1 Inna ɛawed i imeḥḍaren nnes: “Tuɣa din ijj n bnadem, aqa-t d bab n wagřa, ɣares ijj n wewkiř nni zi cetcan iwdan, aqa zeɛma tuɣa ittzuzzar agřa n sides. 2 Iřaɣa as, inna as: ‘Man aya i xak ttesřiɣ? Ewc řeḥsab i uwekkeř nnek, minzi war tᵉttiřid ɛad d awkiř!’ 3 Inna wewkiř ak-d ixef nnes: ‘Min i ɣa ggeɣ umi sidi inu ad xafi ikkes awekkeř-a? War zemmareɣ i uqqaz n temmurt u ttseḍḥiɣ tutra! 4 Aqa ssneɣ min ɣa ggeɣ ḥima, xmi i ɣa ttwaḥuzeɣ x uwekkeř, ad ayi qebřen di tudrin nsen.’ 5 Uca iřaɣa-dd i kuř ijjen zeg aytbab n umarwas n sides. Inna as i umezwar: ‘Mecḥař d ac itturs sidi?’ 6 Yarra-dd xas netta: ‘Mya n ibidawen n zzect!’ Inna as: ‘Ksi řciɣed n umarwas nnek, qqim deɣya, tarid: Xemsin n ibidawen.’ 7 Xenni inna i wenneɣni: ‘I cek, mecḥař d ac itturs sidi?’ Yarra-dd xas: ‘Mya n txuncay timeqqranin n yirden.’ Inna as: ‘Ksi řciɣed n umarwas nnek, tarid: Tmanyin.’ 8 Siditneɣ igga řfaǧ deg wewkiř aɛeffan, aqa tuɣa ittegg s tiɣit, minzi tarwa n ddunect-a d imiɣisen di jjiř nsen wanita x tarwa n tfawt. 9 Ɛawed Necc ad awem iniɣ: ‘Ggem imeddukkař i yixef nwem s tenɛacin n řɣecc, ḥima, xmi i ɣa teqḍam, ad kenniw qebřen deg iqiḍan nsen n řebda.’ ” ^■  

10 “Wenni iǧan d amtiqqi di drus, aqa-t d amtiqqi uřa deg waṭṭas, u wenni war ittseggaden di drus, aqa war ittseggid uřa deg waṭṭas.

11 Mařa war teǧim d imtiqqan di tenɛacin n řɣecc, wi kenniw i ɣa iwekkřen x min iǧan nican?

12 Mařa war teǧim d imtiqqan di min iǧan n wenneɣni, wi d awem i ɣa iwcen ca min iǧan nwem?

13 Uřa d ijj n umsexxar war izemmar ad ixdem tnayen n isiditen, minzi ma ad icarh ijjen uca ad issɛizz wenneɣni, niɣ ma ad icebbar deg ijjen uca ad isseḥqar wenneɣni. War tzemmarem ad txedmem AREBBI d tenɛacin.” ^■  

14 Řami sřin Ifarisiyyen marra man aya, sseḥqaren t, minzi nitni tuɣa ttexsen ttmenyat. ^■  

15 Yeccu inna asen: “Kenniw d inni isseggden ixef nwem zzat i iwdan, maca AREBBI yargeb x wuřawen nwem, minzi min yuɛřan ɣar iwdan, aqa-t d nnɛi zzat i AREBBI. ^■  

16 Ccariɛa d inabiyyen aqa aten ař Yuḥanna. Zi řweqt nni ittwabarreḥ s Tgeldit n AREBBI uca marra idsen ttemsedḥasen ɣares ḥima ad din adfen. ^■  

17 Maca tikkest n ujenna d temmurt tehwen x uweṭṭu n ict n tneqqiṭ zi Ccariɛa.” ^■  

18 “Marra wi i ɣa iǧfen i temɣart nnes uca ad imřec ak-d tenneɣnit, aqa izna, u marra wi i ɣa imeřcen tenni umi x yuẓẓeř weryaz nnes, aqa izna.” ^■  

19 “Tuɣa din ijj n bnadem, aqa-t d bab n wagřa, yarḍ řeqṭen acemřař azdad d řeḥrir d azeggʷaɣ. Ittɣebba zzhu kuř ass. 20 Tuɣa din ɛawed ijj n umezřuḍ qqaren as Aliɛazar. Tuɣa ssbuẓẓřen t ɣar tewwart n bab n wagřa, iccur s řḥebb. 21 Tuɣa dayes meẓri ad ijjiwen s iřeqqwaz i dd-iweṭṭan zi ṭṭabřa n bab n wagřa. Maca tuɣa ttasen-dd yiṭan ɛawed, řessḥen ibuɛrusen nnes. 22 Immut umezřuḍ, ksint t lmalakat ɣar weḥsin n Ibrahim. Uřa d bab n wagřa immut, neḍřen t.

23 Am tuɣa ittɛeddab di řaxart, issgeɛɛed tamuɣři nnes, iẓra Ibrahim zi řaggʷaj u Aliɛazar tuɣa-t deg weḥsin nnes. 24 Iřaɣa s jjehd: ‘A baba Ibrahim, arḥem ayi. Sekk-dd Aliɛazar ḥima ad issuff ixef n uḍaḍ nnes s waman uca ad issesmeḍ iřes inu, minzi aqa ttɛeddabeɣ di tmessi aya.’

25 Inna as Ibrahim: ‘A mmi, ɛqeř aqa tkemmřed marra řxar nnek di tudart nnek, ammu i Aliɛazar řɣar. Řexxu netta ittᵉttwafewwej u cek tᵉttɛeddabed. ^■   26 Sennej i man aya marra, aqa jar aneɣ neccin d kenniw ijj n ttasiɛ imɣar, ařami inni ixsen ad ɣarwem dd-ẓwan war zemmaren, uca uřa d inni din iǧan war zemmaren ad dd-ẓwan ssenni ɣarneɣ.’ 27 Inna as: ‘Ttzawgeɣ cek xenni, a baba, ad t tessekked ɣar taddart n baba, 28 minzi ɣari xemsa n aytma. Ejj i-t ad asen iɛřem, ḥima war dd-ttisen uřa d nitni ɣar wemcan-a n uɛeddeb.’ 29 Inna as Ibrahim: ‘Aqa ɣarsen Musa d inabiyyen. Ejj i-ten ad ɣarsen sřen!’ ^■   30 Maca netta inna as: ‘Lla, a baba Ibrahim, mařa iruḥ ɣarsen ijjen zeg imettinen, xenni ad tuben!’ 31 Inna as Ibrahim: ‘Mařa nitni war sřin ɣar Musa d inabiyyen, xenni war zzayes ttwassqenɛen ɛawed, ɛad xmi dd ɣa ikkar ijjen jar n imettinen!’ ”