1 Di ǧiřet awarni řami teɛdu ssebt, ɣar řefjar n wass amezwaru n simana, tusa-dd Maryam n Majdala d Maryam nneɣnit ḥima ad ssijjent x wenḍeř. ^■   2 Xzar, imsar ijj n wenhezzi n temmurt imɣar minzi Lmalak n SIDI ihwa-dd zeg ujenna, iqarreb-dd uca isseqnunni taṣḍart zeg wadaf uca iqqim xas. 3 Tuɣa ṣṣifet nnes am wajjaj u warruḍ nnes d acemřař am wedfeř. ^■   4 Iɛessasen bdan ttarjijen zi teggʷudi zzayes uca dewřen am imettinen. 5 Lmalak iṭṭef deg wawař, inna i temɣarin: “War tteggʷedent ca, minzi ssneɣ aqa kennint tarezzunt x Yeccu wenni ittwaṣellben. ^■   6 War da iǧi, minzi Netta ikkar-dd, am mammec inna. Asent-i-dd da, xzarent amcan mani tuɣa immars Siditneɣ. ^■   7 Ruḥent deɣya, inint i imeḥḍaren nnes, aqa ittwasnekkar-dd zi taddart n imettinen, u xzar Netta d awem i ɣa izwaren ɣar Ljalil. Din ad t tẓarem. Xzar, aqa nniɣ awem t.” ^■   8 Ffɣent nitenti deɣya zeg wenḍeř s tiggʷudi d řefraḥet imɣaren, ttazzřent ḥima ad tt xebbarent imeḥḍaren. ^■   9 Uca xzar, Yeccu iřqa tent deg webrid, inna asen: “Sřam xakent!” Nitenti usint-i-dd ɣares, ṭṭfent deg iḍaren nnes uca sejdent as. ^■  

10 Řexdenni inna asent Yeccu: “War tteggʷedent ca, ssiwḍent řexbar-a i aytma, ḥima ad raḥen ɣar Ljalil, diha ad ayi ẓaren.” ^■  

11 Am ruḥent, xzar, aqa ca zeg iɛessasen usin-dd ɣar tendint ḥima ad xebbaren imeqqranen n ikehhanen x marra min imsaren.

12 Řexdenni munen nitni ak-d imɣaren n řgens uca mcawaren akidsen, uca wcin asen i iɛeskariyyen ttmenyat n nnuqart, war iǧi drus,

13 uca nnan: “Inim: ‘Imeḥḍaren nnes usin-dd s ǧiřet uca ucaren t am tuɣa neṭṭeṣ!’

14 Uca mařa isřa i-t lɛamil, neccin ad t nesseqneɛ uca war kenniw nettejji ad tiřim deg imunas.”

15 Ṭṭfen tmenyat n nnuqart uca ggin am mammec d asen ɛeřmen. Ammu i dd-itteffeɣ řexbar-a jar Wudayen ař ass n yiḍa.

16 Ḥiṭac n imeḥḍaren nni ruḥen ɣar Ljalil, ɣar wedrar mani ten yumur Yeccu. ^■  

17 Ařami t ẓrin, sejden as, maca ca cekken.

18 Iqarreb-dd ɣarsen Yeccu, issiweř akidsen, inna: “Temmewc ayi marra ṣṣulṭa deg ujenna u x temmurt. Am mammec i d ayi dd-issekk Baba, ammu kenniw i ɣa ssekkeɣ Necc. ^■  

19 Ruḥem, arrem marra řegnus d imeḥḍaren inu, ssɣeḍṣem ten s Yisem n Tbabat d Tmemmit d Arruḥ Iqeddsen, ^□  ■   20 u sřemdem asen ad ṭṭfen di marra min xef kenniw umureɣ zzayes, u xzar, Necc aqa ayi akidwem marra ussan ař qeṭṭu n ddunect.”

Aneggar n Řexbar Aṣebḥan Iqeddsen am mammec t ibarreḥ Matta. ^■