1 Rrusul d tawmat inni iǧan di Yahudiyya sřin belli uřa d řegnus qebřen Wawař n AREBBI. 2 Řami igeɛɛed Cimɛun ɣar Urcalim, mcubbcen akides inni iǧan zi tebridt n wextan, 3 nnan, belli netta yudef-dd ɣar iwdan i war ittwaxetnen, icca akidsen. ^■  

4 Maca Cimɛun iqḍeɛ daysen řhard, uca ibda ad asen iɛawed awař iḍfar umas: 5 “Řami tuɣa ayi di tendint n Yaffa ttẓaǧiɣ, ẓriɣ deg ict n tmeẓriwt aqa ict n řqecɛet amecnaw tacḍaḍt n tcuqqet tameqqrant ittwaṭṭfen zi arebɛa n tɣemmura nnes tᵉttwasehwa-dd zeg ujenna, tiweḍ-dd ɣari. ^■   6 Xzareɣ mliḥ u ẓriɣ aqa dayes imuddaren n temmurt s arebɛa n iḍaren d imuddaren inni ittbuɛen x temmurt uřa d ijḍaḍ n ujenna. 7 Sřiɣ awarni ayi ict n tmijja, tenna ayi: ‘A Cimɛun, kkar, ɣarṣ, tecced!’ 8 Maca necc nniɣ: ‘Lla, a Sidi, ɛemmarṣ war yudif ɛad ɣar uqemmum inu min war izdigen niɣ niɣ min iǧan d řeḥram.’ ^■   9 Tenna xafi tmijja zeg ujenna ɛawed: ‘Min issizdeg AREBBI, war dd t tᵉttarrid ca cek d řeḥram!’

10 Man aya imsar třata n imuren uca xenni ittwasjbed marra ɛawed ɣar ujenna.

11 U xzar, řexdenni aqa din třata n yeryazen inni dd-ittwassekken zi Kurniliyus zi Qayṣariya, bedden ɣar tewwart n řemraḥ mani d ayi tuɣa.

12 Inna ayi Arruḥ aqa ittxeṣṣa ad kisen raḥeɣ břa ma ad cekkeɣ. Tuɣa akidi ɛad setta n tawmat inneɣni u nudef ɣar taddart n weryaz nni. ^■  

13 Netta issargeb aneɣ mammec iẓra ijj n lmalak i ibedden di taddart nnes, wenni d as innan: ‘Sekk ijj n weryaz ɣar Yaffa, tɛarḍed x Cimɛun wenni umi ttkennan Buṭrus.

14 Netta ad ac issiweř awařen i zi ɣa tᵉttwasnejmed, cek d marra taddart nnek.’

15 Umi ssiwřeɣ, ihwa-dd Arruḥ Iqeddsen xasen am mammec xaneɣ dd-ihwa ɛawed ɣar umezwaru.

16 Ttwassɛeqřeɣ x wawař n Siditneɣ, mammec inna: ‘Yuḥanna tuɣa isseɣḍaṣ s waman maca kenniw ad ttwasɣeḍṣem s Arruḥ Iqeddsen.’ ^■  

17 Mařa AREBBI iwca tamewci aya i řegnus nni yumen di Siditneɣ Yeccu Lmasiḥ am mammec d aneɣ tt iwca, xenni min ɛniɣ necc maḥend ad ssbeddeɣ AREBBI?” ^■  

18 Umi sřin awařen-a, heddnen, ssemɣaren AREBBI, nnan: “Ad taɣ AREBBI iwca uřa i řegnus maḥend ad dd-dewřen ad tuben i Tudart.”

19 Inni ittwazuzzaren zi ssibbet n řeḥṣaret i imsaren s ssibbet n Stifanus, ẓwan ɣar Finiqiya u ɣar jjwayeh n Qubrus u ɣar Antiyuxiya am war ssiwiřen ak-d ḥed s wawař mɣir ak-d Wudayen waha. ^■   20 Tuɣa din jar asen ca n yeryazen i iǧan zi Qubrus u zi Qayrawan inni, ařami dd-usin ɣar Antiyuxiya, tuɣa issawařen ak-d Wudayen inni tuɣa ɣarsen řhard n Iyunaniyyen, barrḥen asen s Siditneɣ Yeccu. 21 Tuɣa afus n SIDI akidsen uca aṭṭas umnen, dewřen-dd ɣar SIDI. ^■  

22 Ikka-dd řexbar xasen x imezzuɣen n tmesmunt di Urcalim. Nitni ssekken Barnaba ɣar Antiyuxiya. 23 Ařami dd-yiweḍ din, iẓra arḍa n AREBBI, ifarḥ uca iɛřem asen ḥima ad qqimen ttcebbaren di Siditneɣ s marra uř nsen. ^■   24 Minzi tuɣa-t d aryaz isegged, iccur s Arruḥ Iqeddsen d l’iman, uca ijj n ubarru d ameqqran n iwdan immarni-dd ɣar Siditneɣ. ^■   25 Xenni iruḥ ɣar Tarsus ḥima ad yarzu x Cawul, ^■   26 uca ařami t yufa, yiwi i-t akides ɣar Antiyuxiya. Uca imsar aqa nitni munen di tmesmunt aseggʷas ikmeř uca ssřemden ijj n řɣaci d ameqqran. Zi  řweqt nni ttwasemman imeḥḍaren d ‘imasiḥiyyen’ i umur amezwaru. ^□  

27 Deg wussan nni hwan-dd ca n inabiyyen zi Urcalim ɣar din. 28 Uca ikkar ijj n zzaysen qqaren as Aɣabus, iɛřem asen s Arruḥ belli ijj n řaẓ imɣar ad yekk x marra tammurt u belli řaẓ-a ad yiři deg wussan n qayṣar Kludiyus. ^■   29 Xenni ggin imeḥḍaren aqa kuř ijj zzaysen ad igg ca n twiza ɣar uɣezdis ɛlaḥsab tizemmar nnes i tsexxart n wawmaten i izeddɣen di Yahudiyya. 30 Uca amenni i ggin nitni, uca ssekken t din ɣar imɣaren s ufus n Barnaba d Cawul. ^■