1 Inna Yeccu i imeḥḍaren nnes: “War tɛeddeř ila ad iřint tɛenkrifin, maca uct x wenni zi i dd ɣa yasent! ^■   2 Mliḥ as ad xas tᵉttwagg ict n teṣḍart n tsirt tedqeř ɣar yiri nnes uca ad immenḍar di řebḥar uřa xmi i ɣa ittwasseɣwa ijjen zeg imeẓyanen-a. 3 Ḥḍam ixef nwem. Mařa ixḍa umac, webbex i-t, u mařa itub, samḥ as. ^■   4 Mařa ixḍa akidek sebɛa n twařawin deg ijj n wass uca idweř-dd ɣarek sebɛa n twařawin, iqqar: ‘Aqa tubeɣ!’, ittxeṣṣa ad as tsamḥed.” ^■  

5 Nnan rrusul: “A Siditneɣ, arni aneɣ l’iman nneɣ!” ^□   6 Netta inna asen: “Mři tuɣa daywem l’iman amecnaw ict n tḥebbuct n zzariɛet n uxerdel uca ad tinim i tcejjart-a n tut: ‘Twaqřeɛ zeg iẓewran nnem, twaẓẓu di řebḥar!’, xenni ad awem tegg array.” ^■  

7 Man wen zzaywem i ɣar iǧa umsexxar icarrez niɣ yarekkwes uǧi, ad as yini deɣya mařa iɛqeb-dd zeg iyyar uca yudef ɣar taddart: ‘Qarreb-dd, teqqimed ɣar ṭṭabřa!’? 8 Ma war d as iqqar: ‘Sewjed min ɣa mmunesweɣ, tbeysed, tsexxared xafi ař ɣa cceɣ, ař ɣa sweɣ. Awarni man aya ad tecced, ad teswed uřa d cek!’? 9 Ma ad iksi umsexxar nni aqadi, minzi netta igga min d as ittwannan ad t yegg? Ittɣiř ayi, lla!

10 Ammu uřa d kenniw, xmi tᵉtteggem marra min d awem yumuren, ittxeṣṣa ad tinim: ‘Aqa neccin d imsexxaren war ineffɛen, minzi negga min tuɣa xaneɣ’.”

11 Rami iruḥ Yeccu ɣar Urcalim icuqq di řwest n temmurt n Samarya nni iǧan zzat n Ljalil.

12 Ařami tuɣa ittadef ɣar ijj n dcar, řqan t ɛecra n yeryazen daysen řbarṣ, qqimen bedden ɣar řaggʷaj.

13 Řaɣan s jjehd, nnan: “A Amseřmad nneɣ, Yeccu, arḥem aneɣ!’”

14 Umi daysen ixzar, inna asen: “Ruḥem, secnem ixef nwem i ikehhanen!” Xenni imsar, am gguren nitni, ttwassizedgen. ^■  

15 Ijjen zzaysen, umi iẓra belli iggenfa, iɛqeb, issemɣara di AREBBI s tmijja tejhed.

16 Iwḍa x uɣembub ɣar iḍaren n Yeccu, iqada t. Wa tuɣa d ijj n weryaz zi Samarya.

17 Iṭṭef Yeccu deg wawař, inna: “Ma war ttwassizedgen marra s ɛecra? Mani qqimen tesɛa?

18 Ma war din wi i dd-issarxun i yixef nnes zzaysen ḥima ad issɛuǧ AREBBI mɣir wanita waha wenni iǧan zeg ijj n řgens nneɣni?”

19 Xenni inna as: “Kkar, truḥed, aqa l’iman nnek issenjem i cek!”

20 Umi sseqsan Ifarisiyyen x meřmi i dd ɣa tas Tgeldit n AREBBI, yarra-dd xasen, inna: “War dd-tᵉttis Tgeldit n AREBBI s yijj n wudem ittwascanen. 21 War qqaren: ‘Aqa-tt da!’, niɣ: ‘Aqa-tt diha!’, minzi Tageldit n AREBBI aqa-tt di řwest nwem.” ^■   22 Inna i imeḥḍaren nnes: “Ad dd-awḍen wussan i di i ɣa texsem ad tẓarem ijj n wass waha zeg wussan n Mmis n bnadem, maca kenniw war t tẓarrem. 23 Mařa nnan awem: ‘Aqa-t da!’ niɣ: ‘Aqa-t diha!’, war din ttriḥem. ^■   24 Minzi amecnaw mammec iccat wassam zi ṭṭarf sadu ujenna ɣar ṭṭarf nneɣni sadu ujenna, ammu ɛawed ad yiři Mmis n bnadem deg wass nnes.

25 Maca ittxeṣṣa as amezwaru ad iweddeb aṭṭas uca ad ittwammenḍar zi jjiř-a! ^■  

26 Amecnaw mammec tuɣa deg wussan n Nuḥ, ammu i ɣa yiři ɛawed deg wussan n Mmis n bnadem. ^■   27 Tuɣa ttᵉtten, sessen, meǧcen u ttwasmeǧacen ař ass i di yudef Nuḥ ɣar uɣarrabu uca yusa-dd ṭṭufan, isshellek i-ten marra. 28 Ammu tuɣa imsar ɛawed deg wussan n Lut. Tuɣa ttᵉtten, sessen, ssaɣen, zznuzan, tteẓẓun, bennan. 29 Maca deg wass i di dd-iffeɣ Lut zi Sadum, ijja SIDI ad dd-tewḍa tmessi d řecbareyyet zeg ujenna, iteḥḥa ten marra. ^■  

30 Ammu i ɣa yiři deg wass i di i ɣa ittwassargeb Mmis n bnadem. 31 Wenni iǧan x tzeqqa deg wass nni uca řqecc nnes di taddart, war dd-ihekkwi ca maḥend ad t iksi. Ammu uřa d wenni iǧan deg iyyar, war dd-ittɛiqib ca. 32 Ɛeqřem x temɣart n Lut! ^■   33 Wenni yarezzun ad issenjem tudart nnes, ad tt ixsar u wenni tt i ɣa ixsaren, ad tt issenjem. ^■   34 Ad awem iniɣ, aqa di ǧiřet nni ad din iřin tnayen x ict n tassut: ijjen ad ittwaksi, wenneɣni ad ittwajj. ^■   35 Ad din iřint tnayen n temɣarin ḥarryent jmiɛ, ict ad tᵉttwaksi, tenneɣni ad tᵉttwajj. 36 Ad din iřin tnayen deg iyyar: ijjen ad ittwaksi, wenneɣni ad ittwajj.”

37 Arrin-d, nnan as: “Mani, a Siditneɣ?” Netta inna asen: “Mani teǧa řxecbet, din ittmunan ɛawed igidaren.” ^■