1 Tuɣa din di Antiyuxiya di tmesmunt inabiyyen d imseřmaden: Barnaba, d Cimɛun wenni ittkennan Nijer, d Lukiyus zi Qayrawan, d Manaɛin wenni d mmis n wenni yarebban Hirudus, řḥakem x ijj n arbaɛ n temmurt, d Cawul. ^■   2 Am tuɣa ttẓumman, ttzawgen AREBBI, inna asen Arruḥ Iqeddsen: “Farzem ayi-dd Barnaba d Cawul i řxedmet tenni umi d asen dd-řaɣiɣ.” ^■   3 Awarni řami ẓummen, ẓẓuǧen, ssarsen xasen ifassen, sekken ten. ^■  

4 Řami tuɣa dd-ttwasekken zi Arruḥ Iqeddsen, hwan-dd ɣar Salukiya uca ssenni ruḥen di řebḥar ɣar Qubrus. 5 Umi iwḍen ɣar Salamis, barrḥen s wawař n Siditneɣ di temzidawin n Wudayen. Tuɣa Yuḥanna ittsexxar i-ten. ^■  

6 Awarni řami ẓwan marra tagzirt, iwḍen-dd ɣar Pafus, ufin din ijj n weryaz d Uday, tuɣa wanita d aseḥḥar, d anabi issxarriqen, qqaren as Bar-Cuma. ^□  ■   7 Netta tuɣa d ameḍfar n ijj n bnadem d amiɣis, lɛamil umi qqaren Sarjiyus Bulus. Iřaɣa-dd lɛamil i Barnaba d Cawul, tuɣa immeẓri ad iseř awař n AREBBI. 8 Maca aseḥḥar Bar-Cuma, isem wanita ittwatarjem s Ilimas, tuɣa ittɛekkas i-ten, yarzu ad issbeɛɛed lwali x l’iman. ^■   9 Maca Cawul umi qqaren ɛawed Bulus, ittwaccur s Arruḥ Iqeddsen uca ijɛar dayes mliḥ, inna:

10 “A cek, aqa teccured s kuř řɣecc d teḥraymect, a cek mmis n ibřis d řeɛdu n marra tasegda. Ma aqa cek war tbedded ɛemmarṣ ad txarewḍed ibriden iseggden n SIDI?

11 Řexxu, xzar, aqa da afus n SIDI ḍidd nnek, ad tdewřed d adarɣař, war tᵉttwiřid tfuct ɛad i yijj n řmijař.” Řexdenni tewḍa-dd xas tayyut d taǧest uca ibda iddura, yarezzu wi t ɣa igewwden zeg ufus.

12 Řami iẓra lɛamil min imsaren, itebhet uca yumen di tɣuri n SIDI.

13 Bulus d Barnaba kkin x řebḥar zi tendint n Pafus uca iwḍen ɣar tendint n Pirxa di Pamfiliya. Ssenni yuyur xasen Yuḥanna, iɛqeb ɣar Urcalim. ^■  

14 Maca nitni ruḥen zi Pirxa, kkin x temmurt, uca iwḍen ɣar Antiyuxiya, ict n tendint di jjwayeh n Pisidiya uca udfen ɣar temzida uca qqimen dinni deg wass n ssebt.

15 Awarni tiɣri n Ccariɛa d Inabiyyen, ssekken ɣarsen imɣaren n temzida, nnan: “A iryazen tawmat, mařa tuɣa ɣarwem ijj n wawař n ucejjeɛ i iwdan, barrḥem zzayes i řgens!”

16 Xenni ikkar Bulus iceyyar s ufus nnes, inna:

“A kenniw, iryazen n Israil u kenniw inni itteggʷeden AREBBI, sřem! ^■  

17 AREBBI n řgens-a tuɣa ifarz řejdud nneɣ uca issgeɛɛed i-ten řami ten tuɣa d ibarraniyyen di temmurt n Miṣra uca issuffeɣ i-ten s ufus nnes yuɛřan ^■  

18 uca issecca i-ten řmijař n arebɛin n iseggʷusa di řexřa. ^■  

19 Iteḥḥa sebɛa n řegnus di temmurt n Kenɛan, uca iwca asen temmurt nsen d řwart i nitni. ^■   20 Netta iwca asen řquḍat i ijj n řmijař n arebɛa-mya u-xemsin n iseggʷusa, ař řweqt n unabi Camwil. ^■  

21 Xenni ttaren ijj n ujeǧid i yixef nsen uca AREBBI iwca asen Cawul, mmis n Kis, ijj n weryaz zi teqbič n Binyamin, řmijař n arebɛin n iseggʷusa. ^■   22 Xenni ikkes i-t, issgeɛɛed asen Dawud d ajeǧid, wenni umi x iched ɛawed ammu: ‘Ufiɣ Dawud mmis n Yassa, aqa-t d ijj n weryaz yusa-dd x řxaḍar inu, wenni i ɣa iggen marra min xseɣ Necc.’ ^■  

23 Zi zzariɛet nnes igga AREBBI i Israil Yeccu Amsenjem am mammec tuɣa zzayes iwaɛd. 24 Issekk Yuḥanna ḥima ad ibarreḥ qbeř twasit nnes i marra řgens n Israil s uṣeɣḍaṣ n ttubet. ^■   25 Umi dd-yiweḍ Yuḥanna ikemmeř tasexxart nnes, inna: ‘Min d awem ittɣiř aqa d necc? War ǧiɣ d Lmasiḥ, maca, xzar, Netta ad dd-yas awarni ayi, wenni umi necc war sdiheǧeɣ ad as fesyeɣ ifiřan n sandaliyat nnes!’ ^■  

26 A iryazen tawmat, tarwa n teqbič n Ibrahim d inni akidwem itteggʷeden AREBBI, i kenniw umi dd-ittwassekk Awař n Tudart. ^■   27 Minzi imezdaɣ n Urcalim d imeqqranen nsen war d as fhimen uřa d Idlisen n inabiyyen i iqqaren kuř ass n ssebt, war ten fhimen ca, maca ḥekmen xas u ammu kemmřen nitni marra min yuran. ^■   28 Waxxa war ufin uřa d ijj n řesbab ḥima ad xas ḥekmen s řmewt, waxxa amenni ttaren zi Pilaṭus ttesřiḥ ḥima ad t nɣen. ^■   29 Umi kemmřen marra min xas yuran, ssehwan t-i-dd zi teḥnact uca ssarsen t deg wenḍeř. 30 Maca AREBBI issnekkar i-t-i-dd zi taddart n imettinen. ^■   31 Iḍhar asen-dd aṭṭas n wussan i yenni akis igeɛɛden zi Ljalil ɣar Urcalim uca řexxu aqa aten d řechud nnes zzat i řgens. ^■   32 Xzar, uřa d neccin nettbarreḥ i kenniw s wawař n lwaɛd i ittwannan i řejdud nneɣ. ^■   33 Xzar, AREBBI ikemmeř lwaɛd i neccin, inni iǧan d tarwa nsen, umi dd-issnekkar Yeccu zi řmewt. Am mammec tura deg uzehhid wiss tnayen:

‘Cek d Mmi, ass-a jjiɣ-dd Cek!’ ^■  

34 S uya issnekkar i-t-i-dd AREBBI zi taddart n imettinen ařami war dd-iddikkwiř ɛemmarṣ ařami i ɣa ikiccu, am t inna:

‘Necc ad awem wceɣ timegga n tmexsiwt u n řaman icewwaren n Dawud.’ ^■  

35 S uyenni iqqar ɛawed deg ijj n zzhid nneɣni:

‘Cek war tᵉttejjid Amsizdeg nnek ad ikiccu.’ ^■  

36 Minzi Dawud isexxar jar jjiř nnes ɛlaḥsab min ixs AREBBI, uca immut, neḍřen t ɣar řejdud nnes, xenni ikiccu. ^■   37 Maca Wanita weḥḥdes, wenni dd-issnekkar AREBBI, war ittkicciw.

38 Snem xenni, a tawmat, aqa s Wa ittwabarreḥ s weɣfar n ddnub i kenniw, ^■   39 u snem aqa zi marra min zi war tzemmarem ad tᵉttwaseggdem s Ccariɛa n Musa, aqa ad ttwaseggden marra inni yumnen zzayes Netta. ^■   40 Ḥḍam xenni ḥima war xawem dd-iweṭṭi ca n min yuran deg idlisen n inabiyyen:

41 ‘Xzarem, a kenniw inni ittbuṣaren, tɛejbem u tweddarem,

minzi Necc ad ggeɣ ict n řxedmet deg wussan nwem

i war tᵉttiqqim waxxa iɛawed awem tt ca n ijjen.’ ” ^■  

42 Řami zzaysen dd-ffɣen, ttaren zzaysen ḥima ad kisen ssiwřen s wawařen d ijjen deg ijj n wass nneɣni. 43 Řami imsebḍa umuni n temzida, aṭṭas n Wudayen d waṭṭas n imɛacaren n Wudayen idiyaniyyen ḍfaren Bulus d Barnaba. Nitni tuɣa kisen ssawařen, ɛeřmen asen ḥima ad qqimen deg arḍa n AREBBI. ^■  

44 Deg wass n ssebt i dd-yusin tusa-dd tendint ɛřaḥař marra ḥima ad tseř i Wawař n AREBBI. 45 Ařami ẓrin Wudayen abarru n řɣaci, dewřen ɛemmaren s řeḥsed, ɛeksen min xef issiweř Bulus, qacḥen u ceqqfen dayes. 46 Maca Bulus d Barnaba nnan s teryast: “Tuɣa ittřiq ad awem nessiweř d amezwaru Awař n AREBBI, maca umi t tugim, u tekksem awař diḍḍ i yixef nwem belli war tesdiheǧem Tudart ittduman, xzar, aqa řexxu neccin ad nwejjeh řegnus. ^■   47 Minzi ammu d aneɣ iweṣṣa Siditneɣ, iqqar:

‘Necc arriɣ Cek d tafawt i řegnus,

ḥima ad tiřid i Tudart ař ṭṭrufa n ddunect.’ ” ^■  

48 Umi sřin řegnus man aya, farḥen ssemɣaren awař n Sidi uca umnen marra inni tuɣa ittwafarzen i Tudart ittduman. 49 Uca iffeɣ Awař n SIDI ɣar temmurt nni marra.

50 Maca Udayen ssḥarrcen imcennɛen n tendint d temɣarin tinni ɣarsent ccan u ɛebbdent i AREBBI, u ammu ssekkaren nitni ict n umarret x Bulus d Barnaba uca ssuffɣen ten barra i temmurt nsen. ^■   51 Maca nitni zzerzen taɛejjajt zeg iḍaren nsen xasen uca iwḍen ɣar tendint n Ikuniya 52 Imeḥḍaren dewřen ccuren s řefraḥet n Arruḥ Iqeddsen.