1 Uca yudef-dd ɛawed ɣar temzida. Tuɣa din ijj n weryaz, afus nnes iqucceḥ. ^■   2 Bdan ḥeṭṭan t, ma ad taɣ ad t issgenfa di ssebt, ḥima zemmaren ad zzayes cetcan. 3 Inna as i weryaz wenni ɣar iǧa afus iqucceḥ: “Bedd di řwest.” 4 Xenni inna asen: “Ma iḥeǧeř di ssebt ad ittwagg min icnan niɣ min iǧan d aɛeffan, ad nessenjem ijj n řeɛmar niɣ ad t neneɣ?” Maca nitni sqaren. 5 Ixzar ɣar yenni d as dd-innḍen s tefqeḥt zi ssibbet n řeqsaḥet n wuřawen nsen uca inna i weryaz: “Swiẓẓeḍ afus nnek!” Isswiẓẓeḍ i-t-i-dd, idweř ufus nnes iṣeḥḥ ɛawed. ^■   6 Řexdenni ffɣen Ifarisiyyen ak-d ca zi taddart n Hirudus, uca mmcawaren xas, mammec i ɣa ggen ad t areddǧen. ^■  

7 Iffeɣ Yeccu ak-d imeḥḍaren nnes ɣar řebḥar, iḍfar i-t-dd řɣaci aṭṭas zi Ljalil, zi Yahudiyya, ^■   8 zi Urcalim, zi Idumiya u zeg ujemmaḍ n L'Urdun u zi Ṣur d Ṣaydun, aqa ijj n řɣaci d ameqqran. Minzi sřin marra min igga, s uyenni ɣares dd-usin. 9 Inna i imeḥḍaren nnes maḥend ad awyen ict n tɣarrabut ɣares s ssibbet n řɣaci, ḥima war t ddeḥḥsen.

10 Minzi tuɣa issgenfa aṭṭas, ařami xas wḍan ḥima ad t awḍen ad t ḥadan.

11 Uca řaryaḥ imengas, řami t ẓrin, bendqen xas, sɣuyyen, qqaren: “Aqa Cek d Mmis n AREBBI.”

12 Maca iweṣṣa ten aṭṭas ḥima war xas ssuffuɣen řexbar.

13 Xas uca yuři ɣar wedrar, iřaɣa-dd ɣares inni ixs, uca usin-dd ɣares. ^■  

14 Igga tenɛac ḥima ad kides iřin u ḥima ad ten issekk maḥend ad barrḥen s řexbar aṣebḥan

15 uca maḥend ad ɣarsen tiři ṣṣulṭa x usgenfi n řehřac u x usuffeɣ n řaryaḥ iɛeffanen.

16 Cimɛun igga as Buṭrus d isem,

17 u Yaɛqub mmis n Zabdi d Yuḥanna umas n Yaɛqub, isemma aten ‘Buwanirjis’, min ixs ad yini ‘ayt n wajjaj’,

18 u inneɣni isemma aten Andrawus d Filippus d Bar-Tulumawus d Matta d Tuma d Yaɛqub, mmis n Ḥalfa, d Taddawus d Cimɛun Amɛessab

19 d Yahuda Isxariyuṭi wenni t i ɣa iɣdaren.

20 Usin-dd ɣar taddart uca inneyru din ɛawed řɣaci, ařami war ufin tawwart x macca n weɣrum. ^■   21 Umi sřin řwacun nnes man aya, ffɣen-dd, ḥima ad t ṭṭfen, minzi nnan: “Aqa ibbuhři.” 22 Maca imseřmaden n idlisen inni dd-ihwan zi Urcalim nnan: “Aqa dayes ‘Bᵉɛalzabub’!” uca nnan ɛawed “S umeqqran n řaryaḥ iɛeffanen issuffuɣ řaryaḥ iɛeffanen.” ^■   23 Iřaɣa asen-dd uca issiweř akidsen s imedya: “Mammec izemmar cciṭan ad issuffeɣ cciṭan? ^■   24 Mařa temsebḍa ict n tgeldit x yixef nnes, war tzemmar tgeldit nni ad tbedd. 25 Mařa temsebḍa ict n taddart x yixef nnes, war tzemmar taddart nni ad tbedd. 26 Mařa ikkar cciṭan ḍidd i yixef nnes, xenni war ittiři d ijjen, uca war izemmar ad ibedd, maca ad yiři man aya d aneggar nnes. 27 War izemmar ḥed ad yadef taddart n wenni ijehden maḥend ad as yacar řeqcuɛ nnes, mařa war icarf wenni ijehden amezwar, xenni ad ikecceḍ taddart nnes. ^■   28 S tidett, Necc ad awem iniɣ belli ad asen ttwaɣfaren i tarwa n bnadem marra ddnub nsen uřa d aceqqef i zi ɣa ceqqfen di Arebbi, ^■   29 maca wenni i ɣa iceqqfen di Arruḥ Iqeddsen war ɣares bu weɣfar qaɛ, maca aqa xas řḥukm ittduman.” ^■   30 Minzi nitni nnan: “Aqa dayes řaryaḥ amengus.”

31 Řexdenni usin-dd aytmas d yemmas, bedden barra i taddart, uca ssekken-dd ɣares, řaɣan as-dd. ^■   32 Maca řɣaci qqimen nnḍen as-dd, nnan as: “Xzar, yemmac d aytmac aqa aten di barra, arezzun xak.” 33 Yarra-dd xasen, inna: “Man ten i iǧan d yemma u man yen i iǧan d aytma?” 34 Uca ixzar ɣar yenni iqqimen i d as dd-innḍen, inna: “Xzar, aqa yemma d aytma, 35 minzi wenni itteggen min ixs AREBBI d netta d uma d učma d yemma.” ^■