1 Awarni řami yarsa uxarweḍ, iřaɣa-dd Bulus x imeḥḍaren, iweddeɛ i-ten s usudem n wawmaten, uca iffeɣ ḥima ad iraḥ ɣar Makiduniya. 2 Řami icuqq di jjwayeh nni, ifewwej xasen s waṭṭas n wawařen, xenni yiweḍ ɣar Lyunan. 3 Ařami isseɛdu din třata n iyuren, ssewjden as Wudayen ict n texceft umi tuɣa iggur ad ibeḥḥar ɣar Suriya. S uya igga ad yeɛqeb x webrid n Makiduniya. 4 Supatrus zi tendint n Biriya yuyur akides ař Asiya, xenni ɛawed Aristarxus d Sikundus zi Tissalunika, Xayus zi Dirbi, Timutiyu zi Listra u Ticikus d Trufimus zi Asiya. ^■   5 Ina izwaren aneɣ, ttrajan aneɣ di Truwas. 6 Maca neccin neffeɣ zi Filippi, tandint tamezwarut n Makiduniya, awarni řami kemmřen wussan n Řɛid n Weɣrum břa Antun, nekka x řebḥar u awarni i xemsa n wussan niweḍ-dd ɣar Truwas mani neqqim sebɛa n wussan.

7 Deg wass amezwaru n simana umi munen imeḥḍaren maḥend ad arẓen aɣrum, issiweř Bulus akidsen. Netta isszugar di řhard nnes ař řwest n ǧiřet, maɣar netta tuɣa inwa ad isafar tiwecca nnes. 8 Aqa areqqen din aṭṭas n řefnarat di tɣurfet n sennej i di tuɣa nmun. 9 Tuɣa din ijj n ubřiɣ qqaren as Utixus, iqqim di řkazi, ittesřa, řexdenni ikka xas yiḍeṣ yuǧeɣ am tuɣa Bulus iszugar di řhard nnes ammu. Umi tuɣa iṭṭeṣ, iwḍa-dd zi tɣurfet wiss třata ɣar wadday, ksin t immut.

10 Maca Bulus ihwa, iwḍa xas, idarreɛ as, inna: “War tennexřiɛem ca aqa dayes tudart.” ^■  

11 Xenni yuři ɛawed, yarẓa aɣrum uca icca, xenni issiweř akidsen ɛad aṭṭas ařami d řefjar. Xas uca iruḥ isafar x temmurt,

12 am dd-iwyen nitni aḥenjir iddar, farḥen as aṭṭas.

13 Maca neccin nenya deg uɣarrabu, nbeḥḥar ɣar řmarsa n Tissus maḥend ad kidneɣ dd-nawi Bulus ssenni am mammec tuɣa ittḍebbar, maɣar netta s yixef nnes ikka ɣar din x temmurt.

14 Ařami zzayes nareḥḥeb di Tissus, neksi t di tɣarrabut uca niweḍ-ḍḍ ɣar Mitilini.

15 Ssenni nkemmeř asafar, niweḍ tiwecca nnes ɣar Xiyus u farwecca nnes neẓwa ɣar Samus, neqqim di Truxiliyun uca deg wass i dd-yusin niweḍ ɣar Militus,

16 minzi Bulus igga ad iɛdu Afasus x řebḥar ḥima war ittɛeṭṭař dinni, minzi tuɣa ittqeǧeq ḥima, maɛlik iɛeddeř, iři yiweḍ ɣar Urcalim deg wass n Řɛid n Xemsin n Wussan. ^■  

17 Zi Militus ijja ad dd-asen imɣaren n tmesmunt di Afasus.

18 Řami dd-usin ɣares, inna asen:

“Kenniw tessnem, zeg wass amezwaru umi dd-udfeɣ ɣar Asiya, mammec ǧiɣ akidwem marra ussan,

19 am tuɣa ttsexxareɣ i AREBBI s marra awaḍeɛ u s imeṭṭawen u deg ijarriben i xafi ikkin zi ssibbet n tmeɛmač n Wudayen. 20 War jjiɣ ca zi min inefɛen i řeɛmur nwem war d awem t barrḥeɣ, war t ssřemdeɣ di řeswaq u di tudrin, 21 am ssqenɛeɣ Udayen d Iramiyyen maḥend ad dd-dewřen ɣar AREBBI, ad amnen di Siditneɣ Yeccu Lmasiḥ. ^□  ■   22 U řexxu ad raḥeɣ ɣar Urcalim am ttwacarfeɣ zi Arruḥ, war ssineɣ min d ayi ittrajan din, 23 mɣir aqa Arruḥ Iqeddsen iched ayi di kuř tandint, iqqar: “Aqa iceddiyyen d řemḥayem ttrajan cek! 24 Maca necc war ḥessbeɣ tudart inu ca tiɣřa i yixef inu, maḥend ad kemmřeɣ ticři inu d řxedmet n tsexxart i ksiɣ zi Siditneɣ Yeccu ḥima ad cehdeɣ x Řexbar Aṣebḥan n arḍa n AREBBI. ^■   25 U řexxu ssneɣ, aqa uřa d ijj zzaywem ad iẓar aɣembub inu ɛad, kenniw inni jar awem ggureɣ, ttbarrḥeɣ s Tgeldit n AREBBI.

26 S uyenni ad xawem cehdeɣ ass-a, belli necc ttbarriɣ ixef inu zeg idammen nwem marra. 27 Minzi war ɛgizeɣ ad awem ssecneɣ marra min ittexs AREBBI. 28 Ḥḍam x yixef nwem u x tḥimart tmun min xef igga Arruḥ Iqeddsen kenniw d imeḥḍayen, ḥima ad tarwesem tamesmunt n AREBBI tenni d ikesseb s idammen nnes. ^■  

29 Minzi ssneɣ belli awarni twaḥit inu, ad ɣarwem dd-adfen wuccanen imuzzaren inni war ittejjin tḥimart. ^■   30 Ɛad ad zzaywem dd-kkaren iryazen inni i ɣa issiwřen řhard iɛewwjen ḥima ad ssuffɣen imeḥḍaren zeg webrid, ad ten jarren awarni asen. ^■   31 S uyenni faqem, tɛeqřem belli třata n iseggʷusa, ǧiřet d wass, war beddeɣ ad ssmeḥḥdeɣ kuř ijjen zzaywem weḥḥdes s imeṭṭawen.

32 U řexxu ad kenniw sellmeɣ i AREBBI u i wawař n arḍa nnes, i wenni ɣar iǧa tizemmar ḥima ad ibna u ad awem iwc řwart ak-d marra imqeddasen. 33 War ḍmiɛeɣ di nnuqart niɣ deg wureɣ niɣ deg warruḍ uřa zeg ijjen. ^■   34 Kenniw tessnem simant nwem, belli ifassen-a aqa xedmen i min ḥwajeɣ u i min ḥwajen inni iǧan akidi.^■   35 Di kuřci ssecneɣ awem belli ittxeṣṣa, am nxeddem ammu, ad newc afus i yenni iḍeɛfen uca ad nfekkar deg wawařen n Siditneɣ Yeccu, belli inna: ‘Sseɛd n wenni iwcin x wenni iksin.’ ”

36 Awarni řami inna aya, iwḍa x ifadden nnes, iẓẓuǧ, u marra iryazen akides. ^■   37 Aqa din jar asen aṭṭas n imeṭṭawen uca darrɛen as, ssudmen t. 38 Ceḍnen aṭṭas, amezwar n marra x wawař i inna, belli war ẓarren ca aɣembub nnes ɛad, uca ssqebḍen t ɣar uɣarrabu.