1 Di řweqt nni ɛřaḥař isswiẓẓeḍ Hirudus afus nnes ḥima ad ikarfes x ca n yinni iǧan zi tmesmunt. 2 Inɣa Yaɛqub umas n Yuḥanna s ssif. ^■   3 Umi iẓra aqa man aya iɛjeb asen i Wudayen, ikemmeř deg webrid nni maḥend ad iṭṭef uřa d Cimɛun Buṭrus. Tuɣa d ussan n Řɛid n Weɣrum břa Antun. 4 Řami t iṭṭef, igga i-t di řeḥbes, uca igga as deg ifassen n setta-ɛecra n iɛessasen ḥima ad xas ɛessen. Tuɣa ixs ad t iqeddem zzat i Wudayen awarni i Řɛid n Tɣarṣt n Useɛdu. ^■   5 Umi tuɣa ɛessen x Cimɛun di řeḥbes, tuɣa teẓẓaǧa tmesmunt i AREBBI břa qeṭṭu di ṭṭweɛ nnes.

6 Di ǧiřet ɣar tuffut i di tuɣa izɛem Hirudus ad t iqeddem, am iṭṭeṣ Cimɛun ittwaqqnen s tnayen n snaseř jar tnayen n iɛessasen n řɛeskar u inneɣni ḥeṭṭan ɣar tewwart n řeḥbes, 7 ibedd-dd Lmalak n SIDI sennej nnes u ṭṭya n tfawt tᵉttceɛciɛ deg wexxam uca netta iɛarn i-t deg uɣezdis, issfaq i-t, inna: “Kkar deɣya!” Deɣya wḍant snaseř zeg ifassen nnes. ^■   8 Inna as Lmalak: “Byes, teqqned tisiřa nnek!” Igga ammu. Inna as xenni: “Arḍ ajeǧab nnek, ḍfar ayi-dd!” 9 Xenni iffeɣ, iḍfar i-t, war issin min d as igga Lmalak, aqa man aya d tidett, maɣar ittɣiř as iẓra ict n tmeẓriwt.

10 Ařami kkin x uɛessas amezwaru d x wenni wiss tnayen, iwḍen ɣar tewwart n wuzzař tenni ittawyen ɣar tendint, tennurzem asen weḥḥdes. Awarni řami zzayes ffɣen, qeḍɛen ict n zzenqet, řexdenni ijja i-t Lmalak.

11 Xenni idweř-dd Cimɛun ɣar řbař nnes, inna: “Řexxu ssneɣ s tidett belli SIDI issekk-dd Lmalak nnes, issenjem ayi zeg ifassen n Hirudus u zi marra min zeɛmen ad ayi ggen Wudayen.”

12 Umi tuɣa ittxarreṣ di man aya, yusa-dd ɣar taddart n Maryam, yemmas n Yuḥanna wenni ittkennan Markus, mani tuɣa ttmunan aṭṭas, ttẓaǧan din.

13 Ařami issqarqeb di tewwart n barra, tusa-dd ict n tayya, qqaren as Ruda ḥima ad tseř wi dinni.

14 Teɛqeř tmijja n Cimɛun, maca zi ssibbet n řefraḥet war tarzim ca tewwart, maca tuzzeř ɣar daxeř uca txebbar i-ten, inna asen: “Xzar, Cimɛun, aqa ibedd ɣar tewwart!”

15 Nnan as: “Aqa cem txeřfed!” Maca nettat teqqim teqqar aqa man aya nican, maca nitni nnan as: “Ma ad taɣ d lmalak nnes!”

16 Maca Cimɛun, iqqim issqarqub uca ařami d as arezmen, ẓrin t uca tbehten.

17 Iceyyar asen s ufus nnes ḥima ad sqaren uca iɛawed asen mammec t-i-dd-issuffeɣ SIDI zi řeḥbes, inna: “Xebbarem Yaɛqub d tawmat x uya!” Xenni iffeɣ ɣar ijj n wemcan nneɣni. ^■  

18 Řami dd-yiweḍ uziř, imsar ijj n uxarweḍ maci drust jar řɛeskar x min imsaren i Cimɛun,

19 Awarni řami tuɣa xas yarezzu Hirudus, maca war t yufi, iḥkem x iɛessasen s řmewt, iffeɣ zi Yahudiyya, iqqim izeddeɣ di Qayṣariya.

20 Umi tuɣa dayes řeɛdawet ḍidd i ayt n Ṣur d Ṣaydun, munen nitni, iwḍen ad ssqenɛen Blastus amsexxar icenɛen n ujeǧid uca ttaren zzayes aṣřaḥ, minzi macca n temmurt nsen tekka-dd zi tgeldit n Hirudus. 21 Deg ijj n wass n řfarḥ minxef kksen awař, yarḍ Hirudus ajeǧab igellden am iqqim x řkursi n ccreɛ, uca issiweř ɣarsen. 22 Uca sɣuyyen-dd iwdan ɣares: “Aqa d awařen n AREBBI, war iǧi n bnadem.” 23 Řexdenni iwta i-t Lmalak n SIDI, minzi netta war iwci aɛuǧi i AREBBI. Uca dřen t ikeccawen, iffeɣ zzayes buḥbeř.

24 Awař n AREBBI ittwabarreḥ zzayes, imeqqar. ^■   25 Barnaba d Bulus ɛeqben-dd zi Urcalim ɣar Antiyukiya awarni řami kemmřen tasexxart nsen uca iwyen akidsen Yuḥanna, wenni umi ttkennan Markus.