1 Ibda isseřmad ɛawed ɣar řebḥar u imun-dd xas řɣaci aṭṭas ařami yenya di tɣarrabut uca iqqim dayes x řebḥar am řɣaci marra tuɣa-t x tma n řebḥar x řbarr. ^■   2 Tuɣa isseřmad i-ten s imedya aṭṭas. Ammu i d asen inna di tɣuri nnes: 3 “Sřem! Xzar, ijj n ufeǧaḥ iffeɣ ḥima ad izarɛ. 4 Am tuɣa izarreɛ, tewḍa ca n zzariɛet x tma n webrid, ixecc-dd ijj n ujḍiḍ, ineqb i-tt. 5 Tewḍa ca n zzariɛet x weẓru mani war dayes tuɣi bu ucař aṭṭas. Deɣya teɣmi s minzi tammurt war tuǧiɣ. 6 Maca umi dd-tenqar tfuct, tecmeḍ, minzi war ɣares tuɣi bu weẓwar, xenni tisřaw. 7 Tewḍa ca n zzariɛet jar isennanen, uca mɣaren xas isennanen uca jeyyḥen tt, war tewci ca řɣiǧet. 8 Tewḍa ca n zzariɛet x temmurt teṣbeḥ uca teɣmi, tegma, tewca řɣiǧet. Ca n zzariɛet tusa-dd s třatin, tenneɣni s settin u tenneɣni s mya n tseqqar.” 9 Xenni inna: “Wenni ɣar iǧa imezzuɣen i useǧi, ejj i-t ad iseř.”

10 Umi tuɣa aten weḥḥedsen, sseqsan t inni d as dd-innḍen jmiɛ ak-d tenɛac x umedya nni. ^■  

11 Inna asen: “Aqa immewc awem maḥend ad tessnem ssirr n Tgeldit n AREBBI, maca inni di barra ad asen yiři kuřci s imedya, ^■  

12 ḥima am ttwařan ad twařan uca war ttwiřin, am ttesřan ad sřen uca war fehhmen, ḥima war ttᵉtuben uca ad asen ittwaɣfar ddnub nsen.’ ” ^■  

13 Inna asen: “Ma war tefhimem ca i umedya aya? Mammec i ɣa tessnem marra imettiřen-a?

14 Afeǧaḥ izarreɛ awař. ^■  

15 Ina aqa d inni x webrid, aqa yina d yenni daysen ittwazarɛ wawař, maca awarni řami d as sřin, řexdenni yusa-dd cciṭan uca ikkes awař i ittwazarɛen deg wuřawen nsen.

16 Uca yina d inni ittwazarɛen x temmurt uḥejri, aqa yina d inni xmi i ɣa sřen awař, ad t qebřen deɣya s řefraḥet.

17 Maca war ɣarsen bu jjadira deg ixef nsen, maca ad qqimen ɣar ijj n řmijař. Mařa temsar řeḥṣaret niɣ umarret di ssibbet n wawař, ad nderfen deɣya.

18 Uca yina d inni ittwazarɛen jar isennanen, aqa yina d inni xmi i ɣa sřen awař,

19 ad ɣarsen dd-adfent tḥissaf n ddunect-a d uɣekkʷi n wagřa d marra nnecwat i inneɣni ad dd-adfent, ad jeyyfent awař, xenni idakkʷař wawař břa řɣiǧet. ^■   20 Uca yina d inni ittwazarɛen x temmurt iṣebḥen, aqa yina d inni, xmi i ɣa sřen awař, ad t qebřen, ad wcen řɣiǧet, ca zzaysen třatin, inneɣni settin u inneɣni mya n tseqqar.”

21 Inna asen: “Ma ad dd-asen s řqendiř ḥima ad immars sadu řkurbet niɣ sadu qama? Ma war ittmarsi ca x řmerfeɛ? ^■   22 Minzi war din min inuffaren war dd-ittwasargeb, uca war din min ittwasnuffaren war dd-ittᵉtwasseḍhar. ^■   23 Wenni ɣar iǧa imezzuɣen i useǧi, ejj i-t ad iseř.”

24 Inna asen: “Ḥḍam min ɣa tesřem. S řeqyas nni zzayes i ɣa teɛbarem, zzayes i d awem ɣa ɛbaren ɛawed, uca i kenniw inni ittesřan ad asen immarni ɛad. ^■   25 Minzi wenni ɣar iǧa ad as immarni, u wenni war ɣar iǧi ca, uřa min ɣares ad as ittwakkes.” ^■  

26 Inna: “S uyenni ad tiři Tageldit n AREBBI amecnaw ijj n weryaz ineṭṭar zzariɛet di temmurt, 27 xenni ad iṭṭeṣ ad dd-ikkar, ǧiřet d wass, uca zzariɛet ad tgeɛɛed, ad tegma, maca netta war issin mammec. 28 Minzi tammurt tᵉttawi-dd řɣiǧet zeg ixef nnes, amezwar aɣemmuy, xenni tidart, awarni as irden ikemmřen di tidart. 29 Řami dd-tiweḍ řɣiǧet, řexdenni issekk amjar, minzi tameyra tiweḍ-dd.”

30 Inna: “Min di i ɣa narwes Tageldit n AREBBI niɣ s man amedya i zi tt i ɣa narcem? ^■   31 Aqa-tt amecnaw taḥebbuct n zzariɛet n uxerdel, tenni, řami tᵉttwazarɛ di temmurt, aqa nettat d tameẓyant x marra tiḥebba n zzariɛet i iǧan di temmurt. 32 Awarni řami tᵉttwazarɛ, teɣmi-dd, temɣar x marra řxuḍar n tebḥirt, ad tegg řefruɛ imɣaren maḥend ijḍaḍ n ujenna zemmaren ad ggen řeɛwacc di tiři nnes.”

33 Tuɣa issawař awař akidsen s imedya aṭṭas amecnaw yina, min umi zemmaren ad sřen, ^■   34 maca břa imedya war kisen issiweř ca, maca tuɣa issefham kuřci i imeḥḍaren nnes weḥḥedsen.

35 Deg wass nni, řami d tewḍa tmeddit, inna asen: “Ejj aneɣ ad neẓwa ɣar ujemmaḍin.” ^■   36 Semḥen di řɣaci, iwyen t umi t tuɣa di tɣarrabut, uca tuɣa din akidsen ɛawed tiɣarruba nneɣni. 37 Tekkar-dd ict n tḥaryaḍt temɣar, řemwaj ccaten di tɣarrabut ařami tebda tᵉttcura. 38 Maca Yeccu tuɣa iṭṭeṣ x ict n tsunta ɣar ḍeffar n tɣarrabut. Nitni ssfaqen t, nnan as: “A Amseřmad nneɣ, ma war d ac necqi ca neccin mařa nettwahellek?” 39 Xenni ikkar, iwebbex asemmiḍ, inna i řebḥar: “Ars! Sqar!” Yarsa usemmiḍ uca idweř kuřci yarsa. ^■   40 Xenni inna asen: “Mayemmi teggʷedem ammu? Min kenniw yuɣin war daywem bu l’iman?” 41 Tudef i-ten tiggʷudi temɣar, nnan i wayawya: “Min iɛna Wa, aqa uřa d asemmiḍ d řebḥar tteggen as array?”