.