1 Ɣar ṣṣbeḥ zic, aqa marra imeqqranen n ikehhanen d imɣaren n řgens kksen awař jar asen x Yeccu, mammec i t ɣa nɣen. ^■   2 Nitni carfen t, iwyen t uca sellmen t i lɛamil arumani Pilaṭus. ^■   3 Umi iẓra Yahuda wenni t iɣdaren belli Yeccu ittwaḥkem, indem uca yarra-dd třatin n řewzan n nnuqart ɣar imeqqranen n ikehhanen d imɣaren n řgens, 4 inna: “Necc xḍiɣ, aqa ɣdareɣ idammen imezdagen.” Maca nitni nnan: “Min d aneɣ iruḥen? Xzar-dd cek.” 5 Awarni řami inḍar řewzan n nnuqart di Zzawect Tameqqrant, iffeɣ uca iruḥ, yuyeř ixef nnes. ^■   6 Imeqqranen n ikehhanen ksin řewzan n nnuqart, nnan: “War icuwwar ad ten nessars deg wexxam n ṣṣedqet minzi řewzan nni d ttaman n usizzeř n idammen.” 7 Kksen awař jar asen maḥend ad zzayes sɣen iyyar n bu-třaxt maḥend ad yiři i imeḍřan n ibarraniyyen. ^□  ■   8 S uyenni ittwasemma iyyar nni ‘Iyyar n idammen’ ař ass n řexxu.

9 Řexdenni ittwakemmeř min ittwannan zeg unabi i iqqaren: “Ksiɣ třatin n řewzan n nnuqart, řqedd n Wenni iɣřan, mixef inni zi tarwa n Israil kksen awař, ^■  

10 uca necc wciɣ tent i iyyar n bu-třaxt, am mammec i d ayi yumur SIDI.” ^■  

11 Yeccu tuɣa ibedd qibač i lɛamil. Lɛamil isseqsa as, inna: “Ma Cek d Ajeǧid n Wudayen?” Yeccu inna as: “Cek aqa tennid t!” ^■  

12 Uca řami t tehmen imeqqranen n ikehhanen d imɣaren n řgens, yarra-dd s walu.

13 Xenni inna as Pilaṭus: “Ma war tesřid mecḥař xak cehhden?” ^■  

14 Netta war xas dd-yarri uřa s ijj n wawař, ařami iqqim lɛamil ittebhet aṭṭas. ^■  

15 Tuɣa lɛamil innum yarexxu di kuř řɛid i yijj n umeḥbus i řɣaci, wenni ixsen nitni. ^■  

16 Tuɣa ɣarsen deg wussan nni ijj n umeḥbus ittwassen, qqaren as Bar-Abbas. ^■  

17 Řami munen, inna asen Pilaṭus: “Wi texsem ad awem dd-arxuɣ, Bar-Abbas niɣ Yeccu wenni umi qqaren Lmasiḥ?”

18 Minzi netta issen aqa nitni sellmen t zi řeḥsed.

19 Am tuɣa lɛamil iqqim x řkursi n řḥukm, tessekk-dd ɣares temɣart nnes, tenna: “Barra ixef nnek zeg Umseggad nni, minzi aqa ass-a ttwaɛeddbeɣ aṭṭas di tarjit di ssibbet nnes.” 20 Maca imeqqranen n ikehhanen d imɣaren n řgens ssqenɛen řɣaci ḥima ad ttaren Bar-Abbas u ḥima ad areddǧen Yeccu. ^■   21 Lɛamil yarra-dd, inna asen: “Man wen zi tnayen-a i texsem ad arxuɣ i kenniw?” Nnan: “Bar-Abbas!” 22 Pilaṭus inna asen: “Min i ɣa ggeɣ xenni ak-d Yeccu umi qqaren Lmasiḥ?” Nnan as marra: “Ṣellb i-t!” 23 Inna asen lɛamil: “Man tuɛeffna i igga?” Sɣuyyen s jjehd ktar, nnan: “Ṣellb i-t.” 24 Řami iẓra Pilaṭus belli war yiweḍ ɣar walu, mahu ad ikkar uɣuwweɣ, iksi aman, issird ifassen nnes qibač i řɣaci, inna: “Necc war tturseɣ ca deg idammen n Umseggad-a, xzarem kenniw!” 25 Řgens marra yarra-dd, inna: “Ejj idammen nnes ad xaneɣ iřin u x tarwa nneɣ.” ^■   26 Xenni yarxu asen-dd i Bar-Abbas, maca awarni řami ihettek Yeccu s urekkuḍ, isellem i-t ḥima ad ittwaṣelleb.

27 Řexdenni iwyen iɛeskariyyen n lɛamil Yeccu ɣar Taddart n Ccraɛ, umi qqaren ‘Prituriyum’, uca ssmunen xas marra řɛeskar. ^■   28 Kksen as-dd arruḍ, uca arḍen as ijj n ujeǧab d azeggʷaɣ. 29 Nitni muden as ijj n ttaj s isennanen, ssarsen tt x uzeǧif nnes uca ggin as aɣanim deg ufus nnes afusi, xenni wḍan ɣar iḍaren nnes zzates, qqimen ttbuṣaren xas, nnan: “Azul xak, a Cek, a Ajeǧid n Wudayen!” 30 Ssusfen as x uɣembub nnes, ksin aɣanim uca wtin t zzayes ɣar uzeǧif. 31 Awarni řami t deǧen, ksin xas aseřham, arḍen as arruḍ nnes uca nedhen t maḥend ad t ṣellben.

32 Am ffɣen ɣar barra n tendint, ufin ijj n weryaz zi Qayrawan, qqaren as Cimɛun, uca ziyyaren xas ḥima ad yarbu ṣṣalib nnes. ^■   33 Ařami iwḍen ɣar wemcan umi qqaren ‘Juljuta’, min ixs ad yini ‘Amcan n Tceqquft’, ^■   34 wcin as řxeǧ ixeǧḍen s tarzugi uca ařami t iqqas, yugi ad isu. 35 Awarni řami t ṣellben, bḍan arruḍ nnes jar asen umi xas ggin akeccuḍ ^■   36 am din qqimen, ɛessen xas. 37 Ggin as sennej i uzeǧif nnes ict n tira mayemmi xas ḥekmen s řmewt: ‘Wa d Yeccu, Ajeǧid n Wudayen.’ ^■   38 Xenni ṣellben akides tnayen n ixewwanen, ijjen ɣar ufusi nnes u ijjen ɣar uzeřmaḍ nnes. ^■   39 Inni tuɣa ittekkan, ttceqqafen dayes, tthezzan azeǧif nsen, ^■   40 nnan: “A Cek wenni ihedmen Zzawect Tameqqrant u di třata n wussan ad tt tebnid ɛawed, senjem ixef nnek. Mařa Cek d Mmis n AREBBI, hwa-dd xenni zi ṣṣalib.” ^■   41 Uřa d imeqqranen n ikehhanen ak-d imseřmaden n idlisen d imɣaren n řgens d Ifarisiyyen stehzan zzayes amenni, nnan: 42 “Issenjem inneɣni maca war izemmar ad issenjem ixef nnes. Mařa Netta d Ajeǧid n Israil, ejj i-t ad dd-ihwa zi ṣṣalib, uca ad zzayes namen. 43 Ittceř x AREBBI, ejj i-t Netta ad t issenjem mařa yarḍa xas Netta, minzi inna: ‘Necc d Mmis n AREBBI’.” 44 Uřa d ixewwanen, inni tuɣa ittwaṣellben akides, tuɣa ssfeṭṭahen zzayes amenni.

45 Zi tsaɛɛet wiss setta tewḍa-dd taǧest x marra tammurt ař tasaɛɛet wiss tesɛa. ^■   46 Jwayeh n tsaɛɛet wiss tesɛa isɣuyy Yeccu s tmijja ijehden, inna: “Il, Il, lmana cabaqtani?”, min ixs ad yini: “A-y-AREBBI inu, a-y-AREBBI inu, mayemmi dayi tsemḥed?” ^□  ■   47 Řami d as sřan inni din ibedden, nnan ca zzaysen: “Ittřaɣa x Iliya.” 48 Deɣya yuzzeř-dd ɣares ijjen zzaysen, iksi spunxa, issuff i-tt s řxeǧ, igga i-tt x ijj n uɣanim uca iwca as ad isu. ^■   49 Inneɣni nnan: “Ejj i-t, ad nẓar, ma ad dd-yas Iliya ḥima ad t issenjem.” 50 Isɣuyy Yeccu ɛawed s tmijja ijehden uca iwca Arruḥ nnes. ^■  

51 Xzar, ařeḥḥaf n wadaf ɣar Zzawect Tameqqrant icarreg x tnayen zi sennej ař swadday, tammurt tenhezz, tiṣuḍar feǧqent, ^□  ■   52 imeḍřan ttwarezmen uca aṭṭas n řxecbat n imqeddasen inni tuɣa iṭṭṣen, ttwasnekkarent-dd. 53 Uca awarni tnukra nnes ffɣen zeg imeḍřan, udfen ɣar tendint iqeddsen uca banen-dd i waṭṭas. 54 Řami řqebṭan x mya d yenni tuɣa akides iḥeṭṭan Yeccu, ẓrin anhezzi n temmurt d min imsaren, ggʷeden aṭṭas, nnan: “S tidett tuɣa Wa d Mmis n AREBBI.” ^■   55 Tuɣa din aṭṭas n temɣarin tinni tuɣa dd-ixezzaren zi řaggʷaj, ḍfarent Yeccu zi Ljalil ḥima ad xas sexxarent. ^■   56 Jarasent Maryam n Majdala d Maryam, yemmas n Yaɛqub d Yusis, d yemmas n ayt n Zabdi.

57 Řami dd-tiweḍ tmeddit, yusa-dd ijj n weryaz zi Arimatiya, qqaren as Yusuf. Netta tuɣa ɛawed d ameḥḍar n Yeccu. ^■   58 Iruḥ ɣar Pilaṭus, ittar as řxecbet n Yeccu. Řexdenni iweṣṣa Pilaṭus maḥend ad as wcen řxecbet. 59 Yusuf iksi řxecbet, inneḍ i-tt di řecfen n řeqṭen azdad iṣfan, 60 issars i-tt deg ijj n wenḍeř n jdid i tuɣa iɣza, uca awarni řami isseqnunni ict n teṣḍart ḥima ad iqfeř tawwart n wenḍeř, iruḥ. ^■   61 Tuɣa din Maryam n Majdala d Maryam nneɣnit qqiment qibač i wenḍeř.

62 Tiwecca nnes awarni ass n Usewjed, munen imeqqranen n ikehhanen d Ifarisiyyen ɣar Pilaṭus, 63 nnan: “A siditneɣ, neɛqeř belli aɣeccac-a, am tuɣa ɛad iddar, inna: ‘Awarni třata n wussan ad kkareɣ!’ ^■   64 Xenni umur ḥima ad ḍemnen anḍeř ař ass wiss třata ḥima ad taɣ imeḥḍaren nnes war dd-ttisen s ǧiřet ad tt acaren, xenni ad inin i řgens: ‘Aqa ikkar-dd zi taddart n imettinen!’ uca ammu i ɣa yiři uweddar aneggaru ktar x umezwar.” 65 Inna asen Pilaṭus: “Aqa ɣarwem iɛessasen, ruḥem, ḍemnen t am mammec tᵉttwařam.” 66 Ruḥen ḥima ad ɛessen x wenḍeř uca ḍemnen anḍeř s ict n teṣḍart, nitni jmiɛ ak-d iɛessasen.