1 Iwḍen ɣar ujemmaḍin n řebḥar di jjihet n Gadarinis. ^■   2 Umi dd-iffeɣ zi tɣarrabut, řexdenni iřqa i-t ijj n bnadem zeg imeḍřan dayes ijj n řaryaḥ d amengus. 3 Tuɣa izeddeɣ deg imeḍřan uca war izemmar ḥed ad t icarf uřa s snaseř, 4 minzi waxxa tuɣa carfen t aṭṭas n twařawin s iceddiyyen d snaseř, aqa netta iqḍu snaseř nni, yarẓa iceddiyyen u war izemmar ḥed ad t iqemmeɛ. 5 Tuɣa-t řebda, ass d ǧiřet, deg idurar u deg imeḍřan, isɣuyyu, iyezzem ixef nnes s iẓra.

6 Umi iẓra Yeccu zi řaggʷaj, yuzzeř ɣares uca iwḍa as ɣar iḍaren. 7 Issɣuy s jjehd uca inna as: “Min din jar ayi akidek, a Yeccu, mmis n AREBBI, Amɛuǧi x kuřci. Ttzawgeɣ Cek s AREBBI, war d ayi ttmarrat!” 8 Minzi aqa inna as: “Ffeɣ zi bnadem-a, a řaryaḥ amengus!” 9 Isseqsa t: “Mammec d ac qqaren?” Yarra-dd, inna: “Isem inu ‘Lixyun’, man aya ixs ad yini ‘Abarru’, minzi neccin deg waṭṭas.”

10 Izawg i-t aṭṭas ḥima war t issiggʷej barra i udewwar nni.

11 Tuɣa din ɣar wedrar ict n tḥimart temɣar n iřfan thedda.

12 Zawgen t ccwaṭen nni, nnan: “Sekk aneɣ deg iřfan ḥima ad daysen nadef.”

13 Isamḥ asen Yeccu. Řexdenni ffɣen řaryaḥ imengas zeg weryaz nni, udfen deg iřfan, uca tuzzeř tḥimart nni ɣar ijj n jjarf yuɛřan uca wḍan di řebḥar. Tuɣa-ten ɛřaḥař deg wařfayen uca ɣarqen di řebḥar.

14 Maca imeksawen n iřfan arewřen, xebbaren man aya di tendint u x iyyaren. Iwdan ffɣen-dd ḥima ad ẓaren min imsaren.

15 Usin-dd ɣar Yeccu, ttwařan amaryaḥ i dayes tuɣa ccwaṭen, wenni di tuɣa izdeɣ ‘Lixyun’, iqqim, yarḍ, s řbař nnes, uca ggʷeden.

16 Inni iẓrin man aya, xebbaren ten min imsaren i umaryaḥ i di tuɣa ccwaṭen, u ɛawed i yiřfan nni.

17 Uca bdan ttzawgen t maḥend ad iggʷej x temmurt nsen.

18 Řami dd-yudef ɣar tɣarrabut, izawg i-t umaryaḥ i dayes tuɣa ccwaṭen ḥima ad yiři akides. ^■  

19 War t ijji, maca inna as: “Ruḥ ɣar taddart nnek d řaǧ nnek, xebbar i-ten marra min zzayek igga SIDI, mammec xak yarḥem.” 20 Uca iruḥ, ibda ittbarreḥ di Dikapulis marra min d as igga Yeccu, uca marra tbehten.

21 Awarni řami iẓwa Yeccu s tɣarrabut ɣar ujemmaḍ, imun-dd xas ɛawed aṭṭas n řɣaci am tuɣa-t x tma n řebḥar. ^■   22 Yusa-dd ijjen zeg imeqqranen n temzida, isem nnes Yayrus. Umi t iẓra, iwḍa as ɣar iḍaren. ^■   23 Izawg i-t aṭṭas, inna: “Iǧi tmaẓuẓt tḥeřc aṭṭas. Ttzawgeɣ Cek ad dd-tased, ad xas tessarsed ifassen ḥima ad teggenfa, ad teddar.” 24 Iruḥ akides uca iḍfar i-t-i-dd waṭṭas n řɣaci, deḥḥsen t Netta.

25 Ict n temɣart tuɣa ttazzřen zzayes idammen tenɛac n iseggʷusa, ^■   26 uca tekka xas tamara aṭṭas zeg iḍbiben umi tessuffeɣ marra min ɣares, maca war testenfiɛ s walu, maca yarni ɛad xas řḥař, 27 aqa tesřa x Yeccu uca tusa-dd ɣares am tekka x ddḥas n řɣaci zi ḍeffar nnes, uca tḥada arruḍ nnes, 28 minzi tenna: “Mařa ḥadiɣ mɣir arruḍ nnes, ad ddareɣ.” 29 Řexdenni yuẓeɣ usizzeř n idammen, tuca ak-d arrimet nnes belli teggenfa zi řehřac nni.

30 Řexdenni yuca Yeccu ak-d yixef nnes belli iffeɣ zzayes jjehd uca inneqřeb ɣar řɣaci, inna: “Wi iḥadan arruḍ inu?” ^■   31 Nnan as imeḥḍaren nnes: “Cek twařid řɣaci ideḥḥes i Cek u Cek tesseqsid: ‘Wi d ayi iḥadan?’ ” 32 Maca iqqim ixezzar ḥima ad iẓar wi yeggin man aya. 33 Tuɣa tameṭṭut teggʷed, tᵉttarjiji, am tessen min d as imsaren, uca tusa-dd, tewḍa as ɣar iḍaren uca tɛawed as tidett marra. 34 Xenni inna as: “A yeǧi, l’iman nnem aqa issenjem i cem, ruḥ s řehna ad tiřid teggenfid zi řehřac nnem!” ^■  

35 Am tuɣa ɛad issawař, usin-dd ca zi taddart n umeqqran n temzida, nnan as: “Iǧic temmut, mayemmi tseddaɛed ɛad Amseɣɣar?” ^■   36 Maca Yeccu isřa awařen i innan uca inna i umeqqran n temzida: “War tteggʷed ca! Amen waha!” 37 War ismiḥ uřa i yijjen ad t iḍfar, mɣir Cimɛun Buṭrus d Yaɛqub d Yuḥanna umas n Yaɛqub. 38 Usin-dd ɣar taddart n umeqqran n temzida uca iẓra i-ten ccaten agejdur, ttrun uca sɣuyyun. 39 Umi dd-yudef, inna asen: “Mayemmi teccatem agejdur, tᵉttrum? Taḥenjirt war temmut ca, maca aqa tᵉṭṭeṣ.” ^■   40 Nitni ḍeḥcen zzayes. Maca Netta issuffeɣ i-ten kuřci barra uca yiwi akides babas d yemmas n tḥenjirt d yenni tuɣa akides, xenni yudef-dd mani tuɣa tezzeř tḥenjirt. 41 Iṭṭef deg ufus n tḥenjirt, inna as: “Kkar, a taḥenjirt!” 42 Řexdenni tekkar tḥenjirt uca tuyur, minzi tuɣa taḥenjirt ɣares tenɛac n iseggʷusa. Ttbehten nitni s yijj n utebhet imɣar, 43 uca Netta yumur i-ten s jjehd, ḥima uřa d ijjen ad ibarreḥ s man aya. Xenni iweṣṣa ad as wcen ḥima ad tecc.